Awe mainta Hues di Corte den Promer Instancia, a dicta sentencia den e caso penal cu Ministerio Publico a cuminsa contra e hoben homber D.H. (18).
SOLO DI PUEBLO por a compronde cu Hues ta haya D.H. culpabel di intento di mata, door di a manda auto cu velocidad halto riba e homber P.
Den sala di Corte tabata presente e mayornan di D.H. y e homber P. Por a mira cu e homber P. ta mucho mas grandi cu D.H.
PURBA MATA CU AUTO
Hues ta haya legalmente proba cu D.H., dia 25 Mei 2025 a purba di mata e homber P. Hues a bisa cu a mira e video di seguridad cu a graba tur cos. A pasa e video aki durante tratamento di e caso. Hues a bisa cu por a mira cu D.H. a bay cu e auto cu velocidad riba e scooter y e homber P. El a dal den e scooter y e homber P. a bula un banda. P. a coy un machete y bay riba e auto. D.H. y un ocupante a sali for di e auto. Por a mira cu e ocupante tabatin algo den su man. E momento ey, por a mira cu P. a spanta y a core bay y un dama bisti na cora cu a sali pafor, tambe a spanta y core bay.
Hues a mustra cu D.H. a bisa cu e tin rabia riba e homber P., y a tuma venganza door di dal e scooter di P. cu e auto. Hues a bisa cu e pregunta ta, si por papia aki di intento di mata. Pa conclui esaki mester puntra si D.H. a mira P.
Na opinion di Hues, D.H. a bisa Polis cu el a mira P. ta cana bay for di e scooter. Sinembargo P. tabata net mey mey di e scooter y un muraya ora cu D.H. a manda e auto riba e scooter. Hues a bisa cu riba imagennan di e video di seguridad, por a mira tur cos. Hues ta conclui cu D.H. a mira P.
CULPABEL DI PURBA MATA
Hues a mustra cu ta conoci, cu si auto dal un hende, e por mat’e. Na opinion di Hues, door di core cu velocidad halto y dal contra e scooter, D.H. a tuma e chens cu e por a mata P.
Hues ta haya intento di mata proba. Na opinion di Hues, e no ta haya proba cu D.H. tabatin un arma di candela den su man. Apesar cu P. y e dama a bisa cu a mira D.H. cu un arma. Polis a haya huls di bala den e auto. Tabatin potretnan di arma den e cellular di D.H.
Hues ta haya cu D.H. culpabel di intento mata.
CASTIGO
Pa cu e castigo, Hues a bisa cu e ta tene cuenta cu D.H. tabata menor di edad ora di incidente. Esey kiermen cu mester aplica e castigo hubenil. Hues ta haya cu D.H. mester di ayudo psycologico pa evita cu e ta haci algo similar atrobe.
Hues a mustra cu anterior D.H. a wordo condena pa posecion di arma di candela y a haya castigo combina. D.H. a haci e delito aki den su tempo di prueba y atrobe tin arma envolvi.
Hues a bisa cu e ta pone e 10 luna condicional di e castigo anterior, acerca di e castigo cu e ta condena D.H. El a condena D.H. na 15 luna di prison, di cual 10 luna ta condicional cu un tempo di prueba di 3 aña. Acerca ta bin e 15 luna cu ta nifica cu D.H. ta haya 15 luna di prison tog. Durante e tempo di prueba, D.H. ta cay bao guia di Reclasering.
Hues a bisa cu e demanda di daño di P. pa cu e scooter, lo wordo aproba. Hues a ordena D.H. pa paga 3 mil florin y a pone medida di pago. Hues a bisa tambe cu e auto confisca pa Polis, lo mester debolbe na e mama di D.H. y e cantidad di huls confisca lo wordo destrui.
