Director di Laboratorio di Hospital acusa pa fraude estafa y corupcion haci cu testnan di pacient

8424

E ultimo anjanan na Aruba, e denuncianan publico ta keda sali regularmente riba actonan di fraude, estafa y corupcion.  Awor ta Laboratorio di Hospital di Aruba ta bao lus, pa kehonan publico cu a keda emiti den nan contra.  Director di Laboratorio di Hospital, un Hulandes(Europeo) a lanta un propio laboratorio na su cas na Hulanda y eynan ta manda haci test. 

Den e reciente columna di Nico van der Zee publica den corant Amigoe,  e columnista a lansa un keho publico cu contenido hopi pisa riba Laboratorio di Hospital.

Segun e informe,  cu ya pa dos anja Laboratorio di Hospital tin un director Hulandes-Europeo, cu aparentemente no ta dispone di un permiso legal di Dimas pa por eherce su trabao.  Su esposa no a bin biba na Aruba, pero a keda biba na nan cas na Hulanda.

E director aki a haya un nombracion pa un periodo cortico di dos anja, como tal e ta cobrando un salario hopi halto y hopi comodo.

Director a lanta propio compania na Hulanda riba su adres:
Riba 1e di September 2018, esposa di e director a crea un propio compania di laboratorio y a registra esaki riba su propio adres di cas na Hulanda, cual ta un “woonhuis”.  Ta trata di CR LAB SERVICES na Delft.

CR LAB SERVIES:
E trabao di CR LAB SERVICES ta cu e ta haya testnan for di Laboratario di Hospital, pa despues e manda esakinan dor na otro laborario na Hulanda. Despues e resultado ta wordo manda Aruba.  Mas cu claro, e servicionan aki lo no a bay gratis. Segun Amigoe,  aki ta trata di PAP-test cu ta un test cu hende muher ta pasa pa controla precencia di celnan canceroso.     E resultadonan di e test aki ta tarda hopi, cual por dura entre 3 cu 4 siman, pero cu den realidad ta tardando hopi mas.

NO POR HAYA PRUEBA CU E TESTNAN TA WORDO MANDA HULANDA: 
E corant ta sigui cuestiona e asunto, unda cu facturanan for di Delft tabata yega Aruba y lo no por tin duda cu esakinan ta wordo paga tambe.  Pero, kico ta pasa cu e test cu e hende muhernan ta haci?   Esakinan a yega Hulanda?  Di esaki no tin prueba segun e corant.

TESTNAN TA KEDA ARUBA Y POSIBLEMENTE TA WORDO ANALISA PA UN ARUBIANO NA SU CAS: 
Mas pio ainda, e corant ta acusa cu e testnan aki ta keda Aruba y un colega di laboratorio ta hibanan su cas, unda na cas e ta analisa e testnan aki. For di su ora di trabao, e ta usa equiponan di laboratorio di hospital, pa asina scan y analisa e testnan.

Na rais di e acusacionnan pisa aki di Corant Amigoe,  ta nace hopi pregunta:
– Director y gerencia di hospital di Aruba ta na altura di e practicanan aki?
– Con y ken ta bay investiga e acusacion grave aki di corpcion, fraude y estafa?
– Hospital y of AZV, ta bay directamente polis pa entrega un keho y laga husticia investiga e acusacion?
– Cuanto placa e director di laboratorio a paga su propio compania?

SOLO DI PUEBLO ta spera cu e caso aki wordo aclaria te den profundidad.  Nos a bin comronde cu DIADOMINGO mainta,  gerencia di hospital a core yama un reunion extra ordinario, unda nan a apunta e compania Grand Thorton pa haci un investigacion. Sinembargo Grand Thorton ta un compania cu tin laso cu hospital unda lo a prefera pa laga un compania INDEPENDIENTE haci e investigacion como tambe un keho na polis no por wordo exclui.

Den e registro di Camara di Comercio na Aruba, e siguiente personanan ta aparece como miembro di bestuur,  entre nan nos por mira nomber di Directora di Belasting, Sra. Luenne Gomez- Pieters. E miembronan di bestuur di laboratorio ta: EMILE WESTSTRATE, EDWIN TROMP, LUENNE GOMEZ-PIETERS, ELGIN RYAN ZEPPENFELDT, MARCO VAN DEN BURG, EZZARD MANUEL CILIÉ, GINO GOELOE.

Reaccion di AZV:   SOLO a tene contacto cu un dirigente di AZV,  kende a informa nos cu nan ta completamente na altura di kico ta pasando y e management di AZV ta “riba dje”, siguiendo e desaroyo.

Mas cu claro cu Minister di Salubridad Publico tambe lo mester expresa su mes riba e caso serio aki.

 

 

 

 

LEAVE A REPLY

Please enter your comment!
Please enter your name here