ORANJESTAD – Cu hopi orguyo Qredits Aruba y Colegio EPI den colaboracion creativo y contribuyendo na solucionnan perdurabel pa nos pais, a presenta 17 cursista mas cu nan certificado pa e Fall Course di e programa BeYourOwnBoss.
Pa atende cu un pais den crisis ta rekeri creatividad, union di esfuersonan y tambe educacion continuo di su hendenan. BeYourOwnBoss ta un programa cu ta lora den esaki, cu un sistema crea pa Qredits Aruba, esta e tecnica pa acerca esaki di diferente angulo. E meta ta pa prepara e participante pa haya e abilidadnan y e mindset corecto pa e por comberti su mes den un entrepreneur exitoso. E curso ta completamente na Ingles y e parti di instruccion ta tuma luga na Colegio EPI su Openleercentrum bou guia di e instructor Rishi Ramsoondar.
Na juni a otorga caba e prome grupo di 24 participante nan certificado di e programa. Desde comienso di september te cu luna di december, e di dos grupo a sigui e curso BeYourOwnBoss y diasabra dia 4 di december a otorga 17 participante nan certificado, como prueba di a completa e programa cu exito. E certificado aki ta na nivel di MBO y ta un tremendo adkisicion pa un persona su portofolio profesional.
Director general di Colegio EPI, Ryan Maduro, hunto cu Branch Manager di Qredits Aruba, Nathaly Harms, tabata presente pa felicita e graduadonan di e curso y pa desea nan hopi exito den nan futuro como entrepreneur na Aruba.
