E publicacionnan recien di AVP-24ora contra Sr. Endy Croes ta basa riba un rapport prepara pa Ernst & Young den 2010. Pero pueblo mester sa: esey ta mesun rapport ya a wordo condena formalmente pa e corte mas halto di Hulanda, Hoge Raad, den su sentencia di 17 mei 2019, caso numero 18/0151.
Hogeraad, e corte a dicta claramente cu Ernst & Young a actua den manera onrechtmatig – ilegal – contra Endy Croes. Nan a presenta un rapport cu no cumpli cu regla di objectividad, transparencia ni “wederhoor”. E resultado: un document carga cu errores, intencionalmente mal traha y cu un daño directo contra un individuo cu no tabatin oportunidad real pa defende su mes.
Cita directo di e Corte:
“Ernst & Young heeft schuldig zich gemaakt aan een onrechtmatige daad jegens Croes doordat zij een rapport heeft uitgebracht dat niet voldoet aan hetgeen Croes van haar als redelijk handelend en redelijk bekwaam accountantsbureau mocht verwachten.” (Hoge Raad, Arrest 17 mei 2019, zaaknummer 18/0151, rov. 2.69)
Traducí: Ernst & Young a comete un acto ilegal contra Croes, entregando un rapport cu no ta digno di un firma di accounting profesional ni husto pa e persona investiga.
Lo cu 24ora ta tapa: E rapport ya no tin valor legal ni moral
E mes rapport cu 24ora ta cita, a wordo desmantela den corte. No solamente por falta di procedimiento, sino tambe pa presenta un imagen mas negativo cu e realidad, sin verifica, sin transparencia, y sin oportunidad husto pa defensa. Ernst & Young no a entrega e rapport na Croes, ni a duna e oportunidad pa defende su mes. Ta e mesun rapport cu e Hoge Raad a dicta cu ta contente fouten en onduidelijkheden y cu crea un beeld di culpa sin fundamento cu prueba.
Kico realmente a pasa? Atake selectivo y politicamente motiva
24ora ta usa un documento oficialmente rechasa pa sostene un relato cu ya no tin ni base legal ni base etico. E hecho cu e medio ta reanima un acusacion cu origen na 2011, basa riba un rapport ya descredita, sin menciona cu e Corte Suprema ya dicta cu e ta ilegal, ta prueba cla di un campaña di malinformacion.
Pueblo ta mester haci un pregunta cla: si e rapport di Ernst & Young no por usa den corte, dicon e medio ta trata di use ?
Basta ya cu manipulacion. Husticia ya a papia.
Ernst & Young a faya. E rapport ta mancha. E corte mas halto ta cla cu derecho di cuidadano a wordo viola. Endy Croes no a wordo condena, no a wordo persigui, y no tin ningun base legal pa sigui persecusion politico riba base di documento ya refuta. Kisas ta ora pa e escritora di 24 Ora, Sra. Maritza Farro busca poco les, haci poco pregunta, busca poco conesho. Bo por sigui lesa e rapport 1000 ves, pero sea informa cu e rapport ey no tin ningun valides, ni cerca Ministerio Publico.
