ORANJESTAD – Riba e dianan diamars 14, diaranson 15 y diahuebs 16 di december, Centro Libertador Betico Croes na Santa Cruz lo habri su portanan atrobe pa comunidad por ‘walk in’ for di 8or di mainta pa 4or di atardi ‘non stop’.
Pone atencion cu ta unicamente riba e 3 dianan aki cu comunidad por ‘Walk-In’ y busca e vacuna cu nan falta sea ta e prome dosis cuminsando for di 12 aña, di dos dosis of e ‘booster shot’ cuminsando for di 55 aña.
- Prome dosis; Pa ricibi prome dosis mester tin minimo 12 aña y mester presenta cu AZV. Muchanan menor di edad mester bin acompaña pa un mayor. E persona cu no tin AZV pero ta biba na Aruba, e persona mester prueba cu eta biba na Aruba pa un periodo caba. Es cu tin paspoort Hulandes mester prueba cu e ta biba na Aruba pa mas cu 1 luna y es cu no tin paspoort Hulandes mester prueba cu e ta biba na Aruba pa mas cu 2 luna. Studiantenan Arubiano bibando den exterior por vacuna unabes cu nan ta na Aruba si nan por prueba cu nan ta studiando den exterior.
- Di dos dosis; Pa ricibi di dos dosis e persona mester a ricibi su prome dosis mas cu 3 siman atras. E persona mester presenta cu su prueba di vacunacion anterior y su AZV.
- ‘Booster shot’: Pa ricibi e ‘booster shot’ e persona mester tin minimo 55 aña. E edad pa ricibi ‘booster shot’ a wordo reduci na minimo 55 aña. Pa busca e booster shot ta nesesario cu e persona a ricibi su di dos dosis di vacuna mas cu 6 luna tras. Es cu despues di a ricibi su di dos vacuna a test positivo pa COVID e personanan aki mester warda 6 luna despues di a test positivo pa busca su ‘boostershot’.
Pa locual ta planificacion ta importante pa informa cu prome y di dos vacuna lo wordo suministra den e Unidad Mobil di Rampen Bureau cu ta un tracker largo preto cu lo ta staciona parti pafo di Centro Libertador Betico Croes. Unicamente ‘boostershot’ lo wordo suministra paden di Centro Libertador.
Pa mas informacion bishita nos facebook page Directie Volksgezondheid DVG Aruba of yama nos na 5224200 of 2800101.
