Gobierno di Aruba a compromete su mes pa implementa Agenda 2030 y e Metanan Mundial Pa Desaroyo Sostenibel (Sustainible Development Goals – SDGs) di Nacionnan Uni (UN) na Aruba.
E Agenda 2030 y e SDGs ta forma un marco global di acion pa yega na mas prosperidad pa nos planeta y pa henter humanidad Nos mundo ta cambiando rapidamente dor di cambio di clima, pandemia y hopi otro aspecto cu ta influencia mundo manera nos a bin ta conoce. Pa logra tin un mihor futuro, ta importante pa henter comunidad uni forsa y tuma accion pa crea esaki. SDG ta fungi como un compas y guía den esaki.
Na 2022 Aruba como parti di Reino lo raporta na e Voluntary National Review (VNR) di UN tocante e progreso di e implementación di e SDGs na Aruba. E Comision Nacional di SDGs ta encarga cu e raportahe .
Hopi organisacionan, impresanan y individuonan caba ta tumando accion cu ta aporta pa yega na e metanan aki. P’esey den e proceso di VNR tambe nos ta colaborando cu diferente stakeholders pa acumula bon practicanan y otro información relevante tocante e practicanan sostenibel y contribución na e implementación di SDGs na Aruba. Alavez e proceso di VNR ta brinda e oportunidad pa por intercambia di idea y sina di otro con pa incorpora practicanan sostenibel den comercio, organisacionan y na nivel personal.
Cu e meta aki, Prome Minister a invita sector priva, NGOs y demas instancia pa participa na un sesión virtual consultativo cu lo tuma lugar dianan 30 di November y 1 di December 2021 di 9or di mainta pa 12or di merdia. A wordo pidi pa yena tambe un cuestionario tocante stapnan sostenibel awo of den futuro, bon practicanan of storianan exitoso y/of obstaculonan den implementación di SDGs.
Prome Minister di Aruba ta spera di por conta cu presencia di invitadonan na e sesión aki.
