Diahuebs a tuma luga e ceremonia oficial di huramentacion di 14 agente policial nobo di klas N2 2026 di Cuerpo Policial Aruba (KPA). E ceremonia a conta cu presencia di Minister di Husticia, Integracion, Transporte Publico y Energia Arthur Dowers, Hefe di Polis Ramon Arnhem, Procurador General di Aruba, Amalin Flanegin, como tambe famianan y amistadnan di e agentenan nobo.
Durante e ceremonia, e 14 agentenan a huramenta, oficialmente marcando un momento importante den nan carera profesional y nan compromiso pa sirbi y proteha comunidad di Aruba. E huramentacion ta representa e responsabilidad cu cada agente ta asumi pa eherce su funcion cu integridad, disciplina, profesionalismo y respet pa ley.
Minister Dowers ta considera incorporacion di e 14 agente policial nobo un paso positivo den e esfuersonan continuo pa fortalece Cuerpo Policial Aruba. E minister ta enfatisa cu inversion den formacion y desaroyo di personal policial ta esencial pa garantisa cu KPA tin e capacidad necesario pa atende e desafionan den area di husticia y siguridad publico.
E profesion policial ta exigi dedicacion, responsabilidad y un compromiso firme cu comunidad. Cada agente tin un rol importante den mantencion di orden publico, proteccion di ciudadanonan y cumplimento di ley. Confiansa di comunidad den Cuerpo Policial ta depende tambe di e manera cu cada agente ta eherce su responsabilidad diariamente.
Cu e incorporacion di klas N2 2026, Cuerpo Policial Aruba ta sigui fortalece su capacidad operacional y su presencia den comunidad, como parti di e esfuersonan pa contribui na un ambiente mas sigur pa tur habitante di Aruba.
Minister Dowers a felicita e 14 agente policial nobo pa e logro alcansa y ta desea nan hopi exito den e siguiente etapa di nan carera, cu e responsabilidad importante di sirbi pueblo di Aruba cu integridad, respet y dedicacion.
