10 aña di prison exigi pa duo cu a exporta mas cu 100 kilo di cocaina den container
ORANJESTAD – Awe mainta e homber Venezolano E.F.(63) biba na Aruba y e Dominicano J.C. (52) biba na Aruba, a presenta dilanti Hues di Corte di Husticia pa e caso penal cu Ministerio Publico a cuminsa contra nan. Ambos ta wordo sospecha di ta complice di exportacion di en total 103 kilo di cocaine scondi den un container.
SOLO DI PUEBLO por a compronde cu tanto E.F. como J.C. ta bisa cu nan no sa nada di droga. Fiscal ta haya nan culpabel y a exigi 10 aña di prison pa cada un.
71 KILO DI COCAINA DEN PIEZANAN
Hues a cuminsa cu E.F., kende ta wordo sospecha di dos exportacion. E.F. a desmenti di ta envolvi den esaki. Hues a mustra cu na Polis, E.F. a admiti di ta envolvi. Den Corte E.F. a bisa Hues cu e no ta envolvi den e traficacion di droga. Hues a puntra con e piezanan a yega Fast Delivery. E.F. a bisa cu e doño di e piesanan a yam’e y bisa cu e piezanan ta cla pa hiba Fast Delivery. E.F. a bisa cu el a hiba e piezanan y a registra nan na Fast Delivery. Hues a remarca cu esey ta mustra cu E.F. ta envolvi. Segun E.F. e no tabata sa kico tin den e piezanan cu mester a wordo drecha. Hues a bisa cu E.F. a bisa Polis cu hunto cu J.C., nan a sconde e 71 kilo di cocaina den e piezanan y anterior a yega di haci’e caba. E.F. a bisa Hues cu ningun momento el a duna un declaracion asina na Polis. Hues a mustra cu na Hues Comisario E.F. a confirma cu loke el a declara na Polis ta e berdad.
PISTOOL PONI NA CABEZ
Hues a mustra cu E.F. a declara na Polis cu e tin un tempo caba den e mundo di droga y hunto cu un tal Yecid Marin Torres a trafica droga, door di sconde cocaina den airconan cu a bay Hulanda. E.F. a bisa Hues cu e no a declara asina. El a bisa cu e conoce e persona mas o menos 25 aña. Hues a bisa cu e no ta kere cu ta Polis a inventa e declaracion. E.F. a bisa Hues cu e no ta corda. Hues a puntra E.F. si el a wordo menaza. El a bisa cu no. Hues a bisa cu E.F. a declara cu un persona cu ta traha cu un tal M. a rabia y a menaza E.F. cu un pistool na su cabez. Esey a pone cu E.F. mester a viaha pa Hulanda pa mira si e cargamento a yega. Hues a bisa cu den e mundo di droga, e por imagina cu esnan den droga ta menaza esnan cu ta duna declaracion.
32 KILO DI COCAINA DEN CAHANAN
Hues a puntra riba e di dos exportacion caminda tabatin 32 kilo di cocaina scondi den cahanan. Segun E.F., el a wordo yama cu e cargamento ta cla pa hiba. E.F. a hiba e pallet di cargamento pa Fast Delivery y a duna e documentonan di carga. Hues a puntra E.F. si el a haya pago. E.F. a bisa cu no. El a bisa cu el a haya 4500 florin for di M. pa paga Fast Delivey. Hues a bisa cu na Polis E.F. a declara cu J.C. a haya 2500, el a haya 1500 florin. El a bisa cu J.C. tambe tabata envolvi.
UN SOSPECHOSO TA NENGA
Hues a puntra J.C. si e ta envolvi den e dos traficacionnan di droga. J.C. a bisa cu e no tin nada di haci cu e casonan aki. Segun J.C., E.F. ta gañando. El a bisa Hues cu e no sa nada di piezanan. Segun J.C., e no tabata na Aruba ora esey a sosode. Hues a bisa cu tin un testigo R. kende a bisa cu J.C. tabata presente. J.C. a nenga y a bisa cu R. ta gaña. El a bisa cu e no tin nada di haci cu droga. Pa loke ta e otro caso di cahanan riba pallet, el a bisa cu el a haci un fabor pa hiba algun cahanan di mudamento. E pallet di cahanan tabata riba tereno di J.C. na Seroe Janchi. Segun J.G., si e tabata sa cu tin droga den nan, e lo no a haci fabor.
FISCAL
Fiscal a bisa Hues cu dia 20 September 2023, Douane a controla container na Fast Delivery. Den piezanan di dos Caterpillar, a haya 71 kilo di cocaina scondi. E compania ta di E.F. E piezanan tabata riba e tereno na Seroe Janchi caminda J.C. ta biba. Segun Fiscal, un testigo a mira cu J.C. y E.F. tabata traha riba e piezanan. Ta asina cu E.F. a viaha pa Hulanda na momento cu e cargamento lo a yega. E.F. lo a bisa cu e 71 kilo ta di J.C. y na Seroe Janchi J.C. tabata prepara e piezanan. Fiscal ta haya cu E.F. a duna declaracion detaya. J.C. a bisa cu e no sa nada. Ta asina cu J.C. tambe a viaha cu E.F. pa Hulanda. Fiscal a sigui cu dia 23 September 2023 Douane a bolbe controla container na Fast Delivery caminda tabatin cahanan di mudamento. A haya 32.5 kilo di cocaina. A resulta cu ta E.F. ta esun cu a manda esakinan. Segun E.F., el a haci un tal Mati un fabor pa hiba e cahanan cu tabata na Seroe Janchi. Dos Curasoleño tabata na J.C. Fiscal a bisa cu aunke cu J.C. ta bisa cu e no sa di droga, un testigo a bisa cu E.F. y J.C. tabata ocupa cu e cahanan y otro hendenan tambe tabata presente. Na opinion di Fiscal, aki ta trata di mas cu 100 kilo di cocaina cu J.C. y E.F. ta complice. El a mustra cu J.C. tin un condena di a forma parti di un organizacion criminal di droga. Fiscal a bisa cu e autonan y e placanan confisca lo por wordo debolbe.
Fiscal a exigi 10 aña di prison pa E.F. y J.C.
ABOGADO
Mr. Canwood di E.F., a bisa Hues cu promer E.F. a admiti dos biaha pero despues a nenga. Na opinion di e abogado, esaki por sosode pasobra cu e traduccion di idioma ta trece duda. E ta haya cu no por bay tras di declaracion di e testigonan. Mr. Canwood a bisa Hues cu el a keda sorprendi cu e castigo exigi pa Fiscal. El a remarca cu tabatin caso di 8 aña di prison pa 1 mil kilo. El a pidi Hues pa duna castigo husto.
Mr. Illes di J.C. a bisa cu ta E.F. a declara contra J.C. y J.C. ta para riba cu e no sa nada di droga. E abogado ta haya cu e declaracion di E.F. no ta suficiente pa condena J.C. Un testigo no ta wordo considera como prueba. El a bisa cu a laga scucha e testigo A. atrobe y a resulta cu ta a base di potretnan ta saca conclusionnan cu no ta e berdad. Segun mr. Illes, e testigo A. a bisa cu J.C. tabata traha riba un transmission y e piezanan tabata otro caminda. E testigo a bisa cu A. a declara cu e no a bisa cu el a mira E.F. y J.C. ta traha riba e piezanan. E abogado a mustra cu e otro testigo R. tambe a gaña y despues durante interogacion a sali na cla cu ta un tal Mario a acerca R. pa busca e piezanan. Mr. Illes a bisa Hues cu J.C. no tabata na Aruba pa a traha riba e piezanan. El a conclui cu no tin prueba di complicidad. J.C. a viaha pa Hulanda pa bay mira su yiunan y no pa mira si e container yega. E abogado a bisa Hues cu e ta haya cu mester declara J.C. liber. Hues a sera tratamento di e caso y a bisa cu dia 3 Mei 2023 lo tin sentencia.
