Diahuebs mainta Corte di Husticia a trata e caso penal cu Ministerio Publico a cuminsa contra e homber B.E.H. (26). E ta wordo acusa cu riba 11 October 2023, a ocasiona un accidente serio riba e cruzada di LG Smith Boulevard y Adiraan Lacle Boulevard cu consecuencia cu 4 dia despues, e dama Gutierrez (21), riba e brommer BMW a fayece mientras cu e chofer di e brommer, Kelly, tabata hopi grave y mester a wordo hiba cu air ambulance pa exterior.
SOLO DI PUEBLO por a compronde cu Fiscal ta haya B.E.H. culpabel y a exigi 2 aña di prison di cual 30 luna ta condicional y 3 aña sin rijbewijs.
Den tribuna di sala di Corte, por a mira cantidad di persona den tribuna. Algun ta famia di e acusado y algun ta famia di e victima Kelly y e fayecida Gutierrez. Por a mira cu e victima Kelly tabata hopi emociona. Su familiar a bisa Hues cu no a keda cla cu e demanda di daño pero cu lo bay cuminsa un caso civil. Señora Gutierrez, mama di e fayecido, tambe tabata presente y su abogado mr. Odor a haci demanda di daño.
ACCIDENTE
Durante tratamento di e caso, B.E.H. a splica na Hues kico a pasa dia 11 October 2023. B.E.H. a bisa cu e tabata cu algun amigo pa celebra cumpleaños di un persona na beach. Despues el a dicidi di bay serca mama di un amigo kende tambe a haci aña. E tabata den un KIA Picanto riba LG Smith Boulevard y na e cruzada cu Adriaan Lacle Boulevard, e accidente a sosode.
Hues a puntra B.E.H. si el a bebe. El a bisa cu el a bebe 1 cerbez y 2 cups di rum coke. Hues a remarca cu Polis a constata mas di 700 microgram den rosea di B.E.H. cu ta mucho mas cu loke B.E.H. ta bisa di a bebe. B.E.H. a bisa Hues cu e no sa cuanto rum nan a tira den su bebida. Segun B.E.H., despues di 1 ora na beach, el a bay core auto y e tabata sinti bon pa core. Hues a remarca cu hopi biaha, hende bou influencia ta sinti nan hopi bon. Hues a mustra cu segun Polis, B.E.H. tabata hole alcohol y su wowonan tabata blink. Hues a bisa cu tin video di loke a sosode y cu por mira cu B.E.H. a bira pa drenta den Adriaan Lacle Boulevard ora cu un brommer BMW tabata biniendo riba LG Smith Boulevard. Segun B.E.H. e brommer tabata leu. Hues a puntra, si e alcohol lo por a influencia e calculo di B.E.H.
Segun B.E.H., tabata hopi scur na e cruzada y pesey el a tuma e birada cortico pa drenta Adriaan Lacle Boulevard. Hues a bisa cu segun investigacion, e brommer tabata core 137 km pa ora. Esey ta hopi duro. Hues a bisa cu tin testigo a declara cu e KIA a coy e birada chikito, tuma un chens, pa asina pasa promer cu e brommer pasa. Hues a puntra B.E.H., kico e accidente a causa p’e. El a bisa cu el a keda cu trauma. Hues a puntra B.E.H. si el a tuma contacto cu e famia di e victima. B.E.H. a bisa no y cu e tin un conoci cu conoce e famia. El a bisa cu e lo kier tin contact cu e famia si ta posibel. Ta asina cu door di e accidente, e auto a keda confisca y a kita B.E.H. su rijbewijs. Durante e hacimento di pregunta di parti di Hues a sali na cla cu B.E.H. ta trahando na un instancia financiero y mester di su rijbewijs pa por bay traha.
MAMA DI VICTIMA A PAPIA
E mama di e victima, señora Gutierrez a hiba palabra. El a bisa Hues pa B.E.H. papia e berdad. E mama, hopi emociona a bisa Hues cu door di e accidente, el a perde su yiu muher (21). El a bisa Hues cu e dia ey su yiu a caba di traha y tabata bayendo cas. El a expresa cu ta su unico yiu muher. E mama a remarca cu e hecho cu B.E.H. a bebe, e mester sa cu e por a causa e acccidente. E mama hopi emociona a bisa cu ya ta 1 aña y 5 luna cu su yiu muher a fayece. E mama tabata insisti cu no tabata solamente un accidente.
CHOFER DI BROMMER TA RECLAMA
E chofer di e brommer, Kelly, tambe a papia. El a bisa Hues cu B.E.H. a bin cu un bon storia. El a bisa Hues cu e tabata coriendo un brommer BWM cu luz Led y muffler cu ta zona duro. Esey ta haci cu ta imposibel cu B.E.H. no a mira ni scucha e brommer. Na opinion di Kelly, B.E.H. a bira su dilanti y el a dal frontal no den banda. Hues a hala Kelly su atencion cu e mester papia como victima y no critica kico lo a pasa. Kelly a bisa Hues cu loke a pasa a laga e y su famia y e mama di e difunto y su famia afecta.
FISCAL A EXIGI 2 AÑA DI PRISON
Fiscal a bisa Hues cu e accidente aki a conmove henter comunidad. El a mustra cu Kelly tabata maneha su brommer y B.E.H. a bira su dilanti sin duna preferencia. Esey a causa un accidente caminda e dama Gutierez (21), cu tabata sinta patras riba e brommer, a muri algun dia despues. Kelly tabata grave y e mester a bay cu air ambulance pa tratamento.
Fiscal ta di opinion cu B.E.H. no intencional a kita biba di e dama. Fiscal ta haya cu B.E.H. a causa un accidente cu consecuencia cu e dama a fayece. Fiscal a bisa cu e caminda tabata suficiente ilumina. Ta un hecho cu B.E.H. no a duna preferencia na e brommer y a bira mucho liher pa subi Adriaan Lacle Boulevard y no a duna preferencia na e brommer. Fiscal a mustra cu Polis a constata cu B.E.H. tabata bou influencia di alcohol. B.E.H. a admiti di a bebe. Fiscal a remarca cu B.E.H. ta bisa cu e no a mira e brommer. Sinembargo tin testigo ta bisa cu a mira e brommer ta bin cu velocidad halto y cu B.E.H. a tuma un chens bira liher. Fiscal a bisa cu tin imagennan di video di seguridad caminda ta mira cu e brommer tabata core cu velocidad halto y cu e KIA a bira su dilanti. El a remarca cu riba e caminda ta permiti pa core 50 km siendo cu e brommer tabata core 137 km. Fiscal ta haya cu door cu B.E.H. no a duna preferencia, a causa morto di Gutierez. Fiscal a tuma B.E.H. na malo cu e no tabata mas cauteloso pa mira na unda e mester a bira y para y laga e brommer pasa. Fiscal a bisa cu ta un hecho cu e brommer tabata core hopi halto pero tin hurisprudencia cu ta mustra cu no por bisa cu door di e coremento duro di e brommer, e accidente a sosode.
Fiscal ta haya cu aki no por papia di cu intencional B.E.H. a causa accidente sino cu door di su culpa. Fiscal a bisa cu mester tene cuenta cu e brommer tabata core hopi duro. Pero mas serio ta e hecho cu B.E.H. tabata hopi bou influencia. Pa cu e castigo, Fiscal a tene cuenta cu ta promer biaha cu B.E.H. ta cay sera. E auto a keda confisca. Fiscal a exigi 2 aña di prison pa B.E.H. di cual 30 luna ta condicional cu 2 aña di prueba. Tambe Fiscal a exigi cu e rijbewijs ta keda kita pa 3 aña.
ABOGADO TA CUESTIONA BROMMER
Abogado mr. Emerencia a bisa Hues cu esaki ta un accidente tragico. Na opinion di abogado, contrario cu Fiscal, e no ta haya cu B.E.H. so ta culpabel sino e brommer tambe. E causa di accidente a sosode despues di 12’or di anochi. Investigacion ta mustra cu e brommer tabata core hopi duro y dal den banda di e KIA, cu consecuencia cu e dama Gutierez a fayece algun dia despues. E abogado ta haya cu door di e velocidad halto di e brommer, e consecuencia di e accidente tabata asina grave. El a remarca cu si e brommer tabata core 50 km, stipula pa ley, lo no tabatin un accidente asina grave. E ta haya cu e chofer di brommer ta mes responsabel.
E abogado a bisa cu ta conoci cu riba e cruzada LG Smith Boulevard y Adriaan Lacle Boulevard ta scur. Anochi, ta dificil pa mira bon con pa bira subi Adriaan Lacle Boulevard. El a bisa Hues cu net ey banda tin un oficina di abogado cu tin luznan hopi cla. Esaki ta haci cu B.E.H. no por a mira e luz di brommer. Segun abogado, investigacion ta mustra cu den 6 seconde e brommer a dal contra e auto cu tabata birando. Na opinion di abogado, B.E.H. tabata mira unda cu e tabatin cu bira y e brommer a dal contra dje. El a bisa cu na Aruba ta conoci cu e cruzada ey ta sumamente peligroso y varios accidente fatal a sosode eynan. El a mustra cu tin testigo, cu tabata core cu bentana habri, cu a bisa cu no a scucha e brommer. E abogado a bisa Hues cu e brommer BWM tabata core hopi duro. Na opinion di e abogado, e brommer tabata core mas duro cu 137 km cu Fiscal a bisa. E abogado ta calcula cu e brommer tabata core 150 km, teniendo cuenta cu e specificacionnan di e brommer. Mr. Emerencia a bisa Hues cu e hecho cu B.E.H. a sende luz di direccion, baha velocidad, ta mustra claramente cu e tabata core cauteloso. Na opinion di abogado, no pasobra cu B.E.H. tabata bou influencia di alcohol, sino cu e cruzada tabata hopi peligroso, cu e tabata core asina cauteloso y no tabata sa kico e tabata haci. Abogado ta haya exigencia di Fiscal exagera. El a pidi Hues pa duna castigo combina cu multa of trabao pa comunidad pa asina B.E.H. no mester bay sera.
