Gremio comercial:

Poco ta wordo haci pa mantene negoshinan cu cabes riba awa

Gremio comercial consistiendo di entre otro ATIA, Camara di Comercio, AHATA, CUA, ACBA, ATSA y WAB, no a keda mucho contento cu e nota di cambio cu a tuma luga riba e presupuesto di 2020, bisando cu despues di a tuma nota di e cambio riba e presupuesto den cuadro cu e decisionnan haci na e crisis di coronavirus.

Segun e gremio den un carta manda pa gobierno, ta haciendo poco pa mantene e diferente negoshinan mas tanto cu cabes riba awa y mas tanto hende posibel na trabao den un futuro cercano.

E carta ta sigui bisa: “Ta esencial cu e decisionnan cu wordo tuma awo, ta permiti pa Aruba recupera lo mas rapido posibel despues cu e crisis disminui, manera cu ta sosodiendo den otro pais.

E plan presenta actualmente pa e gobierno ta inaceptabel y ta pone e posibilidad di recuperacion di Aruba den un grave peliger.

Segun S&P Global, Aruba ta wordo considera e pais number 1 di mundo cu ta economicamente mas vulnerabel na e crisis di COVID.

Gobierno mester tuma na cuenta cu comercio ta crea actividad economico y ta e unico fuente di ingreso pa e pais.

Na e momentonan aki, ta imperativo pa establece solucionnan pa hiba na inversion y actividad economico pa e comunidad lo mas rapido posibel.

Cu tal actividad lo bay tin reempleo.

1. E pakete di estimulo pa e comunidad empresarial di PYME ta wordo calcula na 40 miyon di florin.

Esaki ni sikiera ta e 20% di e cantidad calcula pa FASE y no ta suficiente. E representantenan di sector priva a propone, riba e peticion di gobierno, varios medida pa retene e fluho di efectivo pa e empresanan y no a mira ningun di e recomendacionnan refleha den e nota di cambio.

2. No tin detaye menciona den e nota di cambio riba e contenido di e pakete di estimulo.

3. E costonan adicional di ekiponan medico y sesionnan di informacion di 2 miyon di florin parce di ta subestima, a menos ki parti di e gastonan inclui den e aumento di e presupuesto di AZV di 250 miyon di florin.

4. No ta menciona medidanan pa reduci e costonan di personal di e sector publico. Manera e propio prome minister a menciona den varios ocasion, e crisis di COVID-19 ta afecta nos tur y e carga mester wordo hiba pa tur.

Comercio ta ripiti e posibel medidanan cu por wordo tuma na cuenta pa elimina:

a. Bashi Premie

b. Voorjaarspremie

c. Najaarspremie

d. El salario aumenta

e. Overbruggingstoelage

f. AZV +

g. Ter beschikking toelage

h. Cambia e sistema di pensioen pa e sistema di contribucion defini

i. Reduccion significativo di e salarionan y/of aplica e reglanan di “no work, no pay.”

Dicho disminucion di costo lo reparti e carga entre e empleadonan di e sector priva y e sector publico y no lo impone e carga unicamente riba e empleadonan di e comunidad empresarial.

E crisis COVID ta diferente na cualkier otro cu mundo a enfrenta. Comercio a sa di demostra di ta dispuesto pa traha cu gobierno di Aruba pa limita e efectonan di largo plazo y desastroso di e virus aki den nos economia y e bienestar di e comunidad.

Desafortunadamente, gobierno a tuma decisionnan un biaha mas unilateral y no a considera e aporte di e sector priva ni a inclui nan den ningun di e discusionnan di siguimento cu respecto na e medida y e ayudo necesario.

E nota di cambio ta indica cu Gobierno di Aruba no ta compronde e impacto grave di e crisis aki den nos economia y gremio comercial ta pidi un biaha mas pa acepta e mano extendi di e gruponan di sector priva pa yuda na logra e maximo capacidad di recuperacion di nos isla,” e carta ta termina.

 

LEAVE A REPLY

Please enter your comment!
Please enter your name here