Partido POR a perde tur confiansa den Marisol Lopez-Tromp como minister Ta pidi pa tuma su retiro entrante dialuna awo.

0
394

Partido POR hunto cu minister di Husticia, Andin Bikker a yama un conferencia di prensadiabierna mainta a base di un mandato cu nan a ricibi di directiva. E mandatario a splica cu su persona, for di 1997 ta den politica. Den parlamento 8 aña, el a representa pueblo y awor aki ta bay haci casi 2 aña y 7 luna como minister. Como persona e ta conoci como mediador, ombudsman, semper busca solucion, busca unda tin diferencia di opinion y semper ta purba pa partidonan yega na otro y esey semper tabata su rol den parlamento. Partidonan den gobierno y oposicion di cualkier signatura por confirma esey. Desde cu a apunta Marisol Lopez-Tromp como minister di Infrastructura, a bin ripara cu e persona a scoge pa ta individualista, no tin comunicacion cu fraccion, no tin comunicacion cu partido. Bikker como semper bruggebouwer, mediador, ombudsman a haci hopi esfuerso pa mehora e comunicacion cu partido, mehora e comunicacion cu fraccion y recorda e persona cu ta biba den un democracia parlamentario, caminda cu mester tin confiansa (para den nos constitucion). No obstante esaki, no a haya su atencion. Ni cuanto reunion a yam’e, e no a sa di acudi of ta yega hopi laat. Bikker, hunto cu Lopez-Tromp y Otmar Oduber, a aparece riba listanan politico e mesun aña na 1997. Desde e periodo ey nan ta den politica. Nan conoce otro di hopi tempo. A bay scol hunto tanto na Aruba y Hulanda. Bikker a haci su maximo esfuerso, pa e partido yega na e decision cu el a yega. Durante e conferencia di prensa, Bikker a lesa e mandato cu partido a duna. Ta un carta dirigi na Marisol Lopez-Tromp, cu a mand’e p’e. E ta como lo siguiente: Considerando cu como bo persona a asumi e encargo como minister presenta pa e partido y sosteni pa fraccion di POR, bo a opta pa no tin comunicacion regular y ni optimal cu e partido. Nos pais ta pasando den temponan sumamente dificil sin precedente debi na e crisis di covid-19, caminda cu gobierno di Aruba ta haci su maximo
esfuerso pa mantene y garantisa siguridad laboral. Sin embargo bo persona a bin ta tuma unilateralmente decisionnan cu ta bay contrario na e maneho ey. Asina por ehempel bo persona a purba di atribui bo ministerio autoridadnan cu ta pertenece na colega minister di partido, door di anuncia cu lo cera acceso selectivamente, solamente na cierto vehiculonan na camindanan publico, den Parke Nacional Arikok, mal informando e publico riba e esencia di contenido di un decreto nobo. No obstante cu a atende bo persona riba esaki, refiriendo na leynan vigente, bo persona a keda persisti den bo maneho anuncia, exponiendo pais Aruba na claimnan y posibel
casonan inecesario den corte, treciendo varios trahado den incertidumbre pa loke ta nan siguridad laboral.
Cu mas aleu bo persona a bay boga y hasta presiona e directiva di compania Sui Geniris Serlimar, un compania di gobierno, patrimonio di pueblo pa pidi Surseance di pago. Esaki tabata completamente inecesario, principalmente den luz di e crisis di covid-19, caminda cu e mercado laboral a cambia drasticamente y ta bao di hopi presion. Un surseance tin un efecto grandi ya cu e ta trece e trabao directo y indirectamente e siguridad laboral di centenares di trahado den incertidumbre y gastonan adicional di recogemento di desperdicio. Den e caso particular di surseance di pago, ta un obligacion prome pa acudi na parlamento, ya cu ta trata di un compania di gobierno, vooral cu tin un ley pendiente den parlamento cu lo trece un solucion structural. Cu parlamento a duna aprobacion unanimamente pa aloca fondonan adicional algun luna pasa. Mas aleu bo persona no a pidi conseho di ministerio di husticia, no a consulta cu fraccion, Parlamento of partido y no tin un mandato specifico di por ehempel di Conseho di Minister. Cu e peticion di surseance di pago, pasobra e compania tin e sosten di parlamento pa e fondonan cu bo propio persona a rekeri. Tin un concepto di ley pendiente bao di tratamento pa yega na un solucion structural pa Serlimar. Te asina leu no tabata tin caso pendiente den corte di acreditornan pa un surseance di pago of algo similar. No tabata tin ningun carta di aanmaning, avisando Gobierno pa e intencion di e medida huridico asina pisa, y ademas, semper por a acudi na gobierno of parlamento pa pidi aprobacion pa fondonan adicional si tabata necesario, manera semper tabata e caso. No solamente pa Serlimar pero pa cualkier otro compania estatal cu ta fungi un tarea esencial pa e comunidad di Aruba. Cu e surseance di pago tin un risico den dje cu e por termina na declaracion di e companiaden bancarota cu tur su consecuencia negativo empleado pais Aruba.No obstante varios oportunidad den buena fe di parti di liderasco di partido y fraccion duna splicacion, bo a prefera pa no tin dialogo y a scoge paneglisha, demostrativamente varios invitacion, como si fuera cu bo ta un mandatariosoberano y cu no ta existi democracia parlamentario.B’a scoge pa bay ataca partido via un medio opositor cu storianan falso. No ta mira unsperansa pa cambio of mehoracion pa loke ta comunicacion cu partido y fraccion.Den e situacion actual, tumando na cuenta nos constitucion y historia parlamentario, un mocion di lamento, desaprobacion y desconfiansa no por wordo exclui. Bo posicion como minister cu ta representa POR, a bira completamente insostenibel. Directiva, liderasco y conseho di partido POR no tin confiansa mas den bo persona y ta urgi pa di e mesun forma cu bo persona a wordo nombra pa POR como minister, pa bo pone bo posicion di minister na disposicion di partido mas pronto posibel, no mas tarda dialuna 8 di juni pa 10’or di mainta. Ta informa bo persona cu entretando ta urgi bo persona pa no tuma ningun decision como minister cu por tin consecuencia pa pais Aruba. Minister Bikker a agrega cu Otmar Oduber a informa partido cu e ta bay bek den sector priva y cu e ta bay dedica su mes den sector priva. Diabierna, dolorosamente ta tuma despedida di Marisol Lopez-Tromp como minister di POR y na mes momento agradecidamente ta dispidi di Otmar Oduber cu ya pa varios luna a tuma e decision desde december cu e ta bay bek den sector priva pa diferente motibonan, entre otro en conexion cu su salud. Los di esey POR a haci un apelacion na dje, ora a presenta e situacion di Covid, cu no tin bista riba ki dia ta bay tin un congreso di partido, pa e ora e keda un rato como consehero, cual el a haci tambe. Pero entre tanto a dicidi cu awor aki e kier bay bek den sector priva. Otmar Oduber no tin e intencion pa bin bek como ningun funcion den partido, ni tampoco como minister. Esey ta un decision, ken lo reemplasa Marisol Lopez-Tromp ta un decision cu Partido mester bay dicidi riba dje den su seno. Awor aki ta atende cu e decision cu partido a bin cun’e.

LEAVE A REPLY

Please enter your comment!
Please enter your name here