No tin prueba pa condena homber acusado di prepara 357 kilo di cocaina pa wordo exporta

168

ORANJESTAD – Diabierna mainta Corte a dicta sentencia den un caso di droga den cual e homber RS a wordo acusa di a viola ley di droga y tabata envolvi den preparacion y transporte di mas cu 300 kilo di cocaina pa Antwerpen, Belgica. Na final el a sali liber ya cu e caso tabata basa hopi riba indicacion y nada di prueba convincente.

E ta un caso cu a tuma luga aña pasa despues cu a haya informacion cu tin 5 container den preparacion pa wordo manda Europa y den cual lo tin un cantidad basta grandi di droga. A cuminsa vigila e container y e personanan menciona den e caso aki. A tap combersacionnan telefonico, cualnan a resulta awo cu no tabatin nada cu ta mustra cu e hendenan tabata papiando den codigo, lenguahe usa ora cu ta trata asuntonan di droga.

Durante e caso e acusado aki e desmenti categoricamente di tin algo di haber cu e caso aki. E otro persona deteni, di faam K y kende ta doño di e compania di transporte, a wordo interoga y despues laga den libertad. E pregunta ta surgi si autoridadnan a actua demasiado lihe riba e tip ricibi.

E hecho ta cu despues di ricibi e tip a sigui e persona y a resulta cu ta dos container so tabata den preparacion pa wordo manda prome. Unabes cu e containernan a wordo manda Barcadera, a confisca esakinan. Na Marinierskazerne a tene e control necesaro y asina a bin haya portanan di baki di pickup den cual a haya un cantidad grandi di “bloki” y den esaki e droga tabata scondi.

Den e caso aki a interoga e dos funcionarionan di Aduana cu a tene e vigilancia durante cargamento di e container, cu a wordo inspecciona ora cu e tabata bashi, hunto cu e dos cachonan anti-droga. Nan no a mira e portanan en cuestion durante cargamento.

E acusado den e caso aki mes, esta RS, a nenga di duna declaracion na Polis y te den Corte el a bin duna un declaracion unda cu el a nenga categoricamente e acusacionnan contra dje. El a tira tur culpa riba doño di e compania di transporte, pa kende e ta bisa e tabata traha. E ta nenga di e material ta di dje den e container, recibo cu el a wordo haya cun’e ta di Krozendijk e ta bisa. Sinembargo Krozendijk a wordo laga liber despues di keda deteni pa algun dia.

E pregunta di Corte tabata na ki momento a hinca e portanan di baki di pick-up den e container, pasobra funcionarionan di Aduana ta bisa cu na momento cu nan tabata presente esey no a sosode. E acusado mes ta bisa cu ora di carga e cosnan aki e no a mira e portanan di baki di pickup. E containernan tabata poni riba un tereno cu tin un porta cu ta wordo gelock y cu e no tin e yabi. E persona cu tin e yabi no a wordo interoga tampoco. Ni esun pa kende e tereno a wordo gehuur.

Pues hopi incertidumbre pa cual Corte a haya su mes obliga di declara e homber aki liber di tur e acusacionnan y pa cual e por a bay cas ayera mes.

LEAVE A REPLY

Please enter your comment!
Please enter your name here