Den luna di november nos ta celebra y para un rato keto riba e dia di Internacional di Derecho di Mucha y Hoben na nos isla di Aruba. Sector di Enseñansa sigur ta uno sumamente importante pa enfoca riba netamente Articulo 19 den e Tratado Internacional di Derechonan di Mucha, cu ta enfoca riba nos Codigo di Proteccion, cu ta representa un bida di tranquilidad y siguridad.

Kico esaki berdaderamente ta significa? Den e cuadro aki lider di Sector di Enseñansa pa Codigo di Proteccion, sra. Jullie-Ann Thodé, ta desea di comparti su logro- y retonan relaciona cu e trabou cu e ta bin ta eherciendo. Esaki ta encera brinda e conocemento necesario, pero tambe aporta na un plan di implementacion y maneho duradero relaciona cu ley di Codigo di Proteccion, Articulo 243 den BW1.

Tin 12 directiva di scol na Aruba, cu ya ricibi e informacion riba e contenido di Codigo di Proteccion. Tin dos directiva di scol cu ya tin un concepto di Protocol di Codigo di Proteccion, caminda ta delinea concretamente, con e scol(nan) ta bay atende y cana e proceso di e 5 pasonan menciona den e Decreto Nacional aki. Tambe a logra un concepto di Protocol di Codigo di Proteccion na un di e aliadonan di mas importante den sistema di scol, cu ta Bureau Leerplicht. Nos a bin ta constata cu aunke e ley aki, tabata tin otro expectiva, ta logra convence e veld di con importante ta pa tin un aporte responsabel den siguridad di nos mucha- y hobennan di Aruba. Pa ley cuido y proteccion di nos mucha- y hobennan den su totalidad ta responsibilidad primordial di e mayornan of esnan responsabel. Pero no ta tur ora esaki ta e caso manera ta desea of mester ta. Ta p’esey nos ta boga pa yuda duna y sostene nos profesionalnan, cu ta traha directo of indirecto cu mucha y hoben, ekipando nan cu conocimento y e habilidadnan pa por ta un ayudo y protector den un situacion di posibel peliger.


Pa cu e sector di enseñansa e trayecto aki, no ta cana lihe, pero si tin su logronan bunita, conreto y duradero. Por ehempel, parti di un team di maestronan di scol Protestant, a logra ricibi e presentacion y esaki a bay sumamente positivo. Tambe durante ‘onderwijsdag online’, di e scolnan Catolico a logra haya un acohida di por lo menos 100 of mas maestro, cu a ricibi e informacion di Codigo di Proteccion, unda e comentarionan di e maestronan tabata uno positivo.
Un di retonan di mas grandi cu ta biba den e proceso di enseñansa ta tempo. Tempo ta un factor masha balioso pa tene na cuenta, pero mas bunita pa experencia como lider di proyecto, ta pa mira sigur un actitud positive y comprometi riba e contenido di ley aki. Por ultimo como lider di sector di Enseñansa, Jullie-Ann Thodé ta desea di extende un palabra di pabien na cada un di nos mucha- y hobennan di Aruba riba nan dia di Derecho di Mucha.

LEAVE A REPLY

Please enter your comment!
Please enter your name here