Despues di su inicio 4 luna pasa, EcoTech ta informa cu e proceso di reciclahe ta avansando dia pa dia y cu por bisa cu e planta ta aporta grandemente pa yega na un solucion total pa e problematica di sushedad riba nos isla. Ainda tin hopi posibilidad di expansion cu ta den plan di EcoTech proximamente.
Prome cu e planta a cuminsa procesa sushi den su edificio nobo e departamento di reciclahe di EcoTech tabata recupera alrededor di 322.000 lbs material recicla pa luna. Despues di e prome 4 lunanan di operacion di e planta nobo, ya caba ta reciclando mas di 1.340.000 lbs pa luna. E materialnan recicla ta consisti di entre otro: carton, papel, corant, PET (plastic), HDPE (plastic), Polypropylene (plastic), hero, bleki aluminium y glas. EcoTech ta sigui ahusta y mehora su sistemanan pa cada dia procesa mas sushi na un forma eficiente y recicla mas y mas pa por  aporta lo maximo na yuda resolve e problema grandi di sushedad cu nos isla conoce.
EcoTech ya a cuminsa atrae otro companianan di recogemento di sushi cu awor tambe ta haciendo uzo di e planta di reciclahe. EcoTech mes ta recoge  un parti substancial di sushi di nos isla y ta sigui cu su plannan pa recicla mas tanto posibel y tira lo menos posibel na dump di Parkietenbos.
Ya caba ingenieronan Europeo ta den fase final pa cu e plannan pa un planta di “Waste to Energy” pa EcoTech. Den e proximo lunanan lo drenta e fase di contrata un of mas compania pa ehecuta e construccion. E planta di energia alternativa cu ta uza desperdicio como fuente lo sirbi pa deshaci di e parti di sushi cu no por wordo recicla of no por wordo exporta pa exterior y asina evita cu e sushi cu ta resta lo bay dump. Di e forma aki EcoTech ta aporta cu un plan pa un solucion total di desperdicio y cu ta minimalisa e cantidad cu lo mester bay dump. Ademas lo yuda cu energia alternativa pa di e forma aki baha e dependencia riba crudo. Ta intencion di EcoTech pa sigui inverti pa por soluciona e problematica di desperdicio y na mes momento aumenta reciclahe na Aruba.