Diabierna mainta Corte di Husticia a trata e caso penal cu Ministerio Publico a cuminsa contra e homber G.E.T. (40), sospecha di a importa droga entre 24 y 26 December 2024 y cu a causa morto di Timoty D’Aguiar riba 26 December 2024. E defunto D’Aguiar a guli 42 bolita y 2 a kibra den su stoma.
SOLO DI PUEBLO por a compronde cu Fiscal a remarca cu algun aña pasa G.E.T. a wordo condena pa un caso similar caminda un gulido di bolita a fayece y awor ta bolbe haci mesun cos. Fiscal a exigi 10 aña di prison.
SOSPECHOSO A FIA E VICTIMA PLACA
Hues a puntra G.E.T., si e tabata envolvi den transportacion di droga. Segun G.E.T. e tin un parti aden pero no a trafica droga. El a bisa Hues cu e ta hopi bon amigo cu Timoty y cu mientras cu e tabata sera den KIA, el a fia Timoty placa pa e bay busca droga na Colombia. Segun G.E.T., Timoty no tabatin trabao y cu Timoty a bis’e cu el a haya oferta di bay busca droga y cu e deal ta cu 60 porciento di e droga ta pa e doño y 40 porciento ta pa Timoty. Segun G.E,T., el a pidi Timoty fabor pa busca un hangua cu ta masha gusta pa hende usa. El a duna Timoty 400 dollar pa cumpra injeccionnan. G.E.T. a bisa Hues cu for den KIA, e tabata yama Timoty na Medellin, Colombia y el a ripara cu Timoty tabata hopi droga. Despues Timoty a yama G.E.T. y bisa cu el a haya e bolitan y cu nan lo a horta e 400 dollar cu G.E.T. a dun’e pa cumpra injeccionnan. G.E.T. a rabia cu su placa a disparce. El a sigui bisa Hues cu despues Timoty a mand’e film con e ta baila y tabata mal droga. G.E.T. a bisa cu el a yama e pareha di Timoty, e dama Wolff pa bis’e cu Timoty no bula su siguiente dia den e estado cu e ta. Un dia despues Timoty ta yam’e y bise cu e no a bin cu droga pasobra e bolitanan ta mal traha y nan a laga drecha esakinan.
E VUELTA DI DROGA A FAYA DOS BIAHA
Hues a bisa cu e ta haya cu G.E.T. ta hopi envolvi den kico Timoty ta haci. Segun G.E.T., e ta bon amigo di Timoty y pesey tabata preocupa cu algo ta pase. Tur e tempo ey G.E.T. ta sera den KIA. G.E.T. a sigui bisa cu un siman despues, Timoty a bay bek Colombia pa busca e bolitanan. Na dado momento e amiga Wolff a notifica G.E.T. cu Timoty no a bin bek Aruba y e mester un ticket nobo. G.E.T. a manda placa pa un otro ticket. Segun G.E.T., door cu Timoty a droga, e no por a bin. A cumpra un otro ticket di mas cu 700 florin y asina Timoty a bin Aruba. Dia 29 November 2024, G.E.T. a sali for di KIA. El a massage Timoty y despues a bay bishit’e. El a haya Timoty mal droga. Nan a cuminsa papia atrobe. Despues Timoty a bisa G.E.T. cu cos ta hodido y si por yud’e cu cen pa e bay haci un Vuelta na Colombia. G.E.T. a bisa cu e unico manera cu e por fia Timoty placa atrobe, ta si Timoty ta bay cu un hende pa wak p’e. E ora G.E.T. a pidi un amigo J.M.Z. pa bay cu Timoty. E amigo J.M.Z. a bay di acuerdo. G.E.T. a fia Timoty 400 dollar. Nan a bay Colombia. G.E.T. a bisa Hues cu dia 26 December 2024, Timoty a yam’e y a bisa cu tur cos a bay bon. G.E.T. a bisa cu el a bisa Timoty come bon pa asina e saca tur e bolitanan. Na dado momento Wolff a yama G.E.T. y bisa cu Timoty a bira malo y ta sinta den baño y no ta haci nada. G.E.T. a bisa Wolff pa yama ambulance y despues G.E.T. a haya sa cu Timoty a fayece. J.M.Z. a bay serca G.E.T. y bisa cu Recherche ta na su cas. G.E.T. a bisa J.M.Z. pa bay para e auto un caminda y e ta busca J.M.Z. y su amiga. G.E.T. a bay cu J.M.Z. y e pareha na su cas caminda el a splica nan pa nan prepara pasobra Polis lo detene J.M.Z. Un rato despues, Polis a bay na cas di G.E.T. y detene nan tur.
Hues a remarca cu en total G.E.T. a fia Timoty mas o menos 2500 florin. Hues a puntra, di unda G.E.T. a saca tur e placa aki siendo cu G.E.T. tabata sera. Segun G.E.T. mientras cu e tabata sera den KIA, e tabata fia placa na hende y gana porciento. El a bisa cu hende tabata haci’e p’e.
SOSPECHOSO TA RECLAMA SET UP DI POLIS
Hues a mustra cu dia 26 December 2024, Polis a haya informacion cu un homber a muri door di guli bolita. A resulta cu Timoty a guli 42 bolita cu ta 504 gram y 2 bolita a kibra den su stoma. Investigacion di Polis ta mustra cu e pareha di Timoty, Wolff, a bisa cu Timoty sa bay busca droga na Medellin y bin bek. Wolff a sigui bisa cu ta di 3 biaha cu Timoty a bay busca droga y cu ta G.E.T. a mand’e. G.E.T. a paga e dos promer viahenan y estadia. J.M.Z. a bisa Polis cu ta G.E.T. a pidi’e pa bay y vigila Timoty. J.M.Z. a bisa cu e no a yuda Timoty guli bolitanan. Na Polis G.E.T. a bisa cu e no tin nada di haci cu e caso aki.
Den Corte, G.E.T. a bisa cu bisa Hues y Fiscal cu loke e pareha di J.M.Z., e dama Sanchez a declara no ta berdad. El a bisa cu e no a bisa Polis nada riba e preguntanan. Segun G.E.T., ora el a haya su declaracion pa firma, el a constata cu Polis a yena un di e preguntanan, siendo cu e no a duna contesta. El a reclama esaki na e team di investigacion y nan a bay drech’e. Hues a confronta G.E.T. chat entre Wolff y G.E.T., caminda G.E.T. ta bisa Wolff pa laga Timoty come pa saca nan mas liher posibel. Mester tin hopi hende. Hues a mustra cu tin chat entre Timoty y G.E.T, caminda ta papia di vueltanan pa Colombia. Segun G.E.T., tur esaki ta un set up di Polis contra dje, pasobra Polis a coy cierto parti so di e chata pa laga mustra cu ta G.E.T. ta esun cu a manda Timoty. Fiscal a puntra G.E.T. pakico, despues di 9 luna sera, e ta tira culpa riba Polis di a set up y cu ta Timoty su culpa cu el a guli bolita y fayece. G.E.T. ta para riba cu e no tin nada di haci cu esaki y cu ta Polis a haci set up. G.E.T. a bisa cu e no tin confianza riba e team di investigacion.
10 AÑA DI PRISON EXIGI
Fiscal a bisa Hues cu dia 26 December 2024, Polis a bay na un cas caminda un hende a muri door di droga. El a guli 42 bolitanan y 2 bolita a scheur. En total 504 gram di cocaina. E pareha di Timoty, Wolff, a bisa cu ta G.E.T. a manda Timoty busca bolitanan. J.M.Z. mester a viaha cu Timoty pasobra G.E.T. no ta confia Timoty pasobra 2 biaha Timoty no a bin cu e bolitanan. Den cellular di Wolff a haya chat di Timoty cu G.E.T. caminda ta saca afor cu G.E.T. a manda Timoty bay busca droga. Fiscal a mustra cu na October, November y December 2024, Timoty a viaha pa Colombia. Fiscal a mustra cu na Juli 2025, J.M.Z. a wordo condena na 2 aña di prison. E pareha di J.M.Z., Sanchez, a bisa cu Timoty lo mester a bay busca droga y J.M.Z. mester percura pa Timoty guli tur e bolitanan pa G.E.T. Fiscal a remarca cu despues di 9 luna, G.E.T. ta bin cu un storia no creibel cu Polis a traha un set up contra dje. Fiscal a bisa cu ta di lamenta cu G.E.T. ta culpa Timoty di cosnan y Timoty no tey pa defende su mes. Fiscal ta haya cu Timoty a guli bolitanan riba orden di G.E.T. y J.M.Z. mester a contola cu Timoty ta guli e bolitanan. Fiscal ta haya cu G.E.T. ta culpabel di traficacion di cocaina y tambe cu G.E.T. a causa morto di Timoty. Fiscal a mustra cu na 2021, G.E.T. tabata envolvi den un caso di droga caminda un mula a muri door cu bolitanan di droga a kibra den su stoma. Esaki no a pone G.E.T. stop. Fiscal a exigi 10 aña di prison pa G.E.T.
ABOGADO
Mr. D.Croes a bisa Hues cu e ta haya cu mester declara G.E.T. liber pasobra G.E.T. no tin nada di haci cu e traficacion di droga. El a mustra cu e defunto Timoty mes a bisa den chat cu e ta un mula loyal di cocaina. El a mustra cu den chat Timoty ta mustra con el a hera muri cu droga. Timoty a pidi G.E.T. fi’e placa pa e bay Colombia. Timoty tabata den un situacion financiero fastioso y lo tabata debe otronan cu e mester a cumpli cu droga. E abogado ta haya cu e team di investigacion di Polis, a formula declaracionnan pa mustra cu ta G.E.T. a manda Timoty bay busca droga. Segun e abogado, G.E.T. a pidi J.M.Z. pa compaña Timoty pa percura cu e biaha aki si Timoty ta logra pa asina Timoty cumpli cu su obligacionnan. Na opinion di abogado mr. Croes, no por saca ningun prueba cu tabata e intencion di G.E.T. pa Timoty busca droga p’e. Ta Timoty tabata kier a bay pa su mes pa drecha su situacion finaciero. E abogado ta haya cu no por tira culpa riba G.E.T. pasobra el a fia Timoty placa. El a mustra con Timoty tabata papia cu el a yega di guli bolitanan caba y trece Aruba. E abogado ta haya cu Timoty tabata conciente pa guli asina hopi bolita. E abogado a conclui cu G.E.T. no tin nada di haci cu e transporte di droga y e ta lamenta cu su amigo Timoty a fayece.
Hues a sera tratamento di e caso y a bisa cu e ta bay studia e caso y 24 October 2025 lo tin sentencia.
