Desde dialuna y pa un siman largo corte lo trata e caso contra ex minister di AVP y 23 sospechoso den caso di soborno y corupcion

946

Dialuna 14 di januari ta cuminza e caso penal contra un ex minister di AVP, Sr. Paul Croes, hunto cu 23 otro sospechoso mas, den cual ta inclui tambe su esposa.

Desde luna di Maart 2017,  e investigacion a bira publico ora cu Ministerio Publico a tene varios inval y despues a sigui cu varios detencion.

E acusacionnan contra di e grupo, cual ta casi full e bureau di e ex minister, ta fraude cu permiso pa stranhero, unda lo a cumpra ambtenaarnan y of e minister pa asina haya fabor di “ontheffing” pa permiso pa trahador stranhero.

Ministerio Publico a informa diasabra mainta, cu tin entotal 23 sospechoso y ta considera Paul Croes como e sospechoso principal.

Den transcurso di e investigacion,  a sali na cla tambe cu tabatin “omkoping” cu holoshinan costoso, unda in tramitadora di permiso lo a haci regaldonan costoso na e minister pa asina ricibi ontheffing.

Dialuna corte di Aruba lo trata e caso, unda lo usa dos sala.  E prome sala lo ta pa tur esnan cu ta wordo acusa hunto cu nan abogadonan.  E di dos sala ta pa prensa y otro persona cu kier sigui e caso.

Ministerio Publico mes y su personal lo no ta presenta na corte, pasobra nan a haya un video link cu lo wordo projecta riba big screen den e sala di conferencia na oficina di Ministerio Publico. Pues fiscalnan, PG, vocero y demas personal lo sigui e transmicion enbibo for di corte den e senjal priva cu lo wordo manda exlusivamente pa nan.

Tabata na luna di Augustus 2017 cu e ex minister, estando den funccion a wordo deteni y encarcela, unda el’a keda 3 pa 4 luna cera, te na November 2017.  Tabata pa prome ves cu un minister di pais Aruba ta wordo cera.   Notabel tabata cu e ex minister no a pidi su retiro, pues a keda minister, maske el’a traspasa su carteranan pa otro minister.

Te cu awe e ex-minister a keda ripiti cu e ta inocente y nunca a duna un splicacion, pero a bisa cu e ta reserve su palabranan pa corte.

E investigacion tras di e caso aki tabata uno grandi, unda a bini 10 recherché di Hulanda pa asina dirigi e investigacion.  A haci uso di varios aparatonan sofestica, aparentemente grabacionnan den auto, pa asina por a yega na informacion.

Segun Ministerio Publico a bisa cu e caso lo dura un siman,   desde dialuna te diabierna, unda lo repasa persona pa persona y caso pa caso di kico nan ta wordo sospecha.

 

 

 

 

LEAVE A REPLY

Please enter your comment!
Please enter your name here