Luna di Oktober ta bon pa para keto un rato y reflexiona ariba e importancia pa realiza bo mamografia

49

Minister Dangui Oduber ta informa riba e tematica di cancer di pecho:

Luna di Oktober ta bon pa para keto un rato y reflexiona ariba e importancia pa realiza bo mamografia

 

 

Luna di Oktober ta e luna caminda internacionalmente ta conscientiza mundo henter ariba e maleza di cancer di pecho.

 

Estadistica na Aruba realiza ta indica cu e edad promedio na Aruba di hende muher diagnostica cu cancer di pecho ta 59 aña. Na paisnan den Latino America mescos cu otro paisnan rond di mundo e ‘Gold standard’ pa metodo di deteccion di cancer di pecho ta “mamografia”. Aunke cu Saminacion Personal di Pecho ta importante pa haci pa si acaso bo ta sinti iregularidad, expertonan riba e tema aki ta coincidi cu ‘Saminacion Personal di Pecho’ (breast self-examination) no ta suficiente. Pa motibo aki, ta motiva hende muher na Aruba riba 45 aña pa realiza mamografia cada 2 aña.

 

Cancer di pecho cerca hende homber

Menos di 1% di tur tipo di cancer di pecho ta desaroya den hende homber, esaki ta sgnifica cu na Aruba tambe tin e posibilidad pa hende homber wordo diagnostica cu cancer di pecho.

 

Mamografia

Uso di mamografia a cuminsa desde decada di 1960 cu e meta pa detecta cancer di pecho prome cu e ta clinicamente evidente, den un stadio trempan, mas chikito pa asina mehora e pronostico y e sobrevivencia di e pacientenan cu tin e tipo di cancer aki, algo cu ta mas dificil cu ultra sonido. Ta conoci cu diferente cambio y estudio a tuma y ta tumando lugar pa mehora e metodo di deteccion, por ehempel a reduci e cantidad di rayo emiti atraves di un mamografia. Ta busca metodonan pa baha e presion di mamografia, manteniendo e calidad. Hasta con pa mehora e tecnica di ultra sonido, con pa realiza esaki di un forma mas independiente di e profesional cu ta realize, pa e ta reproducibel y igual pa asina por wordo considera manera un forma di screening. Mamografia ta e ‘gold standard’ pa deteccion di cancer di pecho. Ta importante pa menciona cu esaki ta e metodo tambe cu lo keda wordo usa teniendo cuenta naturalmente cu tecnologianan nobo manera ultra sonido.

 

Stichting BOB Aruba

Desde Oktober 2012 Stichting BOB Aruba a wordo funda cu meta pa crea un programa structura pa detecta cancer di pecho na tempo, pa asina percura pa un mihor calidad di bida di nos pacientenan, debi cu nos hendenan no tabata screen na tempo, y tabata busca cuido medico ora e cancer a avanza y tabata laat. Stichting BOB Aruba ta realiza screening na persona entre 45-75 aña, e screening aki ta wordo realiza cada 2 aña. E rango di edad y repeticion di screen ta basa riba datonan di Aruba mes (2010), unda diferente instancia gubernamental y no gubernamental a forma parti. Stichting BOB Aruba ta semper pendiente di cambionan, actualizacionan di detection riba cancer di pecho rond di mundo cu ta cientificamente comproba. E cantidad di hende muher cu ta realiza screening na Aruba no ta halto, nos tin mas di 22.000 hende muher den edad di 45-75 aña, unda casi 40% so a realiza mamografia e aña aki.

 

Minister Dangui Oduber ta conseha pa tur hende muher y hende homber di tur edad cu sinti of ripara algun abnormalidad na pecho, pa acudi cerca nan dokter di cas. E dokter di cas lo realisa un examen fisico (clinico) unda abase di locual dokter detecta lo determina si mester realiza un ultra sonido, mamografia etc. Na hende muher entre 45-75 aña, tene bo salud na prome lugar, realiza bo mamografia cerca stichting BOB Aruba cada 2 aña. Screening na tempo, ta e unico manera cu nos por salba bida.

 

LEAVE A REPLY

Please enter your comment!
Please enter your name here