1. 
   FOL acuerdo colonial, basenan militar peligroso
   
   
   E acuerdo Fol firma na maart 2.000 y cual lo termina na fin di Oktober 2026.

E acuerdo colonial firma entre Gobierno Mericano, gobierno Hulandes, tambe firma pa e gobiernonan di Aruba y di Antiyas a inicia 2 maart 2000, ta dura te fin di Oktober 2026.

Mi ta corda con den programanan sindical di SEPPA mi a duna critica pisa, pasobra e ta un acuerdo gekonkel na Den Haag y Washinton. E mesun mentalidad colonial, unda desicionnan importante pa e colonisadornan ta ser tuma den e metropolnan. Aruba, ni Corsow como colonia no tin nada di bisa, pero nan a wordo obliga pa pasa e ley di FOL (Forward Operation Location) den nan parlamento.

Mi ta corda manera e dia di ayera, mi so den tribuna di Parlamento di Aruba, gritando contra e acuerdo cual ta un base militar peligroso pa Aruba, un isla turístico, unda e base ta sitúa ariba tereno di Aeropuerto. Tambe cu e problema di gueriya na Colombia ta problema di Colombia, no di Aruba. E tempo ey e intención di FOL, según e Mericanonan y Hulandes tabata contra gueriya Colombiano. Final di 1999, Chavismo no tabata wordo mira ainda como un problema pa Merca. Pero sigur cierto Mericanonan=CIA, ya tabata calcula kico po spera di Chavismo, cu na november 19.99 tabata 10 luna gobernando Venezuela.

1. Situacion 19.99 na Colombia

E situación na e momento ey, na final di siglo pasa tabatin hopi confusión na Colombia.

E decisión di FARC/EP (Fuerzas Armadas Revolucionarios de Colombia/Ehercito del Pueblo) pa bay den e proceso di paz. Hunto cu partidonan di Izkierda a funda UP (Union Patriotica), durante e añanan 80 di siglo pasa. Resultado tabata un matanza grandi di lidernan di Izkierda. Esnan responsable pa e matanza grandi aki ta e Para-Militarnan, apoya pa politiconan di ultra-derecho. E matansanan aki a crea dañonan grandi na FARC/EP. Como 6 pa 10 mil lidernan di UP a ser asesina, entrenan e tata di e actual candidato pa Pesidente di Pacto Historico, Ivan Cepeda. Otro grupo di alrededor 6 mil líder a busca refugio den exterior. Un parti grandi di militantenan di FARC/EP tabata bao di esnan asesina. Dos Lider/Candidato pa presidente na Colombia a ser asesina. Jaime Pardo Leal na 1987 y Bernardo Jaramillo na 1990. Un grupo grandi a bay bek den gueriya y un parti a drenta den e alianza cu M19, despues di e acuerdo di paz cu M19. Na november 2016 a firma e acuerdo di Paz, FARC/EP cu Gobierno Colombiano. E argumento di Merca pa establicimentonan di FOL tabata pa controla e gueriya na Colombia, specialmente FARC/EP y tambe seramente di su basenan militar na Panama.

Despues di e acuerdo di Paz aki, e focus a bira ariba e gobierno Chavista na Venezuela.

1. Conferencia na De Balie na Amsterdam di 11 pa 13 november 19.99.

Mi protestanan/criticanan contra e base militar FOL na Aruba a ricibi acogida pafor di Aruba y mi persona a wordo invita pa participa y duna mi opinión ariba e Basenan FOL na Aruba, na Corsow y na otro paisnan Latino-America den un conferencia di T.N.I. ( Trans National Institute. “ At the edge:Towards a 21^st Century Internationalism” den De Balie na Amsterdam. Esnan cu sa cu den De Balie tin como 7 pa 8 salanan grandi unda tabatin varios gruponan di trabao. Como 350 lidernan di varios paisnan na mundo a participa na e conferencia aki, cual tabata parti den hopi sesionnan. Pa loke ta e parti di Latino-Aamerica mi a presenta mi ideanan. Mi a presenta mi informacionnan y participa den e discusionnan cu hopi documentonan ariba FOL, cualnan a capta atención. Despues TNI a hincami den un delegación internacional pa bay papia cu Parlamentarionan di Costa Rica. Na Costa Rica tambe, Merca kier a pone un base FOL. Tabatin un falta grandi di información, kico ta e consecuencianan di un base FOL na Costa Rica. Nos informacionnan a yuda hopi. Parlamento di Costa Rica después a rechasa e petición di Merca.

1. Peticion pa Paz na Colombia. Pasamento di basenan militar Mericano pa Panama.

Tambe mi a ricibi invitación for di e presidente di e comisión Colombiano kende ta bay entrega un petición pa PAZ na Colombia, pa mi persona forma parti di e delegación Internacional pa entrega di un Peticion pa Paz na Colombia na december 1999. Esaki hunto cu delegación grandi di esnan cu kier paz na Colombia, entre nan, varios Arzobisbo Catolico. E entrega di petición di Paz a sosode na e pueblo San Vicente de Cajuan den e departamento Caqueta.

E presidente di e comisión cu ta bay entrega e petición di Paz, na Caqueta tambe tabata forma parti di e delegacion Anti-FOL, cu a bay Costa Rica. Pa motibo di seguridad mi no a bay San Vicente de Caguan. Tambe mi a ricibi invitación pa bay Panama, na final di 19.99 pa presencia actividadnan den pasamento di e basenan militar Mericano pa Panama. Mi a bay Panama y a atende varios actividadnan relaciona cu e pasamento di basenan militar Mericano pa Panama . Esaki tambe ta un di e motibonan pa crea e basenan militar Mericano FOL. Durante e dianan di final di 19.99, e canal di Panama tambe a ser pasa pa Panama.

1. FOL ta peligroso pa Aruba , nos no mester prolonga e acuerdo.

Biniendo bek ariba e posición di Aruba, relaciona cu FOL, awor aki e ta mustra hopi peligroso pa Aruba considerando e menasa grandi di Merca contra Venezuela. E basenan militar Mericano FOL na Aruba y Corsow ta e basenan militar Mericano arriba terreno di e destinto aeropuertonan y nan ta esunnan mas cerca di Venezuela. Si guera start ta lógico cu e basenan militar di enemigo mas cerca ta e prome pa ricibi atakenan feroz y cual lo destrui nos único Aeropuerto, nos lo keda mal para cu nos turismo, cual sigur lo baha te na cero y pa e subi bek na un nivel acceptabel, ta dura varios aña.

Awor nos na Aruba y na Corsow mester inicia un discusión político pa no prolonga e basenan FOL pa después di oktober di e aña venidero.

Como islanan turístico y chikito nos no mester di basenan militar di ningún país. Nos lema mester ta cu na un isla chikito y turístico ta reina PAZ. Nada di base militar, tampoco di Hulanda, ni di otro paisnan.

2. E guera psicologico na Venezuela.

2.1. Guera psicologico

For di final di augustus nos conoce un situación cerca nos país bisiña Venezuela, unda Merca a posiciona barconan di guera dilanti costa di Venezuela den awanan internacional.

E argumento di Mercda ta cu Venezuela ta un narco-estado, cu Presidente Maduro ta e hefe di e cartel de los soles, sin trece pruebanan palpabel, pero referiendo na medianan inconfiabel manera “60 Minutes”. E cartel de los soles ta algo di e epoca di Pablo Escobar, di 1988 pa 1992, tempo cu tabata menciona cu algún general Venezolano tabata yuda pa droga pasa arriba e territorio Venezolano. Pues e época di e gobiernonan Adeco y Copeyano, prome cu Chavismo.

Pero ora Merca kier logra algo e mes ta inventa e argumento=gañamento sin tene cuenta si e argumento ta veridico. Esey ta e situación awe, unda Merca a pone un premio arriba cabes di Presidente Maduro di 50 miyon dollar, accentuando cu Maduro ta hefe di e Cartel de los soles. Na Merca mes ta poco hende ta kere e storia di gobierno Trump, na resto di Mundo ta pio, un pipita di hende so ta kere e storia aki. Hasta DEA e agencia Mericano pa loke ta e trafico di droga y tambe for di e agencia pa combati droga for di UNO ta desmentí e ponencianan aki di Gobierno Trump.

Tur e bulalu di Merca/Trump cu su Guera Psicologico ta pa e petroli Venezolano.

2.2. Apoyo na Gobierno/Trump ta bahando y apoyo na Gobierno/Maduro ta crece.

For di ultimo simannan di augustus e guera sicologico di Merca contra Venezuela a start.

Ta bisto un desaroyo, unda Merca cada biaha ta perdiendo mas credibilidad, cual a yega na un extremo cu un media norte-americano, pro partido democrata, CBS-news e siman aki a bisa cu 97% di Mericanonan no ta apoya un invasión o atakenan contra Venezuela. E ta lógico tambe: Uno, unda e rason político of di cualquier índole pa un país grandi ataca y ocupa otro país pa gara su rikesanan, ta?

Di dos, e posicionnan di Trump, pa hopi considera como un “Loco” y kende constantemente ta cambia di opinión, mainta e ta bisa SI pero pa 12’or di merdia ya e SI a bira un NO.

Na Venezuela ta net lo contrali. Si e gobierno Maduro tabatin apoyo di alrededor di 60% di pueblo, ora e guera sicologico a start, awe e apoyo ta banda di 95%. Cual ta lógico tambe, solamente traidornan ta duna su apoyo, pa un otro país ataca bo propio país. Tambe Venezuela tin lidernan kendenan ta vocifera e posición di Venezuela hopi cla y cu bon argumentonan. Nos ta wak y tende Presidente Maduro, vice-presidente Delci Rodrigues, Ministro di Asuntonan Interno y di Inteligencia Diosdado Cabello, Ministro di Defensa Padrino Lopez, Fiscal Ggeneral Tarik Wiliam Saab, Presidente di Asamblea General Jorge Rodrigues. Tur cu un bon conocimento di e materia y cu un bon discurso.

Loke ta visto tambe ta e hecho cu no tin oposición abierto na Venezuela, na favor di Merca.

2.3. Internaciolmente e apoyo na Venezuela ta creciendo.

No solamente e apoyo político arriba terreno internacional pa Venezuela ta creciendo, pero tambe e apoyo militar, specialmente di otro dos podernan militar na Mundo cual ta Rusia y China. Según prensa hopi ta e armanan sofestica cu Venezuela ta ricibi y cu e mas di dos millón miliciano bon entrena y armẚ. Pero mientrastanto Trump a bisa den un comunicado cu e a será espacio aéreo di Venezuela. Algo cu no ta cay bao di su competencia y unda cu e bay cu e posición aki e ta perdi. Na Merca mes ta solamente e hendenan cu un mente transforma igual na Trump ta apoye. Pero mientrastanto Trump a bisa den un comunicado cu e a será espacio aéreo di Venezuela. Algo cu no ta cay bao di su competencia y unda cu e bay cu e posición aki e ta perdi. Na merca mes ta solamente e hendenan cu un mente transforma igual na Trump so ta apoye.a ta haci cu e ocupación di Venezuela ta birando difícil pa Merca. Tambe e arsenal di armanan sofestica y dronnan cu Venezuela ta ricibi di Rusia, China y Iran, ta haci Venezuela un bastion militar fuerte, cual ta difícil pa ehercito Mericano drenta y ocupa Venezuela. E ehercito Mericano tin avionnan poderoso, pero poco a poco, Venezuela ta consruyendo un defensa aéreo ront di Caracas, cu S-300-nan y S-400-nan Rusiano y tambe cu otro anti-Aereonan di China . E mihornan di mundo.

Tambe Venezuelo, según prensa ta recibiendo misilnan supersonico for di Rusia, China y Iran, hunto cu tecniconan. Pues Venezuela tin un defensa bastante solido y un ehercito grandi, hunto cu su milicia pa defende su mes si e guera ta ariba teritorio di Venezuela.

Mas e guera Psicologico den e forma actual sigui, mas difícil e ta pa Merca por gana e guera.

E pregunta ta si nos ta yegando na final di e guera Psicologico, Maduro cu Trump a combersa, no tin acuerdo ainda, pero lo bini mas combersacionnan pa purba di yega na acuerdonan. Barconan di guera entrenan partavion Gerald Ford mientrastanto ya ta regresando Merca.

Pues importante ta cu tin combersacionnan pero e pregunta grandi ta kico lo pasa ainda pa resto di 2025 y 2026, mientras Trump ta envolví.

3. E Guera Psicologico na Venezuela=un problema di Geo-politica.

Na 1823 Presidente di Merca a proclama e doctrina Monroe cu intervención di paisnan di Europa na Continente Americano ta ser considera un acto di Agresion contra di Estados Unidos di Merca. Na 1823 e nificacion tabata pa ningún país di Europa tin colonia na Continente Americano. Pero después, e doctrina Monroe a ser uza pa legalisa tur intervencionnan di USA na Centro- y latino-America, tambe den Caribe. Mientrastanto tur hende sa con Merca su su aliadonan den NATO na Europa si por rondona Rusia y China cu basenan militar.

Awe China y Rusia ta reta Merca pa termina cu e doctrina Monroe, después di 200 aña, cu nan apoyo grandi na Venezuela, den cual tin armanan sofestica manda pa Venezuela, cu Merca no tin defensa contra nan. Nan kier haci bon uzo di e materianan prima den suelo di Latino-America y Rusia y China semper nan a apoya Chavismo. Pues e crisis actual cu e guera Psicologico di Merca contra Venezuela tambe ta un problema Geo-Politico

Na mi humilde opinion Top of Form

nos por spera 3 scenario.

3.1. Scenario 1, e scenario mas probable.

E situación ta sigui loke mi a expresa den 2.1., 2.2. y 2.3., adicionalmente ta duna malor na e combersacionnan di Trump cu Maduro cual a cuminsa un siman pasa. Ta bisto cu Trump y Rubio a trece menasanan contra Maduro ya cu Trump a scirbi un comunicado cu e a será espacio aéreo di Venezuela. Algo cu no ta cay bao di su competencia y unda cu e bay cu e posición aki e ta perdi. Na Merca mes ta solamente e hendenan cu un mente transforma igual na Trump y Marco Rubio ta apoye. E parti bon di e combersacion ta cu e canal di comunicación ta habri pa mas deliberacionnan. Tin hopi expectativo cu pronto e negociador di Trump y di e companianan petrolero, Richard Grenell ta na Caracas pa sigui cu e negociacionnan arriba petroli Venezolano pa e companianan petrolero Mericano.

Na Venezuela, e fiestanan di fin di aña ta sigui den grandi y Maduro bailando di alegria.

Pues Scenario 1, ta esun cu rason ta gana e argumento traha y mentiroso ariba e Cartel de los Soles, pues algo veridico ariba kico ta e berdad. Ta e scenario di hendenan di bon Boluntad, ta esun di PAZ, ta esun di Diplomacia, esta di kier sinta na mesa papia y busca solución. E posición cu semper Venezuela a propaganda, desde augustus 2025, ora e crisis=guera Psicologico a inicia. Merca y Venezuela ta dialoga arriba e rikesanan di Venezuela. Pa Aruba como isla Chikito y turístico cerca di Venezuela e ta e mihor solución.

Maske un grupo grandisimo di nos hendenan na Aruba cu ta sigui informacionnan di medionan Mericano y Hulandes ta prefera cu Merca lo ta esun pa keda dicidi na Venezuela.

3.2. Scenario 2, e guera sicologico ta sigui durante 2026.

E opción aki ta posibel, considerando:

1. Cu Marco Rubio tin un política clave den gobierno Trump y kende semper kier caba cu e gobierno Cubano, e gobierno Sandinista na Nicaragua y e gobiern Chavista na Venezuela. Tambe teniendo na cuenta cu hopi biaha Trump ta sigui su consehonan;
2. E defensa militar fuerte di Venezuela cu su misilnan ultra-moderno Supersonico y un ehercito di 250 mil militar y algún millón di milicianonan bon arma ta un weso duro pa Merca kibra. Esaki, apesar cu Merca tin un forsa Aereo hopi fuerte, pero Merca no ta dispone di alrededor di 200 mil militar pa ataca y ocupa Venezuela.

Pa Aruba como isla turístico, cerca di Venezuel e ta malísimo. Hopi cos ta keda stanca.

3. Scenario 3, un guera ta surgi prome cu fin di Aña o durante 2026.

E scenario aki ta un desaster, sigur pa Caribe completo y tambe pa Centro- y Sur-America.

Tambe e guera aki por bira un guera mundial cu tur e consecuencianan pa humanidad.

Aruba como isla chikito, mas cerca di Venezuela ta bay sufri mashar hopi mes. Turismo lo cay completo. Ariba tur terreno e ta un sla duro. Según mi un opción cu tur hende cu ta pensa correctamente ta bay rechasa.

3. Na Final ta bon pa analisa e cambionan Geo-Politico.

Según hopi expertonan ariba terreno di política Internacional tin mas cu 95% di posibilidad cu scenario 1, ta bay Sali for di e guera psicológico. Pues si analisa e ponencia di Prome Ministro di Hulanda Schoof, relaciona cu e postura di Hulanda pa haci limpi e terreno di e refinaderia na Aruba, ta sigur cu expertonan di Hulanda ta calcula tur cos correctamente. Venezuela, sigur ront di e Lago di Maracaibo y e islanan Aruba y Corsow, lo tin un boost económico. Nos Prome-ministro a keda para manera un bufon banda di Schoof.

Na Hulandes nan ta bisa: Voor wat, Hoort wat= Nan ta desea algo bek.

Tambe e cambionan Geo-Politica na mundo unda nos ta bay haya un Nato kibra, si considera e situación ta actual cu diferencianan grandi entre Merca y paisnan di Europa. Aserca un Europa y Hulanda, cada dia mas débil. Hunto cu esaki nos tin BRICS y otro podernan nobo na mundo, sigur den Caribe, cualnan ta bay exigi cambio den e actual structura estatal den Caribe Hulandes.

Sigur un opción cu ta bini dilanti den discusionnan ta: INDEPENDENCIA.

Tambe, considerando e acontecimentonan awendia na Aruba.

Nos na Aruba mester prepara nos mes bon pa e situación Geo-Politico nobo.

Gregorio Wolff 29 november 2025