Informacion cu a yega na mesa di redaccion di SOLO DI PUEBLO ta indica cu e profesionalnan cu ta den e Team di maneho di Covid di Hospital a distancia nan mes for di declaracionnan di Sr. Jacco Vroegop. Tabata dia 30 di december ultimo cu Jacco Vroegop a duna un declaracion na corant AMIGOE, unda el’a bisa cu vacuna no ta yuda.

E declaracion aki no a cay den bon tera den e grupo di profesionalnan cu ta den e comicion cu ta manehando e situacion di Covid-19 na Hospital Horacio Oduber.

Un total di 12 profesional, consistiendo di dokternan, mayoria internista como tambe dokter di pulmon a firma e carta cu nan a manda pa e propio director como tambe pa Crisisteam di Aruba y minister Dangui Oduber y Promer Minister di Aruba.

E carta ta acusa Jacco Vroegop cu su declaracion por afecta e yamada pa tuma vacuna unda consequentemente por causa cu mas morto por cay.

E profesionalnan a haci alaves un yamada pa comunidad no duna atencion ni oido na declaracion di Jacco y ta apela pa comunidad sigui tuma e vacuna 1, 2 y booster, pa proteha nan mes.

E informe ta segura SOLO DI PUEBLO cu e carta aki a wordo firma pa tur dokter den hospital cu dia pa dia ta atende cu maneho di crisis, incluyendo varios dokter manera dokter di pulmon y internista.

LEAVE A REPLY

Please enter your comment!
Please enter your name here