Diamars anochi den careda di 9.or anochi alarma a wordo bati pa signalnan di radar cu a capta un boto cu velocidad halto biniendo direccion di Aruba. Kustwacht no a basila y mesora a despacha su Metalshark den direccion di e boto aki. Notabel ta cu e GoFast aki a sali cu velocidad halto for di pabao di Boca Catalina/Arashi bay direccion west, pues pabao di Aruba. Metalshark a start un persecucion formal su tras te cu a logra di pone para. Notabel ta e velocidad cu e boto aki tin, cu por poco e por a logra huy.
Durante di e persecucion e tripulantenan di e boto tabata benta paki (di droga) na awa.
Helicopter di polis a lanta vuelo pa duna asistencia na e operacion aki. E boto a wordo transporta pa waf di Barcadera, unda autoridadnan a haci nan trabao di investigacion.
Si realmente e operativa a logra, esta cu e mercancia cu mester a wordo gedrop na Aruba a yega su destino, no ta conoci.
