Banco Central: Encuesta di corupcion

88

Encuesta di Corupcion

Durante di e periodo di 12 te cu 26 di november 2018, Banco Central di Aruba (BCA) lo tene bao di nos comunidad e “Encuesta di Corupcion” pa evalua e nivel percibi di corupcion na Aruba pa medio di un analisis profundo di informacion adkiri. Varios organisacion internacional manera Tranparency International ta tene regularmente encuesta riba e nivel di corupcion na varios pais. Door cu Aruba no ta forma parti di e encuestanan internacional aki, y como resultado no tin dato disponibel pa Aruba riba e tereno aki, BCA a dicidi di tene e “Encuesta di Corupcion”, uzando e mesun metodologia y preguntanan aplica door di Transparency International y tambe algun pregunta relata na Aruba su propio situacion.

E meta di e encuesta aki ta pa BCA adkiri informacion valioso tocante e experiencia y percepcion di nos ciudadanonan pa cu e nivel di corupcion y tambe riba posibel accionnan corectivo y/of medidanan efectivo pa combati e fenomeno aki. E encuesta ta inclui, entre otro, preguntanan relata na e nivel di corupcion, e experiencia cu corupcion na momento di haci uzo di servicionan particularmente den e sector publico, e experiencia ora di raporta corrupcion, y e necesidad pa medidanan adicional pa combati corupcion.

Pa yuda BCA colecta e datonan importante aki, un grupo di encuestador lo bishita diferente hogar y haci e entrevistanan den nomber di BCA. E encuestadornan aki lo haya un carnet cu e logo di BCA pa identifica nan mes. Nan tur tin e obligacion pa tene tur informacion cu nan ricibi estrictamente confidencial.

BCA ta consciente cu gran parti di e informacion aki ta sensitivo y pa e motibo aki ta enfatisa cu e encuesta ta totalmente anonimo y ta garantisa cu lo trata tur informacion obteni confidencialmente y uze solamente riba un base agrega pa metanan estadistico y analitico na BCA. BCA ta spera cu tur personanan aserca door di e encuestadornan aki pa participa den e encuesta aki lo duna nan maximo cooperacion. Si tin cualkier pregunta riba e topico aki, por tuma contacto libremente cu sra. Edwina Matos-Pereira, Manager Strategy & Planning na BCA y alabes lider di e proyecto, na tel. 5252100 of via e-mail: e.e.matos-pereira@cbaruba.org.

  1. E original na Ingles ta prevalece.

 

LEAVE A REPLY

Please enter your comment!
Please enter your name here