Awe mainta e hombernan hoben A.C.R. (18) y J.A.S. (17) naci na Cuba y biba na Aruba, a presenta den Corte di Husticia pa e caso penal cu Ministerio Publico a cuminsa contra nan.
SOLO DI PUEBLO por a compronde cu awe a cuminsa trece presonan di KIA atrobe, despues di e lockdown relaciona cu Turbeculosis.
ACUSACIONNAN
Den sala di Corte por a mira un cantidad di persona a presenta pa e caso, entre nan e mayornan di J.A.S. Fiscal a bisa cu J.A.S. y A.C.R. ta wordo acusa cu riba 8 September 2024 a purba asesina y posecion di un arma di candela. E victimanan tabata e hombernan H. y F., kendenan danki Dios no a resulta herida pero balanan a bora e auto. Fiscal a sigui bisa cu e mesun dia, J.A.S. y A.C.R. a destrui auto di dama L. Tambe un auto di dama V.
SOSPECHOSONAN TA NENGA TUR COS
Hues bisa cu J.A.S. lo a tira riba un auto den cual H. y F. tabata. J.A.S. ta desmenti esey. El a bisa Hues cu e no ta corda kico el a haci 8 September 2024. El a haya e auto Nissan March fia di su tata e dia 8 September 2024 y tabata core cu esaki rond. Durante interogacion di Hues, J.A.S. a admiti di tabata core e auto e anochi ey pero no ta corda unda tur el a core. Hues a bisa cu den e auto tin GPS y Polis a check tur e ruta cu e auto a core. Investigacion ta mustra cu J.A.S. a core hopi vuelta na San Nicolas. Segun J.A.S., e no tabata na San Nicolas. Hues a remarca cu ta masha straño. Hues a bisa cu hasta tin video di seguridad, cu a capta e auto ta pasa. El a remarca, con esey por ta posibel. Segun J.A.S., el a core den Madiki y Bushiri caminda el a bay serca algun amigo y a bay na un supermercado Chines. Hues a puntra, kendenan el a bay serca dje. J.A.S. a bisa Hues cu e no kier a menciona nomber di e amigonan pa no haya problema.
TIRAMENTO DEN SAN NICOLAS
Hues a puntra J.A.S. kico a pasa cu e windshield patras di e auto. Segun J.A.S., el a wordo kibra sea cu un biga of machete. El a bisa cu e no sa pasobra ta ora el a lanta for di soño, el a ripara cu e windshield tabata kibra.
Hues a puntra J.A.S. si e conoce e hombernan H. y F. y el a bisa si. Hues a bisa cu H. a bisa Polis, cu el a kibra e windshield cu un machete. Hues a mustra cu H. a declara cu na South Beach e tabatin problema cu J.A.S. y J.A.S. a tira riba nan. J.A.S. ta nenga di tabata na South Beach. Na dado momento J.A.S. a bisa cu e no tabata core auto anochi sino den dia. Hues a remarca cu con por ta cu H. y F. ta bisa di a mira J.A.S.
Hues a puntra e otro sospechoso A.C.R. si el a sali anochi. Segun A.C.R. e tabata serca su wela cu a haci aña y despues su mama a bay buske y hib’e cas. El a bisa cu e no a sali cu J.A.S. e dia ey. Hues a bisa cu tin hende a mira e auto di J.A.S. na cas di A.C.R. Segun A.C.R., e tabata na su wela. El a nenga di tabata na South Beach. A.C.R. a bisa Hues cu e conoce H. y F. pero no tin problema cu nan. Hues a remarca cu segun H. y F., nan tabatin problema cu A.C.R. na South Beach y a tira riba nan.
Hues a bisa cu J.A.S. ta conoci pa Polis den cierto incidente pero cu e no a wordo deteni anterior. Ta asina cu J.A.S. recien a bira tata cu un mucha muher di 17 aña. Hues a mustra cu A.C.R. tambe ta conoci pa Polis y e tambe ta tata.
Hues a mustra cu tin raport di Reclasering cu ta mustra preocupa pa A.C.R. su amigonan cu no ta riba e bon caminda. A.C.R. a bisa Hues cu den pasado el a yega di haya ayudo di Reclasering y cu awor e kier haya atrobe ayudo.
FISCAL A EXIGI 3 AÑA DI PRISON
Fiscal a bisa Hues cu e ta haya legalmente proba intento di mata y no e promer acusacion esta purba asesinato. E ta haya cu J.A.S. y of A.C.R. a tira. Tambe Fiscal ta haya nan complice di un arma di candela. Na opinion di Fiscal, J.A.S. y A.C.R. tambe ta culpabel di destruccion riba e auto blanco cu e dama L. ta doño. Tambe e auto di e dama V. a haya un impacto di bala.
Pa cu e castigo, Fiscal a bisa Hues cu 5 pa 6 biaha J.A.S. y A.C.R. a tira riba e auto. Danki Dios cu no tabatin hopi hende riba caminda na San Nicolas e momento ey. Sino esey por a resulta hopi fatal. Danki Dios cu ningun hende a resulta herida na San Nicolas. Fiscal ta haya e caso di tiramento den San Nicolas, hopi serio. Ta trata di dos hoben J.A.S.(17) y A.C.R.(18). Nan ta conoci di Polis pa cosnan cu nan a yega di haci. Fiscal ta haya cu J.A.S. y A.C.R. mester haya guia intensivo di Reclasering. Pa J.A.S., Fiscal a exigi castigo hubenil di 3 aña di prison di cual 1 aña ta condicional. Fiscal a exigi 2 aña di prison y durante e periodo aki J.A.S. ta cay bou guia di Reclasering. Fiscal a bisa Hues cu e ta exigi pa A.C.R. e mesun 3 aña di prison di cual 1 aña ta condicional cu 2 aña di prueba y bou guia di Reclasering.
ABOGADO
Abogado mr. Paesch a bisa Hues cu lo ta bon pa mira e video di seguridad pasobra no por mira hendenan den auto en todo caso no A.C.R. E abogado a bisa Hues cu no por bay tras declaracion di H. E ta haya cu mester declara su cliente liber.
Abogado mr. Kuster a bisa Hues cu J.A.S. ta para riba cu e no a core bay San Nicolas y no tabata core anochi. E abogado tambe ta haya cu riba video no por mira kende tabata sinta den auto. El a bisa cu Polis no a haya huls di tiro. Na opinion di e abogado, no tabatin un persecusion manera Fiscal ta bisa. Nan tabata core tras di otro. E abogado a bisa cu H. y F. a bisa Polis cu nan no sa kende a tira. E ta haya cu mester declara su cliente J.A.S. liber.
Ta asina cu ambos sospechoso a lesa un carta cu nan a bin cun’e skirbi. Tur dos ta para riba cu nan no a haci nada y nan tin 8 luna sera den KIA pa algo cu nan no a haci.
Hues a sera tratamento di e caso y a bisa cu 6 Juni 2025 lo tin sentencia.
