Awe nos ta recorda un di e fechanan mas importante den nos historia: 25 di maart 1977. Riba e dia aki, exactamente 49 aña pasa, e pueblo di Aruba a sali for di cas pa duna nan vos den un Referendum historico.

E Boluntad Di Un Pueblo

Na 1977, lidernan manera Betico Croes a compronde cu Aruba no por a keda scondi bou di e structura di Antiyas Hulandes mas. E pueblo tabata kier libertad pa dicidi riba su mesun futuro. E resultadonan tabata mas cu cla:

Mas di 82% di e votadonan a scoge pa Independencia (como e caminda pa yega na nos Status Aparte).

Esaki tabata e pasion y e determinacion cu a habri e portanan na Den Haag pa nos por a haya nos Autonomia na 1986.

Dicon Esaki Ta Importante Awe?

E Referendum di 1977 no tabata djis un papel den un baki; e tabata un declaracion cu Aruba ta di e Arubianonan. E tabata e fundeshi pa nos por tin nos mesun Parlamento, nos mesun Minister Presidente, y nos propio maneho financiero.

E Lucha Ta Sigui: Autonomia No Ta Na Benta!

Awe, nos ta mira con e mesun autonomia ey cu nos a bringa p’e na 1977 ta bou di preshon. E discusion riba e Rijkswet HOFA ta recorda nos cu libertad no ta algo cu bo ta haya un biaha y cla; e ta algo cu bo mester cuida tur dia.

E Peliger: Contrario na e ley nan di Aruba mes, un Rijkswet ta mara nos na decisionnan di Den Haag unda nos no tin e ultimo palabra mas. 

Finalmente: Honor na nos historia

Recordando 25 di maart 1977, nos mester puntra nos mes: Nos ta bay entrega e yabi cu nos grandinan a bringa asina duro p’e? E Referendum a siña nos cu ora e pueblo uni, no tin ningun structura legal ni ningun presion externo cu por para nos boluntad. Laga nos celebra nos autonomia door di defend’e cu e mesun forsa y curashi cu e pueblo a mustra na 1977.

Aruba su destino mester keda den man di Aruba!