Yuri Bracho a ricibi e permiso oficial pa e marcha contra pedofilia pa dia 3 di Juli proximo

0
1022

Yuri Bracho tabata den un rueda di prensa y tambe tabata na Radio Aruba 91.5 FM riba e marcha contra pedofilia programa pa dia 3 di Juli proximo. Sra. Yuri Bracho a informa cu e tin e permiso oficial pa realisa e marcha aki. Esaki ta di dos manifestacion cu e ta liderando. Yuri Bracho a bisa cu e no kier pa ningun victima mas cay. E cantidad di abuso di mucha ta hopi halto.

Tin un union actualmente bao di hopi persona, cual por sigui esaki via red social. Sra. Bracho ta bisa cu e tin e permiso, y su marcha ta sigui padilanti. Porfin mas hende a uni awor, segun Sra. Bracho. Tin un union masivo den comunidad. Den e prome manifestacion, a ricibi un bon acogida, unda te hasta tin comerciantenan a bini cu t-shirt.

Sra. Bracho ta haci un yamada na mas instancia, pa por haci donacion di t-shirt. Pero si bo no tin t-shirt, por bay acudi na blanco of preto.

Segun Sra. Bracho, apesar cu Parlamento por pasa e ley pa aumenta e castigo, su marcha ta sigui pa diabierna dia 3 di juli 2020.

Sra. Bracho no ta di acuerdo cu trece historianan dilanti:

Riba red social tin hopi testimonio cu ta saliendo den e ultimo horanan. Hasta hopi persona ta pone e potret di e abusadornan. Sra. Bracho ta rechasa loke ta sosodiendo riba facebook, pasobra loke ta pasando riba facebook no ta bon. Trece den red social no ta yuda. E ta bay afecta e victima mas. Sra. Bracho ta bisa cu e mihor forma ta pa recopila tur cos y entrege na e instancia concerni y no pone riba facebook. E victima ta bay keda mas afecta.

Mama so por entrega denuncia: Actualmente ta un mama so por entrega un denuncia den caso asina. E cambio cu Sra. Bracho ta cu si un persona tin suficiente prueba, cu e prueba ey por wordo tuma, sin mester warda riba e mama, of laga e mama pensa.

Voogdrijraad: Pa siman tin 5 pa 6 mucha ta wordo abusa sexualmente. Voogdijraad tin 5 trahador so. For di nan 5, nan tin cu atende cada caso, y despues nan ta sinta na mesa pa analisa tur e casonan. Ora bo yama pa follow up, bo ta tende cu colega a bira malo. Despues colega a bay cu vakantie. E caso ta keda pega, pasobra e persona no tey. Voogdrijraad no por keda atende cu e casonan aki, cual ta mucho hopi, pa e trahadornan cu nan tin.

E situacion ta hopi grave! Sra. Bracho cu ta un defensora di casonan di hende muher y mucha ta haye confronta cu hopi caso mes pa siman.

Lo mester un departamento special pa abuso, cu un team special, pa asina encarga cu e tarea aki. Laga voogdrijraad keda cu su encargo. Bini cu un otro departamento pa atende abuso sexual, Sra. Bracho a bisa.

Tambe tin un reclamo di Yuri Bracho, cu Voogdrijraad ta bay conta esnan cu ta abusa di mucha, cu ta Yuri Bracho ta esun cu a bay entrega e keho. Esaki tampoco mester ta asina.

Finalmente Bracho a bisa cu el’a haya e permiso oficial pa tene e marcha dia 3 di Juli 2020 y hunto cu tur e otronan den comunidad, su persona lo ta e responsabel y lo lidera e marcha.

LEAVE A REPLY

Please enter your comment!
Please enter your name here