Diabierna mainta e hombernan Venezolano J.M.C. y C.Z.C. a presenta dilanti Hues pa scucha nan sentencia relaciona cu traficacion di cocaina pa Hulanda.
SOLO DI PUEBLO por a compronde cu Hues a haya J.M.C. y C.Z.Z. culpabel di traficacion di cocaina cu tabata mescla den verf riba cahanan di instrument cu tabata destina pa bay Hulanda.
FISCAL A EXIGI 42 LUNA DI PRISON
Dia 8 December 2025, tratamento di e caso a tuma lugar caminda Fiscal a bisa Hues cu 3 April 2025, na Master Cargo, cacho anti droga a reacciona riba cahanan di instrument. A resulta cu 8 caha di instrument tabatin verf mescla cu cocaina. E cahanan tabata pisa 9150 gram. Despues di calculacion, el a bira 9077 gram. E intension tabata pa manda e carga Hulanda. E cahanan lo mester a bay pa un tal B. na Hulanda.
Fiscal ta haya cu J.M.C. y C.Z.C. ta complice di exportacion di cocaina. Fiscal a exigi 42 luna di prison pa cada un. Fiscal a exigi pa e droga keda destrui. E cellular y placanan cu a haya di C.Z.C. mester keda confisca.
SENTENCIA
Awe mainta, Hues a bisa cu C.Z.C. a nenga pero Hues ta haya C.Z.C. y J.M.C. culpabel. Hues no ta kere declaracion di C.Z.C., cu e no tin nada di haci cu e caso. Hues a bisa cu J.M.C. a bisa cu C.Z.C. tabatin un funcion importante. Hues a mustra cu C.Z.C. su yiu a traha pasaporte falso pa J.M.C. Den C.Z.C. su cellular a mira cu na Mei 2025 tabata papia cu a traha riba e cahanan.
Na opinion di Hues, esaki ta mustra cu C.Z.C. tabata preparando transporte di droga.
Hues a bisa cu investigacion a mustra cu tin algo mas di 9 kilo di cocaina cu tabata mescla den e verf cu a usa pa verf cahanan di instrumento. Hues a condena nan na 30 luna di prison.
Hues a bisa cu e placanan confisca di C.Z.C., ta wordo debolbe. E no ta haya proba cu e placanan manera Fiscal ta bisa ta procedente di droga.
