Cancelacion temporal di Barconan crucero drentando cerca APA

0
329

Aruba Ports Authority N.V. (APA) a ricibi informacion oficial cu companianan crucero cu ta sali for di Merca voluntariamente ta suspende tur biahenan temporalmente riba peticion di Presidente Mericano Donald Trump. Lamentablemente esaki lo tin un impacto grandi pa APA y Aruba.

For di diabierna e notificacion oficial di cancelacionan a cuminsa drenta na APA y ta premira den curso di comienso di siman cu e otronan lo sigui drenta, entre nan Carnival, Royal Caribbean, Norwegian y MSC. E duracion di e suspension di nan operacion ta varia entre 30 pa 60 dia te awor y ta spera cu esaki por reanuda mas pronto cu ta posibel.

Minister Dangui Oduber den un comentario duna a bisa “esaki ta un golpi fuerte y duro pa nos turismo pero nos por compronde perfectamente e decision aki. Nos economia ta wordo paraliza! Salud di nos hendenan ta bin na prome luga y p’esey tin comprension pa un decision asina aki.”

Pa Aruba esaki ta nifica cancelacion di varios bishita, sigur mas cu mita di e barconan cu ta yega Aruba ta di e tres companianan ya menciona. Gerencia di APA tambe tin comprension pa e medida aki tuma y ta reuniendo internamente y cu partnernan strategico riba e situacion.

Pa loke ta otro medidanan, den forma diario ta atende cu e tema di coronavirus, tanto cu su empleadonan como cu partnernan di e sector aki. Ta haciendo tur cos segun protocol di DVG y WHO pa sigura cu ta limita presencia di coronavirus na Aruba.

Gerencia ta dunando apoyo na tur medidanan tuma door di Gobierno pa sigura e bienestar di nos isla y tambe ta elogia tur departamento y instancianan cu ta trahando duro dia y nochi pa contene e virus aki. Manera minister Oduber a bisa “e crisis aki ta uno dificil cu nos tur hunto como pais mester bay deal cun’e. Ban nos tur yuda otro, ban cuida otro y ban mustra nos convivencia pa por sali di e crisis aki mas pronto cu ta posibel,” Marc Figaroa, Managing Director di APA a comenta.

 

LEAVE A REPLY

Please enter your comment!
Please enter your name here