Dedica na hubentud di Aruba y Scol di teatro Juana Sujo na Caracas.

Autor: Lenie Henttu-Jeandor

Respetabel hubentud di Aruba y na tur cu ta desea di forma parti di e gremio teatral. 

Debi cu tin tanto restricción pa cu e pandemia, mi a dicidi di usa medionan di comunicacion pa presenta mi buki “Formacion di un Actor”.

Un danki di curazon na Sra. Rafi Elisabeth-Statie kende ta e persona cu a judami drenta e skol di Teatro “Juana Sujo”. Masha danki amiga-colega Rafi.

Den pasado despues cu mi a skirbi y presenta e buki “Manual pa Escenario” mi a hanja e peticion  di varios personanan pa skirbi e “Technica teatral pa e formacion di un actor” pa e hubentud di Aruba. Tambe mi ke haci uzo di e oportunidad aki pa sugeri e hubentud di Aruba con pa hiba un bida sano den e gremio teatral y gana respet di tanto productor, director, elenco y ekipo artístico.

Den e buki “Formacion di un Actor” tin opinion di tres Educador di Aruba. 

Sr. Ito Tromp, Sr. Charles Croes y Sra. Luty Martinez. Tur tres tin e hubentud di Aruba na pecho y pami nan opinion ta un privilegio.Un danki di curazon na Sr. Alan Arends cu a diseja e kaft, Sra. Jeta Quilotte cu a traduci loke mi a skirbi na spanjo 51 anja pasa, pa papiamento y tambe na Unoca kende a haci posibel pa e buki aki ta riba plaza awe.

E buki  “Formacion di un Actor” ta abarca tur mi conocimiento cu mi a adkeri durante e prome dos semesternan na “Skol di teatro Juana Sujo” Caracas, Venezuela. Augustus 1976 pa Juni 1977

Te ainda mi tin e schrift cu ta un relikia y comprobante pami, pa cu loke mi a sinja y skirbi.

Pa esunan cu no sa, mi a skirbi e buki “Manual pa Escenario” después cu mi a tuma mi curso di stage-managing den seis diferente teatro na Broadway, New York na 1996. E ta abarca e trabow di un Stage-Manager for di dia di Auditie te cu e dia di Presentacion. Tanto pa un Revista Musical (musical review) como kwalkier genero teatral o kwalkier otro evento musical.

Manera nos tur sa e gremio teatral ta rekeri vocacion y disciplina.

Pa por eherce e trabow di un escritor, guionista, productor, director,  actor of actris, esaki ta rekeri masha hopi buskeda y dedicacion. 

E autor su idea, meta, creatividad y kiko e kier logra pa cu su obra teatral, ta loke tanto e director como e actor mester sa di analisa y tambe memorisa. Pues.. “E trabow di mesa” ta sumamente necesario. Ta e forma con e obra teatral a wordo dirihi y con e actor-/actrisnan a interpreta e caracteristica y psicologia di cada personaje, tambe nan interelacion, gestonan, expresión corporal, articulación y Intensidad ta loke ta conta y por wordo considera como un trabow of actuacion profesional of no profesional.

PROFESIONALISMO TA  E MANERA OF FORMA DI DESAROLLA UN ACTIVIDAD CU RESPONSABILIDAD Y EXACTITUD.

Hopi vez mi a jega di tende expresionan haci…. “Ta artista e ta”.

Kwalkier trabow cu’n persona  ta eherce ta un Arte. Pues… nos tur ta artistanan. Mi a mira y a keda impresiona di mira con un Hardinero a cambia y drecha un hardin di un hotel cual ta un arte riba su mes. Ela uza su imaginación y a crea.  Pues….. e Hardinero ei ta un Artista. 

ARTE TA LOKE TA IMPRESIONA E SENTIDONAN DI E SER HUMANO. Imagen-Sonido.

CONSEHO NA E HUBENTUD

No rebaha, critica, tene di bofon of discrimina un persona pa cu su físico si e ta den un grupo teatral. No kore huzga paso niun hende no conose e potencial, talento, don y conocimiento di cada ken te ora cu e demostra esaki. Tampoco bai tras di comentarionan, paso niun hende sa kwanto di loke ta wordo bisa di un persona ta cuadra cu realidad.

SUGERENCIA DI UN DIRECTOR DI TEATRO.

Sr. Oslin Boekhoudt q.e.p.d. fundador di e grupo teatral mas bieu di Aruba, un di e miho directornan di obranan teatral na Aruba a jega di comparti cumi un sugerencia valioso despues di a lesa e buki “Manual pa Escenario”.

Su sugerencia tabata: Jamas  acepta kliek (camarilla) den un grupo teatral, pasobra esaki por trece desunion y e fundador tin pa lucha pa mantene e grupo activo y uni.

Pues… ami a acepta e sugerencia..Mesun cos mi ta sugeri e hubentud di Aruba. Y ami ke bisa no laga egoismo, envidia, orgullo, hipocrecia, intriga, tenemento di bofon crece den boso curazon.   Mas bien trata di sinja di esun cu bo ta mira cu tin mas talento y conocimiento cu bo.

DOCUMENTA BOSO MES Y MANTENE FACULTAD DI RAZONAMIENTO CONCIENTE

Un actor cu ta sigur di su mes ta aplica e tecnicanan di e formacion di un actor tur ora bai. No tin mester pa usa sustancianan quimica (p.e. cocaína- marihuana) pa pone bo sinti sigur di bo mes. 

Ta recomendabel pa acudi na FADA cu tin tur informacion en cuanto tur e sustancianan quimica cu ta wordo bendi y uza awendia, pa asina niun hende influencia ni ganja boso. Henter comunidad sa cu uzando sustancianan quimica ta caba cu e ser humano físicamente, su personalidad y ta hibe na un bida inmoral y yen di problema.

BOSO SALUD 

Documenta boso mes en cuanto “Salud Preventiva” pa asina disfruta di un estilo di bida saludabel. 

Di prome: Nutricion basa riba e ingredientenan cu boso curpa mester pa asina boso tin un salud optima.

Di dos: Desintoxica boso curpa pa asina boso tin un metabolismo acelera (nos tur ta depende di esaki pa hala rosea bon, un bon circulación di sanger, mantene bo mes cajente ora ta friew y fresco ora ta calor) y tambe lo boso ta jen di energia.

Di tres: Zorg pa boso drumi suficiente pa asina bo reabilita bo curpa. 

DOCENTENAN DI TEATRO. 

Na Aruba tin varios docentenan di Teatro cu mi ta sigur cu lo ta willing pa juda boso y tambe integra boso den nan gruponan) Por tuma contact cu Sra. Joan Danies of Sr. John Freddy Montoya. Takai Mohamed (kende a dunami e gran noticia di cu ela  uza e buki “Manual pa Escenario” pa duna les na Surinam) y un Recien Gradua di kende mi ta masha orgulloso di dje debi cu su 11 anja mi a dirihie den un obra teatral cu mi a skirbi “Compa Leon ta pone Ordo” y a demostra su potencial como actor. Awendia e ta docente na Ipa. “Daylan Krozendijk”.

UN GENERO cu mi ta recomenda cu tur mi respet pa cuminsa cune den e gremio teatral. Despues cu boso caba di lesa-studia e buki “Formacion di un Actor” boso lo ripara cu tin varios genero den e gremio teatral. Mi sugerencia ta  cuminsa cu “Moraleja” Lo bo entretene y educa y después bai pa e otro generonan. 

BOSO SPIRITUALIDAD 

Di ultimo loke mi ta sugeri boso mi jiunan ta: Balansa boso trabow seglar den e gremio teatral of kwalkier otro gremio cu’n estudio biblico. Boso lo hanja un conocimiento cu lo haci boso sigur di boso mes y engrandece boso Fe y Speranza. Documenta boso mes riba varios topiconan den bida. Mas conocimiento boso tin, mas boso por crea den un forma sano usando e escenario pa educa y entretene. Zorg pa boso keda cu un bon rutina spiritual. Esaki lo proteha boso di tur maldad cu ta rond, pasobra boso lo sa di distingui entre bon y malo.

Corda: Nos tur mester di otro y ta bin di un solo Creador y nos niun ta mas cu otro y e titulo mas valioso cu’n persona por hanja ta di acuerdo cu su valornan y personalidad. E berdad Semper ta triunfa.

“Formacion di un actor” ta pa pricipiantenan den e gremio teatral, si tempo duna y depende con e aconticimientonan ta bayendo den vida, lo mi skirbi e Advance.

Exito y un abrazo fraternal 

Lenie Henttu-Jeandor

LEAVE A REPLY

Please enter your comment!
Please enter your name here