𝐏𝐚𝐫𝐥𝐚𝐦𝐞𝐧𝐭𝐚𝐫𝐢𝐨 𝐄𝐧𝐝𝐲 𝐂𝐫𝐨𝐞𝐬: 𝐏𝐫𝐨𝐲𝐞𝐜𝐭𝐨 𝐝𝐢 𝐋𝐮𝐳 𝐭𝐚 𝐜𝐨𝐧𝐭𝐢𝐧𝐮𝐚 𝐕𝐞𝐥𝐝𝐧𝐚𝐧 𝐝𝐢 𝐑𝐂𝐀, 𝐑𝐢𝐯𝐞𝐫𝐩𝐥𝐚𝐭𝐞 𝐲 𝐍𝐚𝐜𝐢𝐨𝐧𝐚𝐥 𝐭𝐚 𝐞 𝐬𝐢𝐠𝐮𝐢𝐞𝐧𝐭𝐞 𝐯𝐞𝐥𝐝𝐧𝐚𝐧 𝐜𝐮 𝐥𝐨 𝐡𝐚ñ𝐚 𝐋𝐄𝐃 𝐋𝐢𝐠𝐡𝐭𝐬 𝐮𝐥𝐭𝐫𝐚 𝐦𝐨𝐝𝐞𝐫𝐧𝐨

Parlamentario Endy Croes sumamente contento cu e proyecto di luznan LED cu a inicia bou Gabinete Wever Croes 2 ta continua manera a wordo planifica desde 2023. Luznan LED pa veldnan di RCA, Riverplate y Nacional ta na Aruba y e proyecto lo mester continua.

𝐏𝐫𝐨𝐲𝐞𝐜𝐭𝐨 𝐝𝐢 𝐋𝐮𝐳𝐚𝐧𝐚𝐧 𝐋𝐄𝐃 𝐩𝐚 𝐜𝐚𝐧𝐜𝐡𝐚𝐧𝐚𝐧 𝐝𝐞𝐩𝐨𝐫𝐭𝐢𝐯𝐨
Parlamentario Endy Croes ta splica cu desde 2023 a cuminsa traha riba un plan hunto cu FLPD pa asina por aloka fondo pa cambia e luznan existente di canchanan deportivo pa luznan LED ultramoderno cual sigur ta mas eficiente. Desde aña 2023 a concretisa e plan y e promer “order” cu a wordo haci tabata pa Palo Marga y Stadion Dakota mientras durante aña 2024 a haci e segundo ‘order’ pa e siguiente 6 veldnan. ( Madushi Stars, Estrella, Dakota, San Luis, Sportboys, Tankileendert). Mientras durante aña 2025 a order luznan pa RCA, Riverplate y Nacional. Manera ta conosi cu desde aña 1991 y 1992 tras di vision di x minister Hendrik Croes e tempo aya Lotto pa Deporte a percura pa ilumina mayoria veldnan na Aruba.
A introduci rond 34 aña pasa un marca Aleman marca “Strago” unda e systema ta traha cu un ‘step up’ trafo di 220V pa 440V volt cu lampinan halogeen di 2000 volt cada un cual ta produci masha hopi cayente. Ora paga e luznan aki mester warda e systema fria alrededor di 20-30 minuut prome cu por cende bek. Pues durante un wega of training esaki sigur no ta eficiente. Durante aña nan 2001-2005 x minister Ramon Lee a percura pa service y renoba e postenan di luz y pone lampinan nobo di mas o menos 18 veld y pone nan bek den bon condicion. Tras di vision di Gabinete Wever Croes 2 nos a bin cu un plan pa renoba e postenan y cambia e systema completo pa un systema di Led Light ultra moderno cual ta brinda mas claridad y ta mas eficiente y ta gasta menos coriente.

𝐏𝐥𝐚𝐧 𝐆𝐚𝐛𝐢𝐧𝐞𝐭𝐞 𝐖𝐞𝐯𝐞𝐫 𝐂𝐫𝐨𝐞𝐬 𝟐 𝐲 𝐅𝐋𝐏𝐃:
Proyecto pa renobacion y cambia e systema di luznan anterior anticua pa un systema moderno ta encera di 2 fase. Uno ta pa renoba e postenan existente usando materialnan moderno cu verfnan antirust super special pa e postenan por resisti e aire, salpetra cu ta condusi na corosion. Di dos fase ta cambia ful e systema di luz ( marca Strago y luznan Halogeen) pa un systema ultra moderno di Led Light. Beneficio nan ta hopi y entre otro por paga esakinan y cendenan cu un switch mescos cu un luz di cas, pues simpel y alinstante y ta elimina e step up trafo y e systema anterior. Mas klaridad y menos gasto.

Veldnan cu a haña y ta hañando Led Light di acuerdo cu e Plan 2023: Orguyosamente nos por bisa cu Palo Marga a ricibi 26 poste y 26 setup di led light ultra moderno, veld di Madushi Stars, Stadion GPT Dakota, Veld di Estrella, SV Dakota, San Luis, Sport Boys, Tanki Leendert, BMX Track na Jaburibari, Baskeball Court Village, BMX Track Streetwise San Nicolas ta entre otro tur e canchanan cu a forma parti di e vision ya caba a wordo transforma y tin nan Led Light kla y instala. Led Light pa veldnan di RCA, Riverplate y Nacional tambe a yega Aruba caba y lo wordo instala den e siguiente dos lunanan nos dilanti. Asina tin varios facilidadnan riba lista den e Plan cu lo yega na turno manera Flatstone, Nadi Croes y Crismo Angela, Piscina na Savaneta, Joe Laveist, veld di Brazil, Aruba Juniors, Dragon Hitters, Rooi Afo pa nombra algun di esnan cu lo pasa den e proceso aki. Banda di esaki tin plan pa instala luz na veldnan cu (nunca) tabata tin luz manera Unistars, Brazil, Santa Fe y Simeon Antonio (veld di x Dos Caminos). Ta di spera cu e plan aki ja caba den ehecusion por continua. E plan tey y fondonan tey. Solamente ta keda na esnan “encarga ” pa tin e boluntad y e curason na e lugar corecto.