Decision di Minister ta crea no solamente uno, pero varios precedencia riba asunto di permiso

656

E decision di Minister Andin Bikker pa loke ta trata e caso di e coach deportivo, ta crea no uno, pero varios precedencia.

Minister Andin Bikker a sali dialuna mainta pa asina defende su decision pa laga un coach di gymastiek den libertad, pa asina e por warda riba su prome permiso aki na Aruba, esta por mientras Dimas ta fix su permiso.

Esaki mas cu claro ta un decision hopi pisa cu a wordo tuma,  pasobra awor hopi otro lo bay cuminza haci apelacion riba e mes un trato aki,  mientras cu tur abogado a manda pidi detayes di e asunto aki pa nan por tin como referencia den posibel casonan na corte.

Precedencia 1:   Gara na pia di trabao eherciendo pleno trabao! Loke nos leynan y maneho ta bisa ta cu un persona cu pidi un permiso, lo mester warda esaki pafor di Aruba.  Si encaso e warda esaki na Aruba mes,  e lo mester pidi un dispensacion na Minister.  Pero loke ta mas grave ta cu e coach deportivo aki a wordo gara na pia di trabao den pleno les.

Precedencia 2: Carta di buena conducta!
Un otro precedencia cu a wordo crea, ta e hecho cu e coach deportivo no por a entrega un carta di buena conducta,  debi na problemanan na Venezuela.  Sinembargo awor el’a haye y como tal ta dune un second chance pe fix su permiso.
Con a para awor cu e cientos di Venezolano cu nan permiso a wordo nenga, mescos cu e coach, debi na carta di buena conducta?   Lo duna nan second chance?  Of nan mester pidiele via abogado?

Segun Minister Bikker cu su decision lo no por crea precedencia, basando su mes riba e ‘toelatingsbeleid’ di Maart 2017, cual riba pagina 35 y 36 tin un capitulo special pa sport coach.    Den e documento aki,  na ningun caminda nos por a lesa cu entodo caso un sport coach lo por drenta como turista y dalbay y cuminza haci su trabao, sin permiso.

Di otro banda por tin tur sorto di comprencion pa e club y su miembronan, kendenan a haci tur loke ta den nan alacanse,  hibando poco mucha chikito pa protesta dilanti cede di Gobierno, pa asina tene nan coach na Aruba!   Pero di otro banda,  nan mester por sa tambe cu te propio dirigentenan di e club a faya, hasiendo cu e situacion a yega asina leeuw.

Minsiter Bikker a splica cu el’a pone tur cos den balanse,  tambe loke un huez lo por dicta den e e caso aki,  y a dicidi pa un salida comodo na favor di e coach.

Cu otro palabra, a perdone cu e tabata traha estando un turista, y a dune un segundo disculpa cu e por entrega su papelnan laat.

Awor ta pa sinta spera, si cualke momento por presenta cualke demanda contra gobierno, basa riba trato igual.

LEAVE A REPLY

Please enter your comment!
Please enter your name here