Pueblo kier un investigacion di kiko ta berdad di e propaganda cu e Directiva saliente di Fundacion Lotto pa Deporte, cu sosten di director Tuitt, lo a laga e fundacion solido y bon formalisa. E propaganda aki ta mas bien un fake news cu realidad. Ta bon conoci caba cu Lotto ta tur na debe miyonario, Lotto a corta for di 2020 un suma cuantioso di Afl 1,5 miyon pa aña den subsidio pa deporte, Lotto debe Stichting Sportsubsidie Aruba miyones di florin y Lotto debe tambe e Fundacion Facilidadnan Deporte cu ta maneha e complehonan deportivo, cu mayoria ta den mal estado di mantencion. Asina por sigi papia di debe y mas debe.
Con por papia anto cu a laga Lotto solido y bon formalisa. Hasta por bisa cu Lotto no ta cumpliendo cu e meta principal pa cual e fundacion a wordo lanta, esta pa subsidia deporte por medio di benta di loteria. Director di Lotto pa Deporte Roland Tuitt, cu un comportacion manera di un Harlekijn, ta papia di refiansa debe di banco pa por hinca placa den deporte, mientras Canada si ta sigi cobra miyones for di loteria. Statuto ta stipula pa refiansa mester aprobacion di Minister di Sport, sino atrobe tin violacion di statuto y esunnan envolvi ta personalmente responsabel. Un investigacion riba e maneho di e fiansa di banco y cuentanan di banco ta hopi urgente pa llega na e berdad di Lotto pa Deporte. Pregunta cardinal ta kendenan awor aki ta esunnan autorisa riba e cuentanan di banco di Fundacion Lotto pa Deporte.
Hasta e accountant di Lotto tin observacion critico riba e posicion financiero di e fundacion.
Ta bini a serca cu e Directiva saliente a viola statuto di Lotto door di no a traha un agenda di retiro (‘aftreedrooster’). Ta mas cu obvio cu e hendenan aki no kier a retira. Lubidando cu ora bo termino di nombracion caba, ta morto bo ta si no tin prolongacion. Es decir cu bo no tin nada mas di bisa y sigur no laga traha video di fake news. Loke bo mester a haci ta zorg pa un bon traspaso di documentonan na e Hunta di Supervision nobo y no sconde ningun documento.
Awel director Tuitt mester bin splica si e directiva saliente a actua na un manera responsabel den nan encargo di traspaso.
Al contrario fuentenan na Dakota mes ta indica cu e directiva saliente no sa traha mes cu convocacion ni agenda pa reunion. Y no sa tin mes notulonan di reunion firma. Violando asina atrobe e statuto di Lotto pa Deporte. Hasta por papia di koffiemorgen en bez di reunion.
Claro mester bini un investigacion interno pasobra e director Roland Tuitt no ta un hende cu ta duna transparencia. Na varios ocasion e la usa placa di deporte pa traha video wild west cu informacion falso. Nunca por confia riba e carnicero cu ta aproba su mesun carne di su carniceria. Ay banda aleyula cu e benida di e Hunta di Supervision nobo pa por rescata deporte cu e meta pa duna deporte bek su fair share mereci.
