Awe mainta e hombernan Venezolano L.E.C. (39), W.V.R. (34), A.C.H. (33) y P.C.B. (53) a presenta dilanti Hues pa scucha nan sentencia. Nan tur a wordo gara riba boto cu cantidad di bultonan di droga.
SOLO DI PUEBLO por a compronde cu Hues a haya tur cuater acusado culpabel y a condena nan igual na e exigencia di Fiscal cu ta 3 aña y 6 luna di prison.
BOTO CU 323 KILO DI MARIHUANA Y 27 KILO DI COCAINA
Dia 27 di Juni 2025, tratamento di e caso a tuma lugar. Fiscal a acusa e grupo cu riba 13 December 2024 a importa cocaina y marihuana. Hues a bisa cu Guarda Costa riba 12 December 2024, pa 11’or anochi ta mira riba radar un boto navegando direccion Seroe Colorado. Mas o menos 12’or di anochi, Guarda Costa di Aruba a intercepta e boto. L.E.C. y W.V.R. tabata dilanti den e boto y A.C.H. y P.C.B. patras. Avion di Guarda Costa a mira cu a tira 5 bulto den laman y den boto a haya 12 bulto. En total 323 Kilo di marihuana, 27 Kilo di cocaina.
FISCAL A EXIGI 3 AÑA Y 6 LUNA DI PRISON
Fiscal a exigi 3 aña y 6 luna di prison pa nan tur. El a exigi tambe pa destrui e droganan y e boto ta keda confisca.
HUES A CONDENA TUR NA 3 AÑA Y 6 LUNA DI PRISON
Hues a bisa cu e ta haya legalmente proba cu e grupo di Venezolanonan ta envolvi den importacion di droga. Hues ta haya cu e grupo a haci e traficacion di droga y cu nan tabata sa cu tin droga den e bultonan. Pa cu e castigo, Hues a bisa cu e ta tene cuenta cu ta trata di un cantidad grandi di marihuana y cocaina. Hues ta haya cu e grupo aki, a yuda den circulacion di droga internacional.
Hues a confirma e exigencia di Fiscal y a condena nan tur na 3 aña y 6 luna di prison .
