Stingray Swimming Team ta orguyoso di anuncia participacion di 5 landador talentoso na CARIFTA Aquatics Championships 2026 na Martinique. Esaki ta un di e competencianan di landamento hubenil mas prestigioso den region Caribe.
Representando Aruba den e competencia aki ta: Emma Ponson, Vitali Inocencia, Richmyra Hoen, D-Leylah Gerrel y Leandro Santiesteban. Un grupo chikito fuerte di atleta, cu a mustra compromiso, disciplina y crecemento extraordinario durante e temporada.
E CARIFTA Aquatics Championships ta reuni cada aña e mihor talento hubenil di Caribe, cu mas cu 25 pais y isla participando y rond di 500 atleta elite competiendo riba un nivel hopi halto. E evento aki no ta solamente un competencia, sino un plataforma importante, unda ta forma, reta y inspira e futuro campeonnan.
Un generacion nobo ta subi riba escenario di CARIFTA
E aña aki ta marca un momento hopi special pa Stingray, pasobra Emma Ponson y Richmyra Hoen ta haci nan debut na categoria 11–12 aña. Pa nan dos, e competencia aki no ta solamente un logro personal, pero tambe e cuminsamento di un trayecto internacional hopi prometedor.
Emma Ponson ta drenta cu un perfil versatil den varios estilo di landamento, mientras cu Richmyra Hoen ta destaca den backstroke y freestyle. Nan clasificacion na un edad jong ta confirma e trabou duro, dedicacion y e base solido cu Stingray Swimming Team ta construi hunto cu famia di e atletanan.
“Haci debut na CARIFTA ta un soño pa hopi landado hoben. Emma y Richmyra a gana nan luga cu sacrificio y dedicacion y nos ta sumamente orguyoso di nan,” segun e Stingray Swimming team.
Experiencia y ambicion ta bay man den man
Banda di e debutantenan, Leandro Santiesteban ta sigui fortalece su presencia internacional, hunto cu Vitali Inocencia y D-Leylah Gerrel, kende ta aporta experiencia, perseverancia y un fuerte espirito competitivo na e ekipo.
Hunto, nan ta representa un mezcla poderoso di talento hoben, experiencia y ambicion, simbolizando e futuro di landamento na Aruba.
Mas cu competencia: formando caracter y excelencia
CARIFTA no ta solamente tocante medaya of tempo. E ta un plataforma, unda atleta hoben ta siña disciplina, resiliencia y orguyo nacional. Competi cu e mihornan di Caribe ta pusha nan pa crece, mientras cu nan ta representa Aruba cu honor.
E trayecto pa Martinique ta marca pa un training hopi intensivo, preparacion serio y sacrificio. Awor, e enfoke ta cla: prestacion, crece y representa Aruba cu orguyo.
Aruba riba e mapa
Stingray Swimming Team ta sumamente orguyoso di su 5 atletanan elite y ta expresa su apoyo total na su atletanan, como tambe e otro atletanan di seleccion y ta gradici e coachnan, e mayornan y Aruba Aquatics Federation pa nan compromiso continuo.
