Durante di e ultimo dos ruedanan di prensa, por a scucha Premier Wever Croes informa cu e ultimo dos casonan, #8 y #9 ta casonan di contagio local.  Ta trata di dos persona cu no a viaha den e ultimo temponan aki, pero a test positivo pa Covid-19.

Por a nota un grado di precupacion ora ta referi na e dos clasificacionnan, esta caso importa y caso local. Dicon?   Kico ta haci cu e casonan local ta mira cu como grave?

E dos casonan local aki, ta bisa nos cu e transmicion a cuminza den nos comunidad. Un persona por infecta hopi otro pasobra e ta keda bay manera un cadena. Segun e promedio, cada persona ta contagia entre 2 cu 3 persona.

Pero na ki momento esaki bira un punto di precupacion?  Segun un experto a splica SOLO, cu ora cu e cantidad di caso surpasa di 4 pa 5, ta calcula cu e probabilidad cu tin un brote, ta alcansa 60% di probabilidad.

Pues un caso local ta bisa nos cu tin transmicion den nos comunidad. Den caso asina lo mester busca e caso cu a origina e contagio pa asina sigui e cadena di traceback su contactonan. Na momento cu ta indentificando su contactonan, ta keda monitorea e cadena y asina tin e contagio controla.   Tin un otro precupacion: Den caso cu no por encontra e caso cu a origina e contagio, esey kemen cu tin un otro cadena cu no ta bao control y cu por ta contagiando otro/mas persona.

Pesey mes, den e dianan nos dilanti,  si e casonan di contagio local aumenta, y si e surpasa di 5 caso, kisas 10 caso,  no por descarta cu lo bini rapidamente cu mas medida, pa asina purba frena e brote totalmente y pa indentifica e personanan.

Con ta frena e brote?  Dor di pone un toque de queda pa 24 ora pa algun dia, unda cu personanan ta distancia obligatoriamente pa asina por controla y frena e contagio. Dor di frenta e brote, bo ta duna espacio tambe na e capacidad medico pa brinda atencion na tur e casonan cu mester di atecion.

E mensahe cu SOLO DI PUEBLO ta manda awe ta pa nos proteha nos grandinan. Cuidanan y cada ves cu bo yega serca bo famia,  laba man lo mas tanto posibel pa asina preveni cu nos grandinan wordo contagia.

Coronavirus ta serio.  E ta causa morto!  E no ta pordona!   

 

 

 

LEAVE A REPLY

Please enter your comment!
Please enter your name here