Director di Lotto, Distefano Wernet, suspendi bao sospecho di mal maneho y malversacion

2643

Director di Lotto, Distefano Wernet a haya un orden di prohibicion pa drenta e oficinanan di Lotto pa Deporte, bao sospecho di a hiba mal maneho y malversa fondonan di Lotto.

E desicion aki a wordo tuma pa e propio bestuur poni pa AVP cu keto bay ta na poder den Lotto.

Tin entendi cu cuentanan di Lotto no ta klopt,  como tambe tin hopi gastonan cu ta wordo haci cu no por wordo hustifica.  Tin trabaonan cu ta wordo haci unda ta wordo cobra apart pe, cual tambe ta impugna cu bon gobernacion.

Distefano Wernet a wordo poni na Lotto pa Mike De Meza, pa cual ela ocupa e posicion di presidente di bestuur y despues cu a cambia e structura di Lotto, el’a ocupa e funccion di director di Lotto pa Deporte.

Durant su encargo cu Lotto, semper tabatin alegacionnan for di den Lotto, cu Distefano ta man los cu placa y tur su gastonan personal ta wordo declara,  manera tur drinks na Chines ta wordo geboek den administracion di Lotto como ‘reunion’.

E desicion pa suspende Distefano mas cu claro ta uno masha dificil pa e bestuur actual, kende tur tempo a acusa tur otro di a hiba mal maneho y awor nan mes  ta sinta riba batata cayente.

No ta descarta cu awor cu e informe aki bira publico,  henter e bestuur cu a faya lo por entrega nan retiro, un tras di otro y entrega Lotto bek na Gobierno.

 

 

LEAVE A REPLY

Please enter your comment!
Please enter your name here