Tin indicacion cu AZV ta contra Arubiano yiu di tera y contra AruBig pa dokternan local por traha na Aruba

2075

Tin indicacion cu AZV ta contra Arubiano yiu di tera y contra AruBig pa dokternan local 

AZV tin duda den calidad di dokternan Arubiano, di otro banda AZV ta tolera yen conflicto di interes

Ya ta for di algun dia caba cu Solo di Pueblo ta sigui riba varios medionan di prensa, entre otro den corant AMIGOE, con varios periodista Hulandes ta skirbiendo den un tono anti-Arubiano, y ta haciendo un cantidad di saltonan stranjo pa asina cuestiona, mal propaganda of rechasa e intento di Gobierno di Aruba pa asina resolve e impase exisistente, unda dokternan cu termina nan estudio na Costa Rica, por practica (traha) na Aruba.

Den un artikel skirbi den AMIGOE pa Nico van der Zee, obviamente bao influencia di e movecion “Anti-Arubiano” cu tin den AZV, a skirbi un cantidad di storia y disaprate, cu e unico obhetivo pa desacredita dokternan cu a termina nan estudio na Costa Rica.

Asina nos por a lesa hopi kehamento riba decision di Minister Dangui Oduber, kende a firma permiso pa dos dokter cu a termina na Costa Rica por traha den sala di emergencia na un Clinica na Noord.

E columnista Nico van der Zee, a lansa un avalancha di critica, insinuando tur cos malo cu por tin, mientras ta parce cu e mes no sa kico ta nifica un ‘dokter di emergencia’, kende ta haci un trabao den un situacion di emergencia, y ta referi e pacient despues na un otro dokter cu ta specialisa pa sigui duna e cuido.

E critica lansa riba dos dokter cu a termina nan estudio na Costa Rica, tin e unico obhetivo pa desacredita tur otro studiante cu a termina nan estudio na Costa Rica y pues tin un caracter di “Anti Arubiano”.

** AZV cu campanja Anti-Arubiano:
Pa sorpresa, algun dia despues, nos por a tende cu e director di AZV, Sr.Ruben Goedhoop, nombra bao di e Gobierno actual di MEP, tambe a cuminza canta e mes un cancion, di pretende cu tin hopi problema pa yega na un solucion di Aru-Big, cual lo haci posibel cu dokternan Arubiano por traha na Aruba.

Den un declaracion haci pa e director Goedhoop na NoticiaCla, e director di AZV ta pone e calidad di nos dokternan local cu a termina na Costa Rica, seriamente na duda, unda e ta cuestiona nan capacidad y nan calidad.

Hilaridad ta cu Goedhoop a bay asina leeuw, pa pretende cu actualmente Aruba tin un calidad halto di servicio medico. Un hilaridad y un chiste, pasobra ta parce cu Ruben Goedhoop mester ta biba riba otro planeta, ora cu e no sa con malo e cuido medico ta na Aruba y cuanto hende a fayece pa negligencia medico.

Su declaracion ta bisa: “Tin un cuido di cierto calidad na Aruba. Si un hende bin cu un estudio medico di otro pais, e mester ta por lo menos riba e mesun calidad of mas halto.”

Henter Aruba sa cu e cuido medico ta “total-loss”, unda tin tardansa grandi pa haya afspraak, tardansa pa pasa test, tardansa pa haya resultado, pero tambe tin un record halto di diagnostico robes, unda pacientnan ta wordo trata pa malesanan cu nan no tin.

Nos problema ta mucho mas grandi, pasobra na Aruba actualmente dokternan tin rivalidad riba otro, nan no ta comunica, nan no kier traha hunto y tampoco nan kier forma un team pa conhunto discuti problema medico di nan pacient.
Esaki nos ta yama un egoismo medico di optima forma.

Ken ta tras di e ponencianan ridiculo di Goedhoop? Ken tur den AZV ta contra Arubiano? Goedhoop a consutla su bestuur? Su bestuursleden tambe ta contra Arubiano?

*** Investigacion mester bin den AZV tambe:
Alcontrario: Ta hora pa Goedhoop lanta for di sonjo y cuminza duna pueblo cuenta riba hopi cosnan cu ta pasando den AZV, cu merece claridad. Den AZV tambe mester bini investigacion, pasobra pueblo kier sa;
– e compra di machinenan di vingerprint pa registra asegurado
– contractnan y projectonan innesecario crea den oficina di AZV pa chica placa
– contractnan cu hospital y hotelnan na Cali, Bogota, Bucaramanga, na Hulanda, Curacao y Merca
– Consultantnan paga, cuanto placa, y resultado di rapport
– Ken ta consehero di Goedhoop y cuanto placa e ta cobra?

**** Conflicto di Interes den AZV y Integridad:
Kimberly de Groot ta den servicio di Insam? Su trabao ta na Insam ta pa trata pianan diabetico? AZV ta subsidia Insam? Ta con ta posibel cu AZV e ora a duna compania di Kimberly de Groot contract pa traha sapato pa diabetico? El’a bira un concurencia pa un compania local? Esaki no ta faboritismo den optima forma?

– Otro conflicto: Donjo di botica ta president di raad van bestuur di AZV? Cu tur respet, pero con ta posibel cu un persona cu ta maneha 6 botica, y awor a cumpra tambe laboratorio, y te mes ta na cabes di AZV den raad van bestuur? No tin ningun hende cu ta mira e conflicto di interesnan aki? Kico Gobierno di Aruba ta pensa? No tin integridad mas ? No ta na su lugar pa pidi tur hende cu tin un of otro conflicto pa entrega e asiento den forma voluntario?

Dicon Director Goedhoop no ta adresa e situacionnan mediocre aki den AZV? Esaki si e ta yama como “calidad”? Esaki si e director ta aplaudi? y kier baha rabia riba docternan Arubiano, yuinan di tera? Bisando cu nan calidad ta inferior?

Di berdad tin hopi hende cu no sa con dolor e galinja a pasa pa pone e webo, dia Aruba a bira liber y haya su status aparte! Awor parce ta hopi kier come webo si !! Si nos no frena e situacionnan aki cu man duro, kico lo para di Aruba?

Ta necesario pa AZV pa aclaria nan punto di bista y e aire di descrimina contra Arubianonan, yiunan di tera !

LEAVE A REPLY

Please enter your comment!
Please enter your name here