Ex Parlamentario gara den apartamento burachi cu full su ploeg di Polis y awor e ta bisa di tin simptoma di Covid-19

0
39131

Diahuebs marduga asistencia di polis a wordo pidi pa desordo na un cas of apartamento na Noord. Tabatin un fiesta tumando lugar na e sitio. Ora cu polisnan a presenta na Altovista, pa sorpresa a bin topa cu nan propio coleganan polis, di seccion Oranjestad, kendenan tabata den un happy hour formal. Patruya cu a acudi pa e asistencia a bay den shock!

Por a observa cu nan tabata hopi intoxica, cual ta mustra cu nan tin horas den e fiesta. Aparentemente nan a start un paranda despues di trabao cu a sea a cuminza of a bay termina den e apartamento of cas na Noord.

A bin resulta cu ta trata di e ploeg di ex parlamentario di AVP, Clarisca Velasquez, cu actualmente ta trahando na post di Oranjestad.

Clarisca tabata cu varios di su coleganan, unda te hasta algun stagaire tabata presente den e happy hour.

Mas cu claro, e informe aki mesora a yega na autoridad mas halto, cu no por a spera esaki di un grupo di polis, cu netamente mester evita samenscholing, y mester promove distancia social. Samenscholingsverbod ta un ley actualmente.

Durante cu a atende cu e grupo di polis intoxica, autoridad a bay over tambe na tuma den beslag e arma reglamentario di Velasquez. Esaki no a bay sin tension, unda cu tabatin gritonan y zundramento.

Mas lew SOLO a bin compronde, cu e ploeg aki mester subi warda pa 8.or di mainta. Den gang di warda di Oranjestad diahuebs mainta, a reina un silencio, debi cu practicamente tur den e ploeg a meld ziek. Nan tabata asina intoxica, cu dificilmente por a presenta na trabao y un pa un a yama meld ziek. No por a spera otro.

Clarisca a meld ziek, indicando cu e tin simptoma di covid-19:
E situacion a empeora, ora cu diahuebs mainta, Clarisca tambe a yama pa meld ziek, indicando cu e tin simptoma di coronavirus y e no por acudi na trabao. Kisas el’a haci esaki inconcientemente pa crea un smoesje, lubidando cu no por haci wega cu coronavirus.

Esaki ta haci awor cu tur polis na warda di Oranjestad, obligatoriamente mester bay pasa test, y/of bay den cuarentena, pendiente e resultado di Clarisca.

Riba dje, e ex-parlamentario a dicidi cu e no ta bay pasa test di coronavirus awe, pero e’la dicidi cu e ta bay pasa e test dialuna venidero. Ta comprendibel cu den su estado actual, dificilmente e lo kier acudi na dokter. P’e dicidi riba su mes pa acudi dialuna ta casi imposibel, pasobra ora bo tin simptoma, bo ta obliga na bay pasa test mesora, peor si bo ta polis, segun protocol estableci den e ley di maneho di e crisis.

Ta di lamenta cu un situacion asina grave ta presenta den warda di polis na Oranjestad, unda KPA ta man na cabes awor pa mira con ta bay saca polis di otro warda pa asina manda Oranjestad. Nos fuente a informa nos cu e warda di Oranjestad a lanta keto awe.

Tambe decision mester cay, kico ta bay haci, riba e melding di Clarisca, esta cu e tin simptoma di covid, y tur e dianan aki e tabata presenta na trabao y henter marduga cu su ploeg.

LEAVE A REPLY

Please enter your comment!
Please enter your name here