Guarda Costa a intercepta boto cu 4 Venezolano
Fiscal a exigi 42 luna di prison pa importacion di 323 kilo di marihuana y 27 kilo di cocaina
ORANJESTAD – E hombernan Venezolano L.E.C.(39), W.V.R. (34), A.C.H. (33) y P.C.B. (53) a presenta den sala di Corte di Husticia, pa e caso penal cu Ministerio Publico a cuminsa contra nan. Tur ta wordo sospecha di importacion di droga.
SOLO DI PUEBLO por a compronde cu Fiscal a exigi 42 luna di prison pa cada un. Fiscal ta haya cu nan ta complice di posecion di lote grandi di marihuana y cocaina.
17 BULTO DI DROGA CONFISCA
Fiscal ta acusa e grupo cu riba 13 December 2024, a importa cocaina y marihuana. Hues bisa cu segun e relato di Guarda Costa, Guarda Costa di Curacao riba 12 December 2024 riba radar pa 11’or anochi, a mira un boto navegando direccion Seroe Colorado. E avion di Guarda Costa ye tabata bulando den direccion di e boto aki, mientras cu Guarda Costa di Aruba a mobilisa. Mas o menos 12’or di anochi, Guarda Costa di Aruba a intercepta e boto. E miembronan di e boto di Guarda Costa a mira e hombernan L.E.C. y W.V.R. tabata dilanti y A.C.H. y P.C.B. tabata patras. E avion di Guarda Costa a mira cu a tira 5 bulto den laman mientras cu e boto di Guarda Costa tabata acercando. Guarda Costa a intercepta e boto y a haya 12 bulto abordo. En total a confisca 17 bulto cu a resulta den 323 Kilo di marihuana y 27 Kilo di cocaina.
HUES A INTEROGA SOSPECHOSONAN
Durante tratamento di e caso, Hues tabata puntra cada un sospechoso tocante e droga. L.E.C. a bisa cu el a bin Aruba ilegal. El a bisa cu el a paga 400 dollar y a entrega su brommer como pago pa por a bin Aruba. El a wordo traspasa di un boto pa un otro y ora el a wak tur e bultonan den e boto, e no por a bay bek. El a bisa cu e no conoce e hendenan den e boto y no por a haci nada. El a bisa cu el a tira bultonan den laman pasobra e tabatin miedo di wordo deteni.
W.V.R. a bisa cu el a paga 1000 dollar pa bin Aruba ilegal. E tambe a bay den boto y nan a bis’e pa no bisa nada. El a bisa cu tabatin dos hende arma. El a bisa cu den su miedo pa bolbe worde deteni, el a yuda benta bultonan den laman.
A.C.H. kende tabata e capitan, a bisa cu el a wordo pidi pa hiba dos hende Aruba. El a bisa cu e no tabata sa cu tin droga abordo. Ora el a wordo hiba di un boto pa e otro boto, tabatin 2 hende arma den e boto. Den e otro boto el a mira e bultonan di droga y a wordo bisa cu e mester hiba tur cos sino nan lo mat’e. El a bisa cu e dos personanan ya tabata abordo.
P.C.B. tabata ayudante di A.C.H. E mester a yena gasoline den tanki di e motornan di e boto. Tambe e mester saca awa for di e boto segun cu nan tabata navega. E tambe a bisa cu esnan den e boto cu a hib’e na e otro boto, a bis’e cu si e no bay den e boto, nan lo mat’e y tir’e den laman.
Hues a remarca cu ta conoci cu mayoria di biaha cu ta transporta ilegalnan, tin droga abordo.
Hues a mustra cu L.E.C. tin carchi di castigo caba na Aruba. Na December 2022, el a wordo condena pa asalto y na Mei 2024 el a wordo laga liber y saca for di Aruba.
Hues a mustra cu W.V.R. tambe tin carchi di castigo na Aruba. El a wordo condena pa asalto cu violencia y na Mei 2024 el a wordo laga liber y saca for di Aruba.
42 LUNA DI PRISON EXIGI
Fiscal a bisa Hues cu e ta haya legalmente proba e grupo tabatin droga den nan poder. Fiscal a mustra cu tur a bisa cu nan a mira bultonan abordo di e boto pero no sa kico ta aden. Nan tabata sospecha di ta droga. Fiscal ta haya cu door di a subi abordo di e boto, nan a tuma e riesgo cu nan tabata participa den traficacion di droga. Fiscal ta haya cu nan ta complice di posecion di marihuana y cocaina. Ta trata aki di 323 kilo di marihuana y 27 kilo di cocaina, cu ta un cantidad grandi. Fiscal a exigi 42 luna di prison pa nan tur. El a exigi pa destrui e droganan y e boto ta keda confisca.
DEFENSA DI ABOGADO
Mr. Carlo a bisa Hues cu A.C.H. mester a trece e otro dos Aruba. A.C.H. como capitan a wordo pidi pa trece e dos Venezolanonan Aruba. A.C.H. y P.C.B. a wordo hiba di un boto pa un otro cu tabata riba laman. Ora A.C.H. a subi e boto, el a mira e bultonan y tabata sospecha di cu ta droga. E abogado a bisa Hues cu A.C.H. no por a hala atras. E no sa cuanto droga tabatin. E no por a bula den laman pasobra e lo muri y si e nenga e lo wordo mata. E abogado a bisa cu na Venezuela bo no por nenga sino bo lo wordo mata. E mesun cos a pasa cu P.C.B. Ta ora el a subi abordo di e boto, el a mira e bultonan y no por a haci nada. Ta riba e otro boto, el a mira e droga y no por a haci nada. E abogado ta haya cu no por papia di traficacion di droga. E abogado ta haya cu no por bisa cu nan ta complice di transporte di droga. El a pidi Hues pa condena nan na un castigo igual na loke nan ta cera caba.
Mr. Faarup a bisa cu L.E.C. y W.V.R. no ta complice di transporte di droga. E abogado a bisa cu ningun di dos tabatin un funcion riba e boto. Nan no tabatin GPS. Nan tabatin un caha chikito den cual tabatin nan cellular. Ambos a bisa cu nunca nan tabatin un GPS y no sa kico ta un GPS. Nan no tabata duna instruccion con mester navega. Nan a mira e droganan abordo pero no por a haci nada. Nan a tira bultonan for di e boto, ora nan a mira Guarda Costa. Esaki tabata un accion den panico. E abogado ta haya cu Hues mester declara nan liber di transporte di droga.
Hues a sera tratamento di e caso y a bisa cu dia 18 Juli 2025 lo tin sentencia. E foto ta solamente referencial y no e lancha intercepta den e caso aki.
