Tono di CAFT a cambia y ta pone Gobierno bao precion pa baha gasto di personal cu 14.2 miyon florin prome cu December 2018

1017

Tin tension entre CAFT y Gobierno di Aruba,  segun Minister Xiomara Maduro a informa dialuna.

E kamber di control CAFT parce a cambia di tono den nan reciente carta di 8 di November 2018, pa un tono hopi fuerte.   Maske cu e carta no a bira publico ainda, Gobierno di Aruba a divulga e contenido di e carta aki.

Na dado momento Xiomara Maduro a bisa cu CAFT kier bin choca hende awor, siendo cu den e añanan di Mike Eman nan a keda poeslief.

Kico te problema?

CAFT kier exigi di Minister di finansas pa nan tene nan mes na afspraken haci riba un plan FEM, unda ta relata e bahada di gasto.

Pesey mes CAFT kier pa Gobierno tuma e medida awor, pa prome cu December 2018,  reduci gasto di personal cu 14.2 miyon florin.

Minister Maduro ta yama e presion aki di CAFT pa uno irrealistico cu no ta alcansabel y ta bisa cu CAFT kier bin sinta den stoel di minister.

Tambe CAFT tin critica riba e fondo di crisis social, unda Gobierno a pone e placa aki den un fondo apart,  pa cual segun CAFT,  esaki ta trece intrasparencia.

Un tercer punto ta cu tur entrada adicional cu bini,  no mag di bay pa e gastonan di gobierno, pero mester bay direct pa baha e debe.

Riba tur tres di e puntonan aki, Gobierno tin un otro opinion y lo no ta pensa di complace cu CAFT.

Pues pa awor por bisa cu e carta di 8 di November 2018 ta lanta e tensionnan entre CAFT y Minister di Finansas, y mirando e tono di e minister,  nos por papia te hasta kisas di un posibel impase entre CAFT y pais Aruba.

Dentro di algun hora mas e carta di CAFT lo bira publico unda lo por lesa mas di e presion,  loke Xiomara Maduro a yama “choca hende”.

 

LEAVE A REPLY

Please enter your comment!
Please enter your name here