Tawata exactamente 32 aña pasa cu Aruba su Miss Aruba ‘93/’94, Alexandra Ochoa, den un bisti unico y masha comenta pa prensa internacional a bay rumbo Hapon pa competi den Miss International 1994. Su diseñador tawata Jaime Arango, cu ta conoci pa a bisti reinanan di beyesa Colombiano manera Paola Andrea Betancur y Carolina Gómez.
E edicion 34 di Miss International, tawata e prome biaha cu Aruba a participa. E impacto cu Alexandra a causa na Hapon tawata asina grandi cu entre e 50 paisnan el a logra clasifica den e 15 finalistanan. Entre e finalistanan tawata figura tambe Miss Venezuela 1992 e famoso presentador Milka Chulina. Aruba su nomber a resona totalmente na Hapon y pa alegria di nos isla, Alexandra Ochoa a logra e corona di prome finalista lagando 48 otro pais tras di dje. Miss International a bira Miss Grecia, Prome finalista Miss Aruba y Segunda finalista Miss España.
Tawata e dj presentador dfm. Ruben “Scorpio” Garcia esun cu orguyosamente a anuncia prome den su programa radial e noticia bunita aki pa nos isla. Aruba a ricibi Alexandra na grandi y nos ta corda con e aprecio di parti di prensa y pueblo Arubano tawata. E eleccion di Miss Internacional 1994 a ser pasa pa pueblo Arubano algun dia despues dje evento.
Un aña prome Alexandra Ochoa a ser corona como Miss Aruba 1993 den Aruba Entertainment Center, caminda el a luci un creacion tambe di Jaime Arango. E artistanan invita tawata El Gran Ballet de Venevision y e grupo Guayacan di Colombia. E coreografia- y produccion tawata den man di Mery Cortéz y Joaquín Riviera dfm. Como prome finalista a keda Christina van den Berg y Lyndelle Nieuwkerk como segunda finalista. E presidente di e organisacion Star Promotions tawata sr. Atan Lee dfm.
Pa: Addonsito J. Croes
