Prome Minister Evelyn Wever-Croes:

ORANJESTAD — Dialuna 15 di November, durante Conferencia di Prensa di Gobierno di Aruba, Prome Minister Evelyn Wever-Croes a duna un splicacion amplio di e organisacion di ministerionan di Gabinete Wever-Croes II enfatisando e falta di structura pa loke ta trata e personal cu ta traha cu un minister cu Gabinete Wever-Croes a encontra na 2017. Prome cu a drenta gobernacion aki, cada minister tabata dicidi ken e ta trece, cuanto hende e ta trece pa traha cu ne y cuanto e kier paga cada hende. Esaki a pone cu hendenan cu tabata haci e mesun trabou tabata haya diferente pago depende di cierto circuminstancianan. Pero, Prome Minister a duna di conoce, nada tabata documenta ni oficial.

“E tabata un free for all. Na 2017, nos a dicidi di organisa tambe na e Bureau di ministernan pasobra no por ta asina cu henter Gobierno ta organisa y net ministernan ta desorganisa”, Prome Minister a expresa.

Gobierno a cuminsa cu un organogram cu ta mustra con un ministerio ta hinca den otro en general. E structura di cada ministerio: Minister > Conseheronan (inhoudelijk of juridisch) > Begrotingscoordinator pa atende cu temanan di presupuesto > Chef di Bureau > Demas funcionnan cu tin: Bode, un persoonlijke beveiliger, un chauffeur, Secretariële en
Administratieve ondersteuning > esnan den comunicacion y consulent cu ta yuda atende publico. Esaki ta e organisacion di cada ministerio. Ministernan tin e escogencia pa yena e puestonan aki.

Contestando preguntanan cu ta surgi enuanto e cantidad di persona cu ta traha na cada oficina di minister, Prome Minister a enfatisa cu a palabra den e maneho di 2017, cu ta limita e cantidad na 25 persona pa cada ministerio. Cierto momento e minister cu tabata carga cu husticia y integracion a pidi pa aumenta e cantidad mirando cuanto hende ta frecuenta akinan pa atende cu tema di permiso. E ora den un periodo breve, e tabata permiti pa tabata tin mas di 25.

Haciendo esaki, tambe, a atende cu e pago di cada funccion. Cada minister mester traha cu loke ta usual den gobierno basa riba e schaalnan usual den gobierno. Aparte di esaki tambe cierto funccionnan ta haya un toelage pa auto, of pa telefoon y e ter beschikkings toelage di 25% pasobra un persona cu ta traha cu minister mester tey 24/7. “Esunnan cu ta traha cu mi por bisa berdad e ta 24/7 y hopi biaha ta despues di 6 pm mi ta comunica cu nan pa nan yuda mi cu consehonan pasobra durante dia mi ta ocupa den diferente reunion”, Prome Minister a duna di conoce.

Un situacion di diferencia ta den e Ministerio di Enseñansa na unda cu e Minister anterior no tabata traha cu hopi hende cu ta haci cu pa e aña aki no tin presupuesto pa amplia e cantidad di hende den e ministerio aki pero sigur Minister Endy Croes tin mester mas hende pa yud’e den e trabounan pa loke ta trata enseñansa y deporte.

“Cu esaki mi kier duna e transparencia cu a wordo pidi na nos pa duna con e organisacion di e ministerionan ta hinca den otro. Manera mi a bisa ora nos a drenta gobernacion, no tabata tin nada regla”

Prome Minister a compara su ministerio cu esun di e ex Prome Minister anterior, señor Mike Eman cu na momento cu el a sali for di gobierno, e tawata tin 147 persona riba su payroll pero a yega te 300 persona dado momento den su gobernacion. Prome Minister a enfatisa cu e ta traha cu e cantidad maximo di 25 persona y pa e gobernacion aki, te cu awor e tin 16 persona ta traha pe sperando cu prome cu fin di aña haya e 2 conseheronan cu e ministerio ta buscando riba e tereno di infrastructura pa por yega na 18.

Prome Minister a enfatisa cu esaki ta pa duna indicacion con Gabinete Wever-Croes a drenta e gobernacion y dicidi pa baha e gastonan. Esaki a wordo comparti cu sindicatonan y cu Parlamento varios biaha.

“Nos no ta traha cu un cantidad grandi di persona. Nos ta wordo tilda hopi biaha di nepotismo y ta tuma hende den servicio sin importa nan preparacion of sin sa si nan por haci e trabou pero ta tuma nan simplemente pasobra nan ta conoci sea ta amigo of sostenedor. Ora bo ta traha cu un maximo di 25 hende na cada minsiterio, no tin espacio pa nepotismo pasobra bo mester cada un di e personanan aki den nan specialidad y capacidad pa yuda bo haci e trabou. Mi por bisa di experiencia cu 25 mes ta poco pero nos mester limita. Nos ekipo di ministernan ta hopi bon prepara y cada minister a busca personanan pa yude den e areanan cu e mester di ayudo”, Prome Minister a termina bisando.

LEAVE A REPLY

Please enter your comment!
Please enter your name here