Informe cu SOLO DI PUEBLO a haya ta bisa cu Warda nos Costa a cuminza un investigacion interno den e departamento, unda ta sospecha un grupo di cinco trahador, cu lo por a facilita huymento di ilegal recientemente for di e centro di detencion. E informe ta bisa cu ta sospecha cu e trahadornan a coopera cu un of otro candal, dor di laga candal habri, pa asina facilita cu e ilegal por bandona e sitio den tur trankilidad.
Segun informacion cu nos redaccion a ricibi, ta bisa cu na e fiesta durante tdq cu polis a descubri na Mahuma diasabra ultimo, a bin topa cu algun di e ilegalnan cu a huy for di Warda nos Costa. Mas cu claro cu nan a wordo cuestiona tambe riba nan huymento.
A cuminsa un investigacion profundo y awe a dicidi pa kita entrada di cinco persona di Warda nos Costa, via un “toegangsontzegging”, cual ta indica cu nan no por acudi mas na trabao y ta wordo manda cas pa investigacion tuma lugar. Notabel ta cu entre e personanan aki tin te hasta shopsteward di sindicato.
Desde tur tempo ilegalnan ta huy for di Warda nos Costa, tanto bao di e management cu tabatin prome, como esun actual. Solamente cu awor ta tene e noticia scondi pa no sali den publicidad.
E investigacion awor lo mester bay conduci pa yega na e berdad di kico ta pasando y si por tin cualkier otro asunto financiero ta hunga un rol, esta pagonan bao mesa, of si ta error humano dor di laga candal habri, maske ta dificil pa kere cu un cuidador lo por haci tal equibocacion un ves tras di otro.
