𝐏𝐚𝐫𝐥𝐚𝐦𝐞𝐧𝐭𝐚𝐫𝐢𝐨 𝐄𝐧𝐝𝐲 𝐂𝐫𝐨𝐞𝐬: 𝐆𝐚𝐛𝐢𝐧𝐞𝐭𝐞 𝐄𝐦𝐚𝐧 𝐂𝐫𝐨𝐞𝐬 𝐦𝐮𝐢𝐬𝐬𝐭𝐢𝐥 𝐫𝐢𝐛𝐚 ‘𝐑𝐢𝐣𝐤𝐬𝐰𝐞𝐭’

𝐃𝐢𝐚 𝟏 𝐝𝐢 𝐌𝐞𝐢 𝐆𝐨𝐛𝐢𝐞𝐫𝐧𝐨 𝐦𝐞𝐬𝐭𝐞𝐫 𝐛𝐚𝐲 𝐝𝐢 𝐚𝐜𝐮𝐞𝐫𝐝𝐨 𝐲 𝐩𝐫𝐞𝐬𝐞𝐧𝐭𝐚 𝐮𝐧 ‘𝐑𝐢𝐣𝐤𝐬𝐰𝐞𝐭’?

Parlamentario Endy Croes ta splica cu dia 1 di mei venidero ta un dia crucial cu ta acercando y Gabinete Eman Croes ta masha masha keto riba e tema di rijkswet. Despues di hopi esfuerso di oposicion pidiendo un reunion finalmente e Presidente mediocre di Parlamento a yama e reunion aki pa dia 29 di april proximo cu Geoffrey Wever mientras MEP a pidi e reunion cu Mike Eman y Gerlien Croes. Mientrastanto e deadline di Gabinete Eman Croes ta dia 1 di mei proximo pa bay di acuerdo presentando un concepto nobo di un rijkswet.

Historia di ‘rijkswet en breve’:

Pandemia (Covid19) a asota mundo henter y a bati na porta di Aruba 13 di maart 2020. Aeropuerto a cera, hotelnan a cera y paga nan luz, nos fuente di entrada primordial a sufri un sla enorme. Un di cada dos adulto na e momentonan ey tabata depende di gobierno y gobierno mes no tabata tin fondo suficiente pa surpasa e pandemia. Esaki tabata e base pa bati na porta di Hulanda pa pidi un ayudo. Aruba a calcula y a entrega cuanto placa Aruba lo tin mester pa lunanan maart te cu juni y Hulanda a dicidi riba su mes cuanto placa e ta presta Aruba como ayudo. 

Dia 15 di mei 2020 na un manera inhusto y cual nunca mas Aruba lo lubida, Hulanda a dicidi unilateral y sin argumento cu Aruba mester corta 60 miyon pa aña den AZV sino no lo ricibi e ayudo financiero. Fin di juni 2020 e Secretario di Estado militar Knops sin ningun hustificacion a hisa benta (2) rijkswet e famoso (CHE y RAft) riba mesa, mas un cuchiu di 8 duim abusando di su poder na un manera di sino of fono. Asina Hulanda a deal den pandemia cu nos Minister President. Aki Hulanda (lesa: Knops) a splica cu lo bay yuda Aruba cu sosten di likides (‘liquiditeitssteun’) bou un solo condicion cu Aruba lo acepta e dos ijkswetnan aki. Desde juli te november 2020 a bringa cu Hulanda na un manera strategico riba nos propio forsa y 13 di november 2020 a bay di acuerdo cu Hulanda y a firma. E rason tabata cu placa lo a caba december y mester a scoge pa savalguardia e pueblo. Alabes nos Minister President saliente sra. mr. Evelyn Wever Croes a logra ricibi consehonan cu e dos leynan di militar Knops manera nan a wordo presenta no lo pasa via e proceso di Raad van State y nos tabata sa cu Raad van State lo bay ta hopi critico contra militar Knops y esnan cu a presenta e ley dictatorial di e forma aki. Pues nos ‘safety valve’ nan tabata ‘in place’ momento a firma. Claro no por a divulga esaki e momento ey. 

Rijkswet CHE a bira COHO na caminda y Raad van State a caba cune y a logra bari esaki di mesa. Hulanda a tene duro na e RAft cual finalmente 21 di februari 2025 ‘Rijksministerraad’ a tuma un decision cu ta kita esaki tambe for di mesa. Asina a logra bari tanto COHO y RAft for di mesa. Mientras ta negoshando un ‘Rijkswet’ nobo cual 1 di mei proximo Gabinete Eman Croes lo mester splica pueblo si nan ta bay di acuerdo pa presenta esaki. Nan sa kico ta para eyden awor como ta nan ta negoshando. Momento critico pa Aruba y spera e politiconan Mike Eman y Gerlien Croes no ta politiconan di panlefi y entreguista.

‘Rijkswet’ nobo cu Mike y Gerlien tin awor na nan encargo:

Nos semper ta cauteloso y ta bisa cu entre otro mester tin un bon exit ‘bepaling’. Tambe mester ta hopi cla cu Hulanda ta dispuesto pa re-financia debenan cu ta madura. Sino e ‘flie’ aki tampoco por subi. Mike Eman y AVP ta e mama di LAft y awor probablemente lo bira e tata di ‘Rijkswet’. No por ta asina cu bo ta acepta un ‘Rijkswet’ sin un salida. Tampoco un ‘Rijkswet’ cu un formula di un exit ‘bepaling’ di cual casi nunca bo lo logra sali. Mike Eman a presta 2.200 miyon (2.2 biyon) di aña 2010 pa aña 2017 sin importa e interes e tempo aya creando e Mega Debe.

Nos a percura pa corigi e mal maneho y laga miyones di surplus den caha. Evidente ta cu Aruba por maneha su propio pais momento hende drechi cu stima e pais aki ta na mando. Importante pa scucha posicion di AVP y Futuro ariba e tema aki. Futuro nos sa lo bende su alma mes pa haya poco placa mientras AVP pa un tempo largo tabata para fuerte contra ‘Rijkswet’.

E bala ta den nan scochi y nos peticion ta pa negosha inteligente cu e Hulandesnan sin mester core entrega autonomia pa un saco di placa. Lo monitor esaki di cerca. No entrega Aruba pa un saco di placa barata. Pa Corsou y St Maarten Hulanda a paga tur nan debe 10-10-10 momento nan a haya un ‘Rijkswet’! Manera Prome Minister saliente sra. mr. Evelyn Wever-Croes a splica cu a logra bari COHO y RAft for di mesa y laga 2 menu interesante atras. Un cu e receta di 6.9% y e di dos na 3.4% di interes. Lo keda pendiente pa e splicacion den Parlamento 29 di April proximo.