Diasabra mainta riba e prome dia di competencia, Aruba a wordo representa pa e atleta nan di natacion como tambe natacion artistico. Den natacion Elisabeth Timmer hunto cu Mikel Schreuders a logra clasificacion pa Final B y Final A respectivamente. Den natacion artistico mainta, Kyra Hoevertsz a hasi su event di Solo Tech.

Elisabeth tabata e prome atleta pa drenta pool na e Compleho Deportivo Merliot y den su event di 50m lomba a logra un tempo di 31.73 sec cu a dun’e clasificacion pa Final B cu tuma lugar anochi. Mikel Schreuders a landa su event di 100m free y ta pone un tempo di 49.87 sec cu clasificacion pa Final A.

Na un venue diferente ‘El Polvorin’ a tuma lugar e natacion artistico. Parti mainta Kyra Hoevertsz a hasi su solo tech. Kyra tabata ultimo atleta pa drenta piscina y hasi su rutina dilanti e hueznan presente pa e Weganan CAC 2023. Na final ta logra posiciona su mes na di 3er lugar cu 196.6833 punto. Na prome lugar a keda e atleta di Colombia y 2do lugar Mexico.

Parti atardi unbes mas ‘El Polvorin’ tabata cla pa ricibi e Duo nan di diferente pais. Den e rutina di Duet Tecnico, Kyra Hoevertsz y Mikayla Morales a sa di posiciona nan mes na di 3er puesto cu un puntuacion di 175.7467. Na di prome lugar a keda duo di Mexico y 2do lugar e duo di Colombia. Asina Aruba ta termina e prome dia di competencia na ‘El Polvorin’ den Natacion Artistico cu dos medaya di brons.

Atardi na Compleho Deportivo Merliot ambos atleta di natacion tabata cla pa landa nan respectivo final. Elisabeth Timmer a landa su evento di 50m lomba Final B y ta posiciona su mes na di 2do lugar cu un tempo di 30.45 seconde. Algun heat despues tabata oportunidad di Mikel Schreuders pa landa su evento di 100m free. Schreuders despues cu na 50m no tabata entre e tres prome nan a logra pusha y asina pone un tempo di 49.17 seconde cu a posicion’e na di 2do lugar logrando asina e 3er medaya di dia pa Aruba, den e caso aki uno di silver.

Awe diadomingo nos delegacion lo continua cu nan participacion na e Weganan Centro Americano y del Caribe San Salvador 2023 den e deporte di Natacion, Landamento Artistico, Tiro y como tambe Gymnasia. Riba nos facebook page como tambe instagram por sigui di cerca locual nos atleta nan ta bibando aki na San Salvador, El Salvador. 

#TeamARU #SanSalvador2023

LEAVE A REPLY

Please enter your comment!
Please enter your name here