28 mil dollar cu Douane a confisca di Chines ta keda confisca

E homber Chines K.N.W. (37) a presenta dilanti Hues pa e caso penal cu Ministerio Publico a cuminsa contra dje. Hues ta haya K.N.W. culpabel di no a declara na Douane e mas cu 28 mil dollar cu e tabata kier a viahe cune.

   SOLO DI PUEBLO por a compronde cu K.N.W. a parti e placa cu tres otro hende pa asina keda sin declara esaki na Douane pero a wordo gara. E otro tres personanan a bisa cu nan a haya e placa for di K.N.W. pa viaha bay Colombia hunto cu K.N.W.

A PURBA PASA DOUANE SIN DECLARA E 28 MIL DOLLAR

Fiscal a bisca Hues cu ta acusa K.N.W. cu riba 12 Februari 2024, el a keda sin declara na Douane cu e tabatin mas cu 28 mil dollar. Ta asina cu K.N.W. a admiti y a bisa cu e placa tabata dividi den 4 hende. Segun K.N.W. e sa cu no por pasa cu mas cu 10 mil dollar sin declara na Douane y pesey a parti e placa cu otro tres persona. Hues a mustra cu e otro tres personanan a bisa cu nan a haya e placa for di K.N.W.

   K.N.W. a bisa cu e ta conciente cu el a haci malo pero e placa tabata pa tratamento medico di su mayornan y traha apartamento na Colombia. Hues a bisa cu Polis a haci investigacion cu ta mustra cu enberdad e mayornan a lanta e placa for di banco.

FISCAL

Fiscal a bisa cu e notificacion obligatorio na Douane no ta por nada. Gobierno kier evita cu hendenan ta drenta y sali Aruba cu sumanan grandi. E ta lamentable cu K.N.W. no a declara e mas cu 28 mil dollar na Douane. E ta haya cu ta intencionalmente K.N.W. a haci esaki.

   Fiscal a exigi pa confisca e mas di 28 mil dollar cu K.N.W. no a declara na Douane.

ABOGADO

Mr. Kuster a bisa Hues cu K.N.W. ta admiti di a haci malo. K.N.W. ta haya importante pa a splica cu e no a haci nada contra ley sino a base di nan tradicion, a haci asina pa yuda su mayornan na Colombia. E abogado a splica cu e mayornan ta bay dos vez pa aña Colombia pa haya tratamento.

28 MIL DOLLAR TA KEDA CONFISCA

Hues a sera tratamento di e caso y a dicta sentencia di biaha. Hues ta haya cu tin suficiente prueba cu K.N.W. kier a viaha pa Colombia sin declara e cantidad di placa cu e tabatin. Esaki ta castigabel. Hues ta haya e exigencia di Fiscal na su lugar. Hues ta haya cu mester manda señal cla pa comunidad cu no por actua asina. Hues a bisa cu e mas cu 28 mil dollar ta keda confisca.