Fiesta a termina den drama; Amiga maltrata door di mama di su propio amiga

0
30447

Un celebracion di cumpleaños a termina den drama pa Micheline, kende a bira victima di un maltrato serio na Savaneta. Tabata diaranzon dia 20 di mei 2020 cu e victima Micheline a acudi na un fiesta na Savaneta pa celebra cumpleaños di su propio amiga Brigitte. Un cas a wordo gehuur pa asina tene e celebracion aki. Micheline mes a prepara snacks pa asina hiba fiesta sin nunca por a imagina cu e anochi lo termina den un drama pa su persona.

Manera tur fiesta, e celebracion a cuminza cu bon ambiente. Den un grupo di mas o menos 10 hende na e cas gehuur cu picina, durante varios ora nan a diverti nan mes y hasta haci wega. Na final di anochi e cos a converti den un drama.

Segun e victima, na un dado momento el’a indica cu e kier bay su cas. E no kier keda mas na e cas na Savaneta. Esaki no a cay den bon tera serca su amiga Brigitte. Na prome instante el’a cuminza discuti cu su mes amiga, pero despues e mama a cay aden. Un otro amiga cu tambe ta na e cas a ranke na su brasa y hinke den otro kamber. Den e otro kamber di e cas e discucion a keda esacala, ora cu e agresor Rosa Maxwell, mama di su amiga, diripiente na forma incomprendibel a subi riba Micheline y cuminza atake, golpi’e y basha su persona cu mokete den cara.

Net despues di e agrecion unda ya sanger a cuminza spart den e kamber, e amiga Brigitte a pidi su mama pa laga Micheline bay y asina Micheline por a core bay pafo pa yama su famianan na telefon. E victima Micheline a keda seriamente maltrata na su cara, na su curpa unda te hasta a corta su lip, wowo blousa como tambe cara.

Na prome instante e grupo na e cas tabata alega cu Micheline mes lo a cana cay. Sinembargo ora analisa tur e golpinan na su curpa, ta dificil pa kere cu por ta trata di un caida.

Micheline sinembargo ta corda tur cos y asina pues el’a entrega denuncia na polis contra mama di su amiga, Sra. Rosa Maxwell como agresor.

Micheline a keda hospitalisa pa dos dia. Loke mas ta duel Micheline ta cu na ningun momento su amiga of e mama a mustra un arepentimento.

Ningun arepentimento y a empeora e asunto via facebook:

E victima a dicidi pa manda nan un potret pa su “amiga” con el’a keda despues di e maltrato, y pa su sorpresa, enbes cu Brigitte mustra arepentimento, el’a haci peor: el’a post e potretnan aki riba facebook unda a habri e porta pa tur hende cuminza insulta e victima y lansa difamacion den su contra.

E victima a conta Solo di Pueblo: “Tabatin wega di shots, pero tur testigonan sa cu ami no a hunga e wega ey di shots” “Brigitte tabata mi amiga, hopi cercano y nos a comparti hopi cosnan, sali. E no a yamami ni pidimi sorry, bisami cu su mama a haci dimas, e no a haci esey, nan a sigui fiesta manera nada a pasa, nan a post contra mi y yamami pa mal mama riba dje. Bo no por a accepta bo culpa y bo a bay difamami”, Micheline bao yoramento tabata conta redaccio di Solo di Pueblo.

Te hasta tin prueba cu despues cu e incidente a tuma lugar, nan a sigui fiesta y celebra, manera nada no a pasa. Loke mas ta wordo tuma na malo ta e hecho cu bo propio amiga ta post cos malo riba facebook y laga hende papia malo.

“Mi kier husticia, y tur hende cu haya maltrato, no keda keto”, victima Micheline a termina bisando.

Ministerio Publico ta na altura:

Solo di Pueblo a tuma contacto cu Ministerio Publico dialuna mainta. Un rato despues Ministerio Publico a informa SOLO DI PUEBLO cu nan ta na altura di e caso di maltrato aki y cu e caso aki tin tur atencion di fiscal. Normalmente despues cu un denuncia wordo haci, Polis ta investiga y ta traha su eind proces verbaal a base di cual fiscal ta tuma su decision. Den e fase aki e ta un cuestion di Polis ainda.

Mirando e gravedad di maltrato, no ta descarta e posibilidad cu e agresor lo mester asumi responsabilidad di su actonan.

Laga esaki ta un refleccion pa tur hende: Bo sa ken ta bo amiga? Micheline a haya un tremendo sorpresa di su propio amiga.

Esaki ta momento cu Micheline a wordo busca cu Ambulance na e cas di fiesta na Savaneta. E momento aki e “amiganan” a alega cu ta su mes a cana cay.

LEAVE A REPLY

Please enter your comment!
Please enter your name here