Conforme legislacion di Aruba y Corsou, unicamente parehanan di sexo diferente por casa cu otro. Awe, Corte Comun a dicta dos sentencia, un di nan den un caso di Aruba y otro den un caso di Corsou, a base di cua parehanan di mesun sexo lo por casa cu otro den e dos paisnan aki den Reino. Na Aruba ta trata di un caso cu Fundacion Orguyo Aruba y dos hende muhe a entama contra Pais Aruba. Na Corsou ta trata di un caso cu Human Rights Caribbean Foundation y dos hende muhe a entama contra Pais Corsou.

Corte a distingui e siguiente tres preguntanan:

  1. Exclusion di matrimonio pa personanan di mesun sexo ta en pugna cu e tratadonan di derecho humano? Corte su contesta riba e pregunta aki ta negativo.
  2. Exclusion di matrimonio pa personanan di mesun sexo ta en pugna cu e Areglonan di Estado di Aruba y Corsou? Corte su contesta riba e pregunta aki ta afirmativo pa ambos pais.
  3. Ta cai bou di e tarea formativo di derecho di juez pa habri matrimonio pa parehanan di mesun sexo? Corte su contesta riba e pregunta aki tambe ta afirmativo.

Corte Oropeo pa Derecho Humano na varios ocasion a dicidi cu e Tratado Oropeo di Derecho Humano (Tratado Oropeo pa Proteccion di Derechonan Humano y Libertadnan Fundamental) ta permiti cu paisnan ta stipula cu unicamente parehanan di sexo diferente por casa cu otro. Corte Comun no ta considera su mes liber pa husga di otro manera cu Corte Oropeo a haci pa cu esaki. Ta crucial den e consideracionnan di Corte Oropeo cu e Tratado Oropeo ta inclui un disposicion den cua ta hancra e matromonio tradicional entre personanan di sexo diferente. Corte Oropeo a husga cu mester aplica e prohibicion di discriminacion contene den e Tratado Oropeo den estrecho coherencia cu e disposicion aki.

Sinembargo, ni e Areglo di Estado di Aruba ni e Areglo di Estado di Corsou ta inclui un disposicion asina tocante di matrimonio tradicional. Ambos Areglo sΓ­ ta inclui un prohibicion di discriminacion. Corte ta conclui cu exclusion di matrimonio pa personanan di mesun sexo ta en pugna cu e prohibicion di discriminacion aki. Pa tal motibo, Corte ta declara cu ta conforme derecho cu disposicionnan di legislacion di Aruba y Corsou lo no ta aplicabel, asina leu cu semehante aplicacion lo exclui e matrimonio entre dos persona di mesun sexo. Corte ta considera cu e decision aki ta cai bou di su tareanan como juez.

Den e caso di Corsou, Corte ademas ta observa cu ta viola e tratadonan di derecho humano y e Areglo di Estado di Corsou, pa motibo cu no a implementa e opcion di pareha registra (geregistreerd partnerschap).

Por lo demas, Corte a dicidi cu e sentencianan di awe no tin consecuencia pa e reglamento di adopcion. En conexion cu esey, Corte a considera cu e acceso na adopcion pa parehanan di e mesun sexo mester wordo debati prome, preferiblemente tambe den Staten.

No ta habri matrimonio pa parehanan di mesun sexo na Aruba y Corsou di inmediato. Mester warda prome si e partidonan recuri na casacion, y si ta asina, kiko Corte Supremo na Den Haag ta dicidi.

Por consulta e sentencianan atraves di www.rechtspraak.nl bou di:

ECLI:NL:OGHACMB:2022:134 y ECLI:NL:OGHACMB:2022:135

LEAVE A REPLY

Please enter your comment!
Please enter your name here