ORANJESTAD – Awe mainta Hues a dicta sentencia contra e tres trahadornan di KIA: J. Geerman, D. Maduro y G. Lares. Hues ta haya tur tres culpabel y a condena nan na castigo di prison.
SOLO DI PUEBLO por a compronde cu e tres acusadonan no por a scucha nan sentencia na Bonaire door di un calamidad cu tabatin den prison. Hues a lesa sentencia pa e abogadonan.
SITUACION TENSO NA PRISON DI BONAIRE
Ta asina cu e tres trahadornan: J. Geerman, D. Maduro y G. Lares, ta actualmente sera den prison na Bonaire. E intension tabata cu awe mainta via video conference, Hues lo a dicta sentencia caminda e tres acusadonan lo ta den un oficina na Bonaire y e Hues den sala di Corte, hunto cu e abogadonan y Fiscal.
Sinembargo Hues a informa e abogadonan y Fiscal cu el a wordo informa cu na prison di Bonaire tin un calamidad caminda tur trahador a wordo yama aden pa atende cu e situacion cu a presenta. Esey a causa cu no por a hiba e tres presonan den un oficina pa asina haci e video conference manera tabata planea. E situacion ta asina tenso na prison di Bonaire, cu Hues no tin un idea ki ora of dia e situacion lo normalisa. Hues a puntra opinion di Fiscal y abogadonan, kico pa haci.
Fiscal bisa cu e tres presonan kier tabata presente of via video conference. Ta nan derecho. Abogadonan a bisa cu nan ta haya e situacion serio y ta laga Hues dicidi.
Hues a bay evalua un rato y despues a tuma decision. Hues a dicidi cu e ta dicta sentencia di biaha. Hues a bisa cu e ta tene cuenta cu tin interes di e famianan cu ta presente den sala di Corte y cu ainda tin mas sentencia cu Hues mester dicta den otro caso.
TUR TRES TA CULPABEL
Hues a bisa cu ta legalmente proba tur e acusacionnan contra Geerman, Lares y Maduro. Hues a cuminsa cu Geerman, mustrando cu Polis a haya droga na Geerman su cas y tin declaracion di otronan y cu Geerman a admiti. Hues a bisa cu Maduro tambe a admiti y a haya droga na su cas. Lares a desmenti tur cos pero Hues ta haya tur acusacion proba.
NO TABATIN COMPLOT CONTRA LARES
Den e caso di Lares, Hues a mustra cu Polis a haya apps caminda ta papia di hiba droga, cellular y otro cosnan y tambe tin declaracion di otronan. Hues a sigui bisa cu Polis a haya paketenan cu nombernan na kende e pakete mester bay den KIA. Hues a bisa cu e no ta kere Lares cu e no tabata usa e cellular riba cual a haya e apps. Tampoco Hues ta kere e declaracion di Lares cu tabatin un complot contra dje.
TUR TRES A WORDO CUMPRA
Hues a bisa cu Geerman, Maduro y Lares a wordo cumpra pa pasa droga, cellular y otro cosnan den KIA. Tambe el a bisa cu Geerman y Maduro tabatin cocaina den posecion. Pa cu e castigo, Hues a tene cuenta cu seriedad di e caso, camiunda tur tres a viola nan huramento y a participa den contrabando di droga, cellular y otro cosnan den KIA. Hues a bisa cu door cu tin diferencia den periodo, tin diferencia den castigo.
CASTIGO
Hues a condena Geerman na 4 aña di prison, kitando e tempo cu e tabata sera. Maduro y Geerman a wordo condena na 42 luna (4 aña y 4 luna di prison). Pa tur tres acusado, Hues a bisa cu pa 5 aña, nan no por traha den KIA.
