Recientemente corte di ‘ambtenaren-zaken’ a trata un caso, cu a atacha e integridad di un douanero femenino, ora e dama a presta su mes pa acudi na un negoshi, durante su dianan di ‘ao’, pa ‘vrijmaak’ (habri) un container, pa por a baha carga, siendo cu dicho negoshi ta riba lista di ‘negoshi peligroso’ di Aduana.

E douanero femenina a wordo geschors di trabao na Maart 2019, ora su superiornan a bin deacubri loke el’a haci.

A bay habri container:

Tabata dia 14 di Febuari 2019, cu un douanero femenino, cu tabatin 10 dia malo na cas, tabata yama su coleganan (for di cas), pidiendo un fabor pa nan acudi na un negoshi pa habri un container, entre 1or cu 2or di merdia.

El’a pidi un colega pe fabor, pero e colega a nenga, pa cual e dama a bisa ‘laga para’, pasobra e lo contact otro colega.

Sinembargo a bin sali na cla, cu riba mes un dia ey, e douanera femenino den su ‘ao’ mes a acudi na e negoshi pa 1.30 merdia y a keda comproba a base di testigonan y declaracionnan haci, cu e mes a duna ordo pa habri e container. Un empleado di dicho negoshi a confirma cu e douanera femenino mes a bini pa habri e container.

Amigo tabatin carga den e container y tabata pura pa haya su carga:

Un colega di aduana a declara: “El’a yamami pa bay habri e container, pasobra cu su amigo tin carga den dicho container, pa cual e amigo tin hopi pura pa haya e carga”.

Leiding di Aduana a bisa, cu loke a sosode no ta corecto, peor ora cu dicho cliente ta riba lista cora di Aduana, o sea categorisa como un ‘cliente di peliger”.

E douanero femenina aki a wordo suspendi y despues dia 27 October 2020 a wordo duna un straf disciplinario di retiro condicional, cu dos aña di prueba, esta si e hasi algo malo atrobe den dos aña e’lo wordo retira per direct.

Douanero femenino no kier accepta culpa:

E douanera a bringa e desicion aki di 27 di October 2020 y ta opone e straf aki di retiro condicional. Huez a dicta den su contra pa cual el’a perde na corte. E straf imponi dor di Aduana ta corecto y ta keda valido.

Huez tabata hopi fuerte contra e dama. Bo tin un funccion unda bo mester duna ehempel y loke a sosode aki, ba crea un desconfiansa, kibra confiansa, y atacha integridad di Aduana.

Cuerpo di Aduana a bisa cu tur loke a sosode aki, a bay contra di tur procedura di Aduana y a keda comproba cu e Douanera femenina no a comporta su mes como un bon ambtenaar. E trabao ta rekeri integridad y profesionalismo, y e castigo duna dor di Cuerpo no ta desproprtional.

Gañamento:

Mas leu e douanera femenina a gaña cu ta su superior a mande na dicho compania pa busca papel, cual a bin sali na cla cu su storia no ta cuadra, pasobra su hefe nunca a pidiele prome cu 14 di febuari 2019, pero te na Maart 2019 a pidiel’e pe organisa su documentonan.

Empleadonan di dicho compania tambe a wordo interoga y nan a confirma cu e douanero femenino a yega den su auto priva, bisti na burger, staciona banda di container. E no a baha di auto. For di auto mes el’a autorisa pa ‘vrijmaak’, esta pa habri e container. Despues di 30 minuut el’a bandona e tereno di Cliente.

E delito aki ta uno grave, ya cu Douane tin un sistema oficial cu ta regla douaneronan pa habri container. Den e caso aki, e douanero encuestion a bypass e procedura oficial y e mes via cas tabata tin contacto cu e cliente y tabata organisa pa habri e container.

Huez a baha pisa riba e Douanero femenina, indicando cu el’a atacha integridad di douaneambtenaar y cu su funccion mester ta uno di duna ehenpel. Tambe huez no a haya necesario pa bay wak camera, maske no tin grabacion di camera, pasobra huez a haya suficientemente proba, cu dor cu e douane femenino kier a yuda su amigo pa haya e carga liher, y ora cu su colega a nenge di bay habri e container, e mes a acudi y precisamente na e horario cu tabata desea pa habri e container ey.

A dicta den su contra unda cu e straf diciplinario cu el’a haya, esta retiro condicional pa dos aña ta keda valido.

Finalemente e Doaunero a scapa y ta keda na trabao, y si e bolbe hasi algo entre 27 oct 2020 cu 27 October 2022, e lo perde su trabao.

E foto usa aki ta ilustrativo.

LEAVE A REPLY

Please enter your comment!
Please enter your name here