Awe ambtenaarnan por wak cu gobierno ta mara te 2024 na un acuerdo firma den pasado cu e sindicatonan

35

Parlamentario Edgard Vrolijk (MEP):

SUB: E motibo pakico mester cuminsa na 2025!

***“Awe ambtenaarnan por wak cu gobierno ta mara te 2024 na un acuerdo firma den pasado cu e sindicatonan”

Diabierna siman pasa gobierno a entrega un proposicion na sindicatonan pa locual ta trata indexering. Den esaki a propone 0.6% di indexering riba e ultimo Bashi premie, Gelijk bedrag y Reparatietoeslag di 2024 (303 florin di aumento). Banda di esaki a propone un dia liber riba cumpleaños di e ambtenaar y den cuadro di aña di enseñanza – ya cu ta bira mas dificil pa docente haya liber riba su cumpleaños – pa por pega e dia aki kizas na e herfstvakantie. Pero sindicato a rechaza esaki pasobra nan punto di salida ta 3.6% y tambe cu ehecucion di esaki ta pa 2025.

Tin suficiente tempo pa sinta na mesa

Awe mi tin di para ariba cu den tur mal situacion financiero di e pais aki y cu Hulanda (CAFT) ta cada vez menaza cu un aanwijzing pa motibo di e plafond di gastonan di personal, gobierno ta purba na crea e espacio financiero pa por cumpli cu su trahadornan. Den esaki ya ta muestra cu desde cu gobierno a sinta a cumpli cu su trahadornan cabalmente pa locual ta trata e aumento di nan Bashi premie, Reparatietoeslag y Gelijk bedrag. Maske pa Hulanda mester kita esakinan y alavez aplica ‘massale ontslag’, gobierno aki a percura pa reduci den gastonan di nan departamentonan na balor di 20 miyon florin pa por cumpli cu su ambtenaarnan. P’esey mi ta haya hopi prematuro si e actitud di sindicatonan cu kier pone ultimatum y menaza di subi caya mientras cu nan sa bon bon cu tin tempo suficiente pa por negocia algo mihor y sigur una vez cu haya un mihor bista riba e presupuesto 2020 y e outlook pa locual ta 2021 unda cu na 2020 Aruba mester tin un surplus di 25 miyon y pa 2021 un surplus di 50 miyon y cu e inversionnan cu pronto lo ser anuncia, mi tin siguransa cu gobierno lo por cumpli cu algo mihor pa su trahadornan y p’esey mi ta haya cu e accionnan aki ta prematuro y tin tempo y espacio pa por negocia.

Di con por cumpli te cu 2025?

Esaki ta logico den bista cu sindicatonan y gobierno a yega na un acuerdo caba unda desde 2014 te cu 2024 (mira tabel adhunto) gobierno ta mara pa por cumpli cu su ambtenaarnan cu pago di Reparatietoeslag, Gelijk bedrag y Bashi premie cu gradualmente lo conoce aumento manera ta e caso di 2019 unda cu na 2018 e Bashi premie tabata 1500 florin y na 2019 a ser paga 1601 florin, mescos cu e Reparatie toeslag cu na 2018 tabata 1485 y na 2019 a ser paga 1601 y Gelijk bedrag na 2018 tabata 1500 y awo na november lo bira 1601 florin. Y asina esaki ta keda aumenta y unda cu pa 2024 lo ta e ultimo aña di e acuerdo y unda e Bashi premie cu na 2014 a cuminsa na 1500 ta caba na 2129 florin, Reparatie toeslag na 2014 tabata 850 florin ta caba na 2129 florin y e Gelijk bedrag na 2014 tabata 1500 florin y ta caba na 2129 florin.

Gobierno di coalicion ta cumpliendo

Maske tur dia e gobierno ta bao menaza di aanwijzing, gobierno como dunador di trabao a tene cuenta cu e acuerdo aki y a hinca esaki tambe den nan protocol unda cu den e plafond a pone un maximo pa locual ta placa di personal. Y cu e acuerdo y cumplimento di e acuerdo aki cu ta core te 2024 ta haci imposibel pa por pone mas peso riba gobierno y sigur riba pueblo. P’esey mi ta kere cu tin suficiente tempo y espacio pa gobierno y sindicatonan yega na otro y ainda mi no ta compronde e apuro aki y menaza di un huelga inhustifica pasobra gobierno a crea e espacio financiero pa cumpli cu su ambtenaarnan di awor pa 2024 y ta e motibo cu tur otro acuerdo tin di cuminsa di 2025 bay ariba y sigur mester keda si den un margen realistico pasobra ta te 2039 nos pais por hala rosea atrobe y bisa cu nos situacion finaciero ta sostenibel manera cu el’a ser laga atras door di MEP na 2009, unda cu 30 aña despues di un mal escogencia di pueblo pa un gobernacion cu a masacra finanzas di pais Aruba, nos pueblo por cuminsa sinti un alivio, si tur cos cana manera ta ser proyecta.

P’esey pa termina mi ta spera cu tur ambtenaar lesa esaki obhetivamente y sigur nan compronde cu gobierno ta dispuesto pa yega na un acuerdo y den tur nan reto financiero a bin cu un proposicion pero tambe awe ambtenaarnan por wak cu gobierno ta mara te 2024 na un acuerdo caba cu sindicatonan y e pakico mester cuminsa na 2025.

 

LEAVE A REPLY

Please enter your comment!
Please enter your name here