Ultimo hora! Hulanda kier cambia CAFT pa CFT via Rijkswet Financieel Toezicht

0
1612

Dialuna mainta Minister President Sra. Wever Croes a tene un entrevista cu Hans Geerman den Noticiero Dinamico na TOP FM. Sra. Wever Croes a bisa cu diadomingo mainta el’a wordo sorpesa cu un yamada di Knops for di Hulanda pa participa cu Hulanda a pone un segundo condicion pa presta Aruba 203 miyon florin. E prome condicion ta un entidad nobo entre Gobierno di Hulanda cu Gobierno di Aruba cu ta atende cu e prestamo y control di e uso di e placa cu wordo fia. Pues e entidad nobo aki lo mester bay traha entre Gobierno di Hulanda, CAFT y Gobierno di Aruba. Awor a pone un di dos condicion:

Di dos condicion na ultimo hora – Rijskwet Financieel Toezicht:

Sinmebargo Knops a participa tambe cu Aruba mester bay cumpli cu un di dos condicion y cu nan kier pa Aruba bay cay bao di e Rijkswet Financieel Toezicht, cu ta conta pa Curacao y Sint Maarten.

Dicon? Riba e pregunta di Sra. Wever Croes, dicon e condicion aki? Knops a contesta cu si bini e entidad nobo, nan lo no por traha cu CAFT y CFT y no por traha cu LAFT y RFT. Señora Wever Croes a bisa cu esaki no ta un hustificacion, pasobra Aruba ta e unico cu ta cumpliendo cu e condicionnan di Hulanda. Aruba ta e unico cu ta cumpliendo y cu por a pone su finansas na ordo. Obviamente e ley di LAFT cu e kamber di CAFT a duna su fruta, pasobra di otro banda IMF a casi culpa CFT cu RFT di a kibra economia di Curacao y Sint Maarten. Awor bo ta coy un modelo cu no a funcciona aya, bin pone aki?

Kico te beneficio di RFT? RFT tin como beneficio, cu Aruba lo por presta placa na 0%. Esey ta poni den ley, pues no tin discucion mas. E ta un ley di Reino di consensus, Aruba mester accepta, pero no por bisa cu nan ta impone riba Aruba. Awor nan ta pone como un condicion pa e placa cu ta cla pa diabierna awor, Sra. Wever Croes a bisa.

Na kico a keda palabra? A keda palabra, cu Hulanda lo manda un carta, pa splcia pakico e cambio aki, manera e RFT. E cambio aki, mester un consulta amplio na Aruba, no ta algo cu mi so por carge, segun Wever-Croes. Mester consulta gremionan y parlamento. A base di sentimentonan ey lo duna un contesta na Hulanda. Ta spera cu sano huicio prevalece diabierna awor na Hulanda.

Di sorpresa: Te cu ayera mainta (diadomingo) tabatin un condicion di entidad, pero ainda no tabatin claridad, dicon mester bini un entidad mas, con e ta bay ta den relacion cu CFT y con e ta bay ta den entidad cu Gobierno. Desde diadomingo mainta awor tin un extra condicion.

Sra. Wever Croes a sigui bisa den Noticiero Dinamico: Nos lo atende cu e tema aki rational y no cu emocion. Diabierna awor nos mester haya e prestamo di 203 miyon florin pa asina por trece trankilidad. Si nos segura e placa aki pa Juli, Augustus, September, e ora pa September nos ta mas leu. Hulanda sa cu nan tin nos lomba contra muraya. Nunca nos pueblo a laga nan explota nos dje forma aki. Awor ta bay prepara un reunion cu tur gremio, pa haci e ronda di consulta aki.

Kico ta pasa si nos no tume? Knops a bisa cu e ora lo no duna Aruba e prestamo diabierna awor.

Curacao y Sint Maarten a haya dispensacion di debe den e RFT, pues Aruba tambe lo haye? Knops a bisa cu e no ta kere cu tin apetit pa esey awor na Hulanda. Dentro di e RFT, Hulanda ta tuma over tur e debenan di Aruba na 0% di interes, pa cual e ora ey Aruba lo por spaar 250 miyon florin pa aña na gasto di interes. Esaki sigur ta un suma grandi cu lo yuda Aruba. E ronda di consulta lo bay determina e contesta cu nos lo bay duna.

RFT ta un aanwijzing?
Ley di RFT ta mescos cu e ley di LAFT. Pues dentro di RFT tin aanwijzing. Materiaalmente nada ta cambia. CAFT lo stop di existi, pero CFT lo bini den su lugar pa keda haci e mes un trabao. E constelacion di CFT lo cambia, unda un miembro di Aruba lo bay sinta tambe den CFT.

Rol di parlamento: Cambio mas grandi ta cu e ley bao di unda e colegio di supervision ta funcciona, lo bay cay bao di Rijkswet Financieel Toezicht, cual no ta un landsverordering mas, pues despues cu Parlamento pasa e ley, parlamento lo no tin mucho mas di bisa.

A manda pidi Parlamento su sentimento riba esaki.

Unda nos autonomia ta bay keda? Esaki no ta mucho cla, pasobra ta enespera di e carta di Hulanda pa haya e detayesnan y pa asina mira ta unda nan kier bay.

LEAVE A REPLY

Please enter your comment!
Please enter your name here